បរទេស៖ ប្រមុខយោធាអ៊ីស្រាអែលបានប្តេជ្ញា កាលពីថ្ងៃអង្គារថា នឹងវាយប្រហារអ៊ីរ៉ង់ «យ៉ាងខ្លាំង» ប្រសិនបើអ៊ីរ៉ង់ ហ៊ានសងសឹកអ៊ីស្រាអែល ចំពោះការវាយប្រហាររបស់ខ្លួន លើសាធារណរដ្ឋអ៊ីស្លាមមួយនេះ កាលពីចុងសប្តាហ៍។

ឧត្តមសេនីយ Herzi Halevi បាននិយាយថា «ប្រសិនបើអ៊ីរ៉ង់ សាងកំហុស ក្នុងការបាញ់កាំជ្រួចមីស៊ីល ជាថ្មីផ្សេងទៀត មកលើអ៊ីស្រាអែល យើងនឹងដឹងម្តងទៀត ពីរបៀបសងទៅដល់ប្រទេសអ៊ីរ៉ង់វិញ…ហើយជាការវាយប្រហារ យ៉ាងខ្លាំង» ។

ថ្លែងទៅកាន់មន្ត្រីយោធាដែលបានចូលរួម ក្នុងការវាយប្រហារ កាលពីចុងសប្តាហ៍ លោក Halevi បាននិយាយថា «គោលដៅមួយចំនួនទៀត ប្រហែលជាត្រូវបានកំណត់ តម្រូវឱ្យធ្វើម្តងទៀត»។ លោកបានមានប្រសាសន៍ថា «ព្រឹត្តិការណ៍នេះ មិនទាន់ចប់ទេ»។

កាលពីថ្ងៃសៅរ៍ យន្តហោះចម្បាំងអ៊ីស្រាអែលបានវាយប្រហារតាមអាកាស ទាំងព្រលឹម លើគោលដៅយោធាអ៊ីរ៉ង់ និងកន្លែងផលិតមីស៊ីល ជាការសងសឹក ចំពោះការវាយប្រហារមីស៊ីលផ្លោងដ៏ធំ ដោយទីក្រុងតេអេរ៉ង់ កាលពីដើមខែនេះ។ ការវាយប្រហាររបស់អ៊ីរ៉ង់ លើកនេះ រួមមាន កាំជ្រួចប្រហែល២០០គ្រាប់ ដែលជាការសងសឹកចំពោះការសម្លាប់មេដឹកនាំក្រុមសកម្មប្រយុទ្ធ ជាច្រើននាក់ដែលចូលបក្សសម្ព័ន្ធ Tehran រួមទាំង ប្រធានក្រុម Hezbollah លោក Hassan Nasrallah និង មេបញ្ជាការឆ្មាំបដិវត្តន៍ម្នាក់ ទៀតផង។

អ៊ីរ៉ង់ប្រកាសសងសឹកវិញ ចំពោះការវាយប្រហាររបស់អ៊ីស្រាអែល កាលពីចុងសប្តាហ៍មុន ប៉ុន្តែ ពុំទាន់មានការវាយប្រហារជាថ្មី លើអ៊ីស្រាអែល ទេ រហូតដល់យប់ថ្ងៃអង្គារ។ ប៉ុន្តែ មេដឹកនាំអ៊ីរ៉ង់ធ្លាប់ប្រកាសថា នឹងសងសឹកវិញ៕

ប្រភពពី AFP ប្រែសម្រួល៖ សារ៉ាត