បទឧទ្ទេសនាមស្តីអំពី «ប្រវត្តិសាស្រ្ត ១០០ឆ្នាំ របស់គណបក្សកុម្មុយនីស្តចិន»
(ភ្នំពេញ)៖ ឯកឧត្តម ឈី ឈីងសាន (Qi Qingshan) សមាជិកគណៈកម្មាធិការមជ្ឈិម និងជាប្រធានវិទ្យាស្ថានប្រវត្តិសាស្រ្តបក្ស និងអក្សរសាស្រ្ត នៃគណៈកម្មាធិការមជ្ឈិមបក្សកុម្មុយនីស្តចិន បានអញ្ជើញធ្វើបទឧទ្ទេសនាមស្តីអំពី «ប្រវត្តិសាស្រ្ត ១០០ឆ្នាំ របស់គណបក្សកុម្មុយនីស្តចិន» មន្រ្តីជាន់ខ្ពស់នៃគណបក្សប្រជាជនកម្ពុជា នារសៀលថ្ងៃទី១៧ ខែតុលា ឆ្នាំ២០២៤ នៅវិមាន៧មករា ។
ឯកឧត្តមឧបនាយករដ្ឋមន្រ្តី សាយ សំអាល់ សមាជិកអចិន្រ្តៃយ៍ នៃគណៈកម្មធិការកណ្តាល គណបក្សប្រជាជនកម្ពុជា មានប្រសាសន៍ថា តាងនាមសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា សូមថ្លែងអំណរគុណយ៉ាងជ្រាលជ្រៅចំពោះគណបក្សកុម្មុយនីស្តចិន ដែលបានចាត់តាំងឯកឧត្តម ឈី ឈីងសាន និងសមាជិកគណៈប្រតិភូ មកធ្វើបទឧទ្ទេសនាមជូនដល់មន្ត្រីជាន់ខ្ពស់របស់គណបក្សប្រជាជនកម្ពុជា ដើម្បីចែករំលែកបទពិសោធន៍ល្អៗ និងគំរូវីរភាពរបស់ថ្នាក់ដឹកនាំគណបក្សកុម្មុយនីស្តចិនគ្រប់លំដាប់ថ្នាក់ ដែលបានធ្វើពលិកម្មគ្រប់បែបយ៉ាងដោយឈាម ទឹកភ្នែក និងប្រាជ្ញាស្មារតីដោយភាពឈ្លាសវៃ ជម្នះរាល់ឧបសគ្គរាប់មិនអស់ រហូតសម្រេចបានជោគជ័យយ៉ាងត្រចះត្រចង់ជូនជាតិមាតុភូមិរបស់ខ្លួន ឆ្លងចូលដល់សម័យកាលថ្មីនៃកំណែទម្រង់និងបើកចំហ និងការកសាងទំនើបកម្មសង្គមនិយម ដែលជាយុគសម័យថ្មីនៃសង្គមនិយមជាមួយលក្ខណៈពិសេសរបស់ចិន ដោយបានធ្វើឱ្យប្រទេសចិនក្លាយជាមហាអំណាចសេដ្ឋកិច្ចទី២លើពិភពលោក ព្រមទាំងកិត្យានុភាព និងតួនាទីរបស់ប្រទេសចិនកាន់តែត្រូវបានលើកកម្ពស់លើឆាកអន្តរជាតិ។
ឯកឧត្តមឧបនាយករដ្ឋមន្រ្តី សូមសម្តែងនូវអំណរគុណដល់គណបក្សកុម្មុយនីស្តចិន និងប្រជាជនចិន ចំពោះការអនុវត្តស្មារតីនៃកិច្ចសហប្រតិបត្តិការរវាងប្រទេសយើងទាំងពីរ ដោយបានគំាទ្រដល់ការអភិវឌ្ឍរបស់ប្រទេសកម្ពុជា ស្របទៅតាមលក្ខណៈសម្បត្តិរបស់កម្ពុជា ឱ្យសម្រេចបានលទ្ធផល គួជាទីមោទនៈលើគ្រប់វិស័យ ដែលឆ្នាំ២០២៤នេះ ជាខួបទី៦៦នៃការបង្កើតទំនាក់ទំនងការទូតរវាង កម្ពុជានិងចិន ។
ក្នុងក្របខ័ណ្ឌទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយ មិត្តភាពដែកថែប និងកិច្ចសហប្រតិបត្តិការត្បូងពេជ្ររវាងគណបក្សនិងប្រជាជនយើង ប្រទេសយើងទាំងពីរដែលមានប្រវត្តិនៃការតស៊ូរំដោះប្រទេស បានគោរពនិងគាំទ្រគ្នាទៅវិញទៅមកចំពោះជម្រើសនៃមាគ៌ាអភិវឌ្ឍន៍ដែលស្របនឹងលក្ខខណ្ឌជាតិរៀងៗខ្លួន ដែលនេះបានបង្ហាញអំពីទំនាក់ទំនងការទូតគំរូផងដែរ។ កម្ពុជា-ចិនគឺជាមិត្តដ៏ធំបំផុត ជាដៃគូ និងជាអ្នកគាំទ្រដ៏គួរទុកចិត្តជាទីបំផុត ។ ហើយជាការពិតណាស់កម្ពុជា ពិតជានឹងមិនអាចអភិវឌ្ឍ និងពង្រឹងខ្លួនមកដល់កម្រិតដូចសព្វថ្ងៃនេះទេ បើប្រសិនគ្មានការគាំទ្រពីមិត្តចិន។
ឯកឧត្តមឧបនាយករដ្ឋមន្រ្តី សាយ សំអាល់ មានប្រសាសន៍បន្ថែមថា កម្ពុជាប្រកាន់ខ្ជាប់នូវពហុភាគីនិយមពិតប្រាកដ ហើយកម្ពុជាបន្តប្រកាន់ខ្ជាប់នូវ «គោលនយោបាយចិនមួយ» ដោយចាត់ទុកបញ្ហាពាក់ព័ន្ធនឹងហុងកុង ទីបេ តៃវ៉ាន់ និងស៊ីនជាំង ជាកិច្ចការផ្ទៃក្នុងរបស់ចិន និងប្រឆាំងរាល់ការជ្រៀតជ្រែកពីខាងក្រៅមកលើកិច្ចការផ្ទៃក្នុងរបស់ចិន ព្រមទាំងបន្តគាំទ្រគំនិតផ្តួចផ្តើមនានារបស់ចិនរួមមាន៖ គំនិតផ្ដួចផ្ដើមខ្សែក្រវ៉ាត់និងផ្លូវ គំនិត ផ្ដួចផ្ដើមអភិវឌ្ឍន៍សកល គំនិតផ្ដួចផ្ដើមសន្តិសុខសកល និងគំនិតផ្ដួចផ្ដើមអរិយធម៌សកល ជាដើម។
បទឧទ្ទេសនាមនាថ្ងៃនេះ គឺជាការឆ្លុះបញ្ចាំងអំពីទំនាក់ទំនងប្រកបដោយអត្ថន័យ រវាងគណបក្សនិងគណបក្ស ក៏ដូចជារវាងប្រជាជននិងប្រជាជននៃប្រទេសយើងទាំងពីរ ដើម្បីជាគុណប្រយោជន៍សម្រាប់ការអភិវឌ្ឍសមត្ថភាពផង ក៏ដូចការយកទៅច្នៃប្រឌិតសម្រាប់អនុវត្តឱ្យបានសមស្របទៅតាមស្ថានភាពជាក់ស្តែងរបស់កម្ពុជាយើងផង ។
ក្នុងឱកាសនោះ ឯកឧត្តម ឈី ឈីងសាន មានប្រសាសន៍ថា ប្រវត្តិសាស្ត្រជាង ១០០ឆ្នាំនៃបក្សកុម្មុយនីស្តចិន អាចបែងចែកជាសម័យកាលប្រវត្តិសាស្ត្របួនគឺ ៖ ចាប់ពីការបង្កើតឡើងនៃបក្សកុម្មុយនីស្តចិននៅខែកក្កដា ឆ្នាំ១៩២១ ដល់ការបង្កើតឡើងនៃសាធារណរដ្ឋប្រជាមានិតចិននៅខែតុលា ឆ្នាំ១៩៤៩ នេះជាសម័យកាលនៃបដិវត្តន៍ប្រជាធិបតេយ្យបែបថ្មី ចាប់ពីខែតុលា ឆ្នាំ១៩៤៩ ដល់ ឆ្នាំ១៩៧៨ ដែលបានរៀបចំធ្វើការប្រជុំពេញអង្គលើកទី៣ អាណត្តិទី១១ នៃបក្សកុម្មុយនីស្តចិន នេះជាសម័យកាលនៃបដិវត្តន៍ និងការកសាងសង្គមនិយម ចាប់ពីខែធ្នូ ឆ្នាំ១៩៧៨ ដល់ខែវិច្ឆិកា ឆ្នាំ២០១២ ដែលបានប្រារព្ធឡើងមហាសន្និបាតលើកទី១៨នៃបក្សកុម្មុយនិស្តចិន នេះជាសម័យកាលថ្មីនៃ កំណែទម្រង់និងបើកចំហរ និងការកសាងទំនើបកម្មសង្គមនិយម ចាប់ពីខែវិច្ឆិកាឆ្នាំ២០១២ ដល់ថ្ងៃនេះ ជាយុគសម័យថ្មីនៃសង្គមនិយមជាមួយលក្ខណៈពិសេសចិន ។ ក្នុងអំឡុងពេល ប្រវត្តិសាស្ត្រទាំងបួននេះ បក្សកុម្មុយនីស្តចិនបានបញ្ចប់ និងជំរុញព្រឹត្តិការណ៍ធំៗចំនួនបួន ។ ព្រឹត្តិការណ៍សំខាន់ៗចំនួនបួនបានរួមចំណែកដល់ភាពរុងរឿងអស់រយៈពេល ១០០ឆ្នាំ នៃបក្សកុម្មុយនីស្តចិន ៕
ដោយ ៖ គ្រី សម្បត្តិ
