កែប: ទំនិញខូចគុណភាពជាង៥០០គីឡូក្រាម ត្រូវបានរដ្ឋបាលខេត្ត​ កែបដុតកម្ទេចចោល នាថ្ងៃអង្គារ ទី០១ ខែតុលា ឆ្នាំ២០២៤ នៅទីលានចាក់សំរាម ដែលស្ថិតនៅភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប ក្រោមអធិបតីភាព ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប ។

តាមរបាយការណ៍ លោក ឌីន ចំរុង ប្រធានសាខា ក.ប.ប ប្រចាំខេត្តកែប បានឱ្យដឹងថា ខេត្តកែប មន្រ្តីស៊ើបអង្កេត និងមន្រ្តីអធិការកិច្ចម្ហូបអាហារ បានរឹបអូសទំនិញខូចគុណភាព និងទំនិញហួសកាលបរិច្ឆេទប្រើប្រាស់ ក្នុងរយៈពេល ២-៣ ឆ្នាំ កន្លងមកនេះ ចំនួនសរុបជាង ៥០០គីឡូក្រាម និងរៀបចំពិធីដុតកម្ទេចចោលនាពេលនេះ។ លោកប្រធានបន្តថា មន្រ្តីសាខា ក.ប.ប. ខេត្តកែប បានបន្តការចុះត្រួតពិនិត្យតាមបណ្ដាទីផ្សារជាប្រចាំ ដើម្បីជំរុញការអនុវត្តច្បាប់សុវត្ថិភាពម្ហូបអាហារ និងច្បាប់ការពារអ្នកប្រើប្រាស់ ឱ្យមានប្រសិដ្ឋភាព ក៏ដូចជាការពារសុខភាពរបស់ប្រជាពលរដ្ឋ។

ឯកឧត្តមបណ្ឌិត សោម ពិសិដ្ឋ អភិបាលខេត្តកែប បានកោតសសើរដល់ក្រុមការងារសាខា ក.ប.ប ខេត្តកែប រដ្ឋ​បាល​ក្រុងស្រុក និងមន្ទីរពាក់ព័ន្ធ បានសហការគ្នា យកចិត្តទុកដាក់ ក្នុងការអនុវត្ត តួនាទីភារកិច្ចរបស់ខ្លួនបានល្អប្រសើរ។ឯកឧត្តមបណ្ឌិត​ បន្ដថា ការដុតបំផ្លាញទំនិញដែលខូចគុណភាព និងហួសកាលបរិច្ឆេទ គឺជាសារមួយដាស់តឿនដល់ប្រជាពលរដ្ឋទូទាំងខេត្តកែប ត្រូវមានការប្រុងប្រយ័ត្ន ពាក់ព័ន្ធនឹងការប្រើប្រាស់ផលិតផលហួសកាលបរិច្ឆេទ ព្រោះផលិតផលដែលបានដុតបំផ្លាញក្នុងថ្ងៃនេះពិតជាមានផលប៉ះពាល់ខ្លាំងណាស់ដល់សុខភាពរបស់បងប្អូនប្រជាពលរដ្ឋ អ្នកប្រើប្រាស់ដោយមិនបានពិនិត្យមើលសុពលភាពអោយបានត្រឹមត្រូវ។

ក្នុងនោះឯកឧត្តមបណ្ឌិត ក៏បានអំពាវនាវទៅដល់ បងប្អូនអាជីវករ ត្រូវធ្វើការត្រួតពិនិត្យរាល់ទំនិញរបស់ខ្លួន អោយបានត្រឹមត្រូវមុននឹងលក់ជូនប្រជាពលរដ្ឋ ក្នុងនោះដែរក៏សួមអោយប្រជាពលរដ្ឋ ត្រូវពិនិត្យមើលរាល់ការទិញទំនិញយកទៅប្រើប្រាស់៕
  ដោយ សិលា សារិន