ពិធីផ្សព្វផ្សាយលើកកម្ពស់ការយល់ដឹងដល់ស្រ្តីមានកូនតូច និងស្រ្តីមានផ្ទៃពោះចំនួន ៦០នាក់ នៅមណ្ឌលសុខភាពពាមរក៍
(ព្រៃវែង)៖ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា និងជាអនុប្រធានក្រុមការងារឥស្សរជនឆ្នើមថ្នាក់ជាតិ និងឯកឧត្តម សុខ ផេង អនុប្រធានអចិន្រ្តៃយ៍គណៈកម្មាធិការសាខា និងជាអនុប្រធានក្រុមការងារឥស្សរជនឆ្នើមថ្នាក់ជាតិ នៃសាខាកាកបាទក្រហមកម្ពុជា ខេត្តព្រៃវែង បានអញ្ជើញជាអធិបតីក្នុងពិធីសំណេះសំណាល និងផ្សព្វផ្សាយលើកកម្ពស់ការយល់ដឹងស្តីពី «សហគមន៍មានសុខភាពល្អ និងមានភាពធន់នឹងអាកាសធាតុ» ជូនដល់ស្រ្តីជាមាតាចំនួន ៦០នាក់ (ក្នុងនោះស្រ្តីទើបសម្រាលកូនចំនួន ២១នាក់, ស្ត្រីមានផ្ទៃពោះចំនួន ៣៩នាក់) នៅមណ្ឌលសុខភាពពាមរក៍ ដែលស្ថិតក្នុងស្រុកពាមរក៍ ខេត្តព្រៃវែង នាថ្ងៃទី១៧ ខែតុលា ឆ្នាំ២០២៤ ។
ក្នុងឱកាសនោះ ស្ត្រីជាមាតាទាំងអស់ បានទទួលការផ្សព្វផ្សាយពីគ្រូពេទ្យនៃមណ្ឌលសុខភាពពាមរក៍ ដែលបានធ្វើបទបង្ហាញលើការយល់ដឹងអំពីសុខភាពមាតា ទារក និងកុមារ, អាហារូបត្ថម្ភ និងការបំបៅកូនដោយទឹកដោះម្តាយ។ ជាមួយគ្នាគ្នានេះ លោកបណ្ឌិត វ៉ា សុភ័ក្រ្ត លេខាធិការក្រុមការងារឥស្សរជនឆ្នើមថ្នាក់ជាតិ បានធ្វើបទបង្ហាញអំពីស្ថានភាពមេរោគអេដស៍/ជំងឺអេដស៍ និងលោកស្រីបណ្ឌិត អ៊ុក មាសសូលីណា នាយិកាសាខាកាកបាទក្រហមកម្ពុជា ខេត្តព្រៃវែង បានធ្វើបទបង្ហាញអំពីការពង្រឹងសហគមន៍ឱ្យមានភាពធន់នឹងអាកាសធាតុ។
ឯកឧត្តម សុខ ផេង បានគូសបញ្ជាក់ថា៖ «ក្នុងបេសកកម្មដើម្បីសុខភាពស្ត្រី កុមារ និងទារក ដោយមានការណែនាំតម្រង់ទិសពី សម្តេចកិត្តិព្រឹទ្ធបណ្ឌិតប្រធាន សាខាកាកបាទក្រហមកម្ពុជា ខេត្តព្រៃវែង បានសហការពេញទំហឹងជាមួយស្ថាប័នពាក់ព័ន្ធបំពេញតួនាទីយ៉ាងសកម្ម ក្នុងភាពម្ចាស់ការលើការផ្តល់សេវាកម្មមនុស្សធម៌, សេវាកម្មសុខភាព ដោយបានឆ្លើយតបទៅនឹងតម្រូវការជាក់ស្តែង នៃភាពងាយរងគ្រោះ ហើយសម្រេចបានលទ្ធផលគួរឱ្យកត់សម្គាល់ ក្នុងការជួយដល់ប្រជាជនងាយរងគ្រោះក្នុងមូលដ្ឋានបានទាន់ពេលវេលា និងមានប្រសិទ្ធភាព។»
ថ្លែងក្នុងឱកាសនោះ លោកជំទាវអគ្គលេខាធិការ ពុំ ចន្ទីនី បានពាំនាំនូវព្រះរាជបន្ទូលផ្តាំសួរសុខទុក្ខពី សម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា និងប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រីនិងកុមារ និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា ដែលផ្តាំផ្ញើសួរសុខទុក្ខ ក្តីនឹករលឹកចំពោះក្មួយៗស្ត្រីជាមាតាទាំងអស់។
ទន្ទឹមនឹងនេះ លោកជំទាវ បានថ្លែងនូវការកោតសរសើរចំពោះក្មួយៗទាំងអស់ដែលមានការយល់ដឹងខ្ពស់ អាចឆ្លើយសំណួរបានយ៉ាងត្រឹមត្រូវ ច្បាស់លាស់ពីសំណាក់វាគ្មិន ជាពិសេសមានការប្តេជ្ញាចិត្តខ្ពស់ក្នុងចូលរួមជួយធ្វើជាកម្លាំងចលករក្នុងការផ្សព្វផ្សាយបន្តពីចំណេះដឹងទាំងនេះ ដល់ក្រុមគ្រួសារ និងសហគមន៍របស់ខ្លួន។ លោកជំទាវ ក៏បានផ្តាំផ្ញើដល់ក្មួយៗទាំងអស់ត្រូវបន្តថែទាំសុខភាពទាំងផ្លូវកាយ និងសុខភាពផ្លូវចិត្ត, ហើយបុគ្គលម្នាក់ៗត្រូវទទួលខុសត្រូវលើសុខភាពខ្លួនឯង, សហគមន៍មួយក៏ត្រូវទទួលខុសត្រូវលើសុខភាពសាធារណៈរបស់សហគមន៍ខ្លួនឯងផងដែរ។
ស្ត្រីជាមាតាទាំងអស់ បានថ្លែងអំណរគុណយ៉ាងជ្រាលជ្រៅ និងមានការសប្បាយរីករាយជាខ្លាំងបន្ទាប់ពីបានទទួលការយល់ដឹងបន្ថែម ក៏ដូចជាការក្រើនរំលឹកសារអប់រំស្តីពីការថែទាំសុខភាពឱ្យបានល្អ ព្រមទាំងទទួលបានអំណោយជួយសម្រាលការលំបាកដោយក្នុងម្នាក់ៗទទួលបាន៖ អង្ករសុខភាព ៤កញ្ចប់, ឃីតអនាម័យ ១កញ្ចប់ និងថវិកាចំនួន ៥ម៉ឺនរៀល។
ក្រុមការងារ ក៏បានអញ្ជើញជួបសួរសុខទុក្ខដោយផ្ទាល់ ជាមួយគ្រួសាររងគ្រោះដោយសារជំងឺអេដស៍ចំនួន៥គ្រួសារ រស់នៅភូមិថ្មី, ភូមិចំការវែង និងភូមិបឹងក្អែក នៃឃុំពាមមានជ័យ ស្រុកពាមរក៍ ខេត្តព្រៃវែង ដែលក្នុងឱកាសនោះ លោកជំទាវ ពុំ ចន្ធីនី អគ្គលេខាធិការកាកបាទក្រហមកម្ពុជា និងជាអនុប្រធានគណៈកម្មាធិការក្រុមការងារឥស្សរជនឆ្នើមថ្នាក់ជាតិ បានក្រើនរំលឹកដល់អ្នកផ្ទុកមេរោគអេដស៍ទាំងអស់ សូមបន្តយកចិត្តទុកដាក់ព្យាបាលជំងឺឱកាសនិយមឱ្យបានត្រឹមត្រូវ និងបានទាន់ពេលវេលា, ត្រូវលេបឱសថប្រឆាំងមេរោគអេដស៍ ឱ្យបានត្រឹមត្រូវ ទៀងទាត់ និងជាប់លាប់, ត្រូវមានការយល់ដឹងអំពីរបបអាហារដែលញ៉ាំងឱ្យខ្លួនមានសុខភាពល្អ សំដៅបង្កើតនូវភាពសុខដុមរមនា នៅក្នុងក្រុមគ្រួសារ និងសហគមន៍ដោយគ្មានការរើសអើង ៕
ដោយ / គ្រី សម្បត្តិ