បាត់ដំបង៖ខណៈប្រឡងសញ្ញាបត្រមធ្យមសិក្សាទុតិយភូមិឬការ ប្រឡងបាក់ឌុបឆ្នាំ២០២៤ នឹងប្រព្រឹត្តទៅថ្ងៃទី៨-៩ ខែតុលា ឆ្នាំ២០២៤ស្អែកនេះ ។បេក្ខជនប្រឡងដែលបាននាំគ្នាមកពិនិត្យ​មើលឈ្មោះ លេខតុ លេខបន្ទប់នៅ​តាមមណ្ឌលសំណេរ​នីមួយៗ​បានបញ្ជាក់ថា ពួកគេបានត្រៀមលក្ខណៈរួចរាល់ហើយសម្រាប់​ការប្រឡងយកសញ្ញាបត្របាក់ឌុបនៅថ្ងៃស្អែកនេះ។

ក្នុងចំណោមបេក្ខជនប្រឡងជាច្រើននាក់ ដែលមកពិនិត្យបញ្ជី​ឈ្មោះដោយយកចិត្តទុកដាក់ បេក្ខជនម្នាក់បានប្រាប់ទូរទស្សន៍​អប្សរាថា​ ពួកគេបានខិតខំរម្លឹកមេរៀននិងបានធ្វើលំហាត់ជារៀងរាល់ថ្ងៃ ព្រមទាំងបានត្រៀមលក្ខណៈរួចរាល់ហើយ​សម្រាប់ការប្រឡង​បាក់​ឌុបបេក្ខជនរូបនេះថែមទាំងជឿជាក់ថាពួកគេនឹងទទួលបាននូវលទ្ធផលល្អប្រសើរ។

តាមការបញ្ជាក់របស់លោក យី សុងគី ប្រធានមន្ទីរអប់រំ យុវជន និងកីឡាខេត្តបាត់ដំបង បានឱ្យដឹងថា​ សម្រាប់ការ​ប្រឡងសញ្ញា​បត្រមធ្យមសិក្សាទុតិយភូមិសម័យប្រឡង៖ថ៨ ខែតុលា ខេត្តបាត់​ដំបងមានមណ្ឌល​ប្រឡង១៤មណ្ឌល ស្មើនឹង៣៨៥​បន្ទប់ មាន​បេក្ខជនសរុបចំនួន ៩ ៥៥០នាក់ ។ឆ្នាំនេះ ចំនួនបេក្ខជនពិការ​ភាពមានការកើនឡើងច្រើនជាងឆ្នាំមុន។

លោក យី សុងគី បានបញ្ជាក់ទៀតថា សម្រាប់ការប្រឡងបាក់​ឌុបឆ្នាំនេះ មិនខុសពីឆ្នាំមុនៗនោះទេ ក្រសួងអប់រំ យុវជន និងកីឡា នៅតែរក្សាគោលការណ៍ទាំង៤ នៃការប្រឡង គឺគោលការណ៍ច្បាប់ យុត្តិធម៌ តម្លាភាព និងលទ្ធផល ទទួលយកបាន ។ពោលគឺ «អ្នកចេះជាប់»៕

អត្ថបទ-រូបភាព៖ អ៊ុក សំអាន បប.