ភ្នំពេញ៖ សមាគម-ក្លិបកីឡាសូហ្វតីន្នីសចំនួន០៧ មកពីទូទាំងប្រទេស រួមមាន៖ សមាគមក្រសួងមហាផ្ទៃ ក្រសួងការពារជាតិ ក្លិបខេត្តកណ្តាល ខេត្តកំពង់ឆ្នាំង
ខេត្តកំពង់ស្ពឺ ខេត្តត្បូងឃ្មុំ និងក្លឹបអង្គការកុមារអាស៊ី បានចូលរួមក្នុងការប្រកួតកីឡា​សូហ្វតិន្នីសជ្រើសរើសជើងឯកថ្នាក់ជាតិ លើកទី៨ ឆ្នាំ២០២៤។ ព្រឹត្តិការណ៍នេះ ទទួលបានការគាំទ្រថវិការពីក្រសួងអប់រំ យុវជន និងកីឡា និងបានដំណើរការប្រកួត រយៈពេល ០៥ថ្ងៃ គឺចាប់ពីទី០៧ ដល់ថ្ងៃទី១១ ខែតុលា ឆ្នាំ២០២៤ នៅទីលាន កីឡាសូហ្វតិន្នីសកម្ពុជា ក្នុងពហុកីឡដ្ឋានជាតិ។

វិញ្ញាសា ដែលត្រូវបានដាក់ឱ្យប្រកួតប្រជែង មានសរុបចំនួន ១២ ដូចជា៖ ១. ឯកត្តជនបុរស អក្សរ ក២. ឯកត្តជននារី អក្សរ ក៣. វាយគូបុរស អក្សរ ក៤. វាយគូបុរស អក្សរ ខ៥. វាយគូនារី អក្សរ ក៦. វាយគូនារី អក្សរ ខ ៧. វាយគូ ចម្រុះបុរស-នារី ៨. ឯកត្តជនយុវជន ក្រោម ១៥ឆ្នាំ៩. ឯកត្តជនយុវនារី ក្រោម ១៥ឆ្នាំ ១០. វាយគូយុវជន ក្រោម ១៥ឆ្នាំ ១១ក្រុមបុរស ១២ក្រុមនារី ។

សូមជម្រាបផងដែរថា គោលដំណងចំបង ក្នុងការរៀបចំការប្រកួតជ្រើសរើសជើង​ឯកថ្នាក់ជាតិ លើកទី៨ ប្រចាំឆ្នាំ២០២៤ គឺដើម្បីអនុវត្តតាមកម្មវិធីរបស់ក្រសួងអប់រំ យុវជន និងកីឡាដើម្បីជ្រើសរើសកីឡាករ កីឡាការិនី ដែលមានសមត្ថភាពបច្ចេក​ទេសខ្ពស់ សម្រាប់ប្រមូលផ្តុំហ្វឹកហាត់ត្រៀមទៅចូលរួមប្រកួតជា​លក្ខណៈអន្តរជាតិ​នានា ជាពិសេសបណ្តុះបណ្តាលធនធានថ្នាលបន្តវេនឲ្យបានច្រើន និងប្រកបដោយគុណភាព៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ