សៀមរាប៖ ក្រសួងទេសចរណ៍សហការជាមួយស្ថានទូតឥណ្ឌាប្រចាំ​ព្រះរាជាណាចក្រកម្ពុជាកាលពីព្រឹកថ្ងៃទី៣១ខែតុលា ឆ្នាំ២០២៤ បានរៀបចំវេទិកាទេសចរណ៍កម្ពុជា-ឥណ្ឌា ឆ្នាំ២០២៤នៅសណ្ឋាគារ​បុរីអង្គរខេត្តសៀមរាបក្រោមអធិបតីភាពឯកឧត្តម ហួត ហាក់ រដ្ឋមន្រ្តី​ក្រសួង ទេសចរណ៍ លោក ឌី រ៉ាដូ អភិបាលរងខេត្តតំណាងឯកឧត្តម ប្រាក់ សោភ័ណ អភិបាលខេត្តសៀមរាប លោក វីជ័យ សានកា ប្រាសាទ​(Vijay Shankar Pradsad) លេខាទី២ នៃស្ថានទូត​ឥណ្ឌាប្រចាំកម្ពុជា។

វេទិកាទេសចរណ៍កម្ពុជា-ឥណ្ឌាឆ្នាំ២០២៤ប្រព្រឹត្តទៅក្រោម​ប្រធាន​បទ”សក្តានុពលនៃទីផ្សារទេសចរណ៍ឥណ្ឌាសម្រាប់វិស័យទេសចរណ៍កម្ពុជា៖ កាលានុវត្តភាពនិងការត្រៀមលក្ខណៈសម្បត្តិ”ដោយ​រៀបចំឡើងក្នុងគោលបំណងចូលរួមលើក កម្ពស់និងផ្លាស់ប្តូរវប្ប​ធម៌​ពិសេសពង្រឹងកិច្ចសហប្រតិបត្តិការទេសចរណ៍ទ្វេភាគីកម្ពុជា-ឥណ្ឌា​ជំរុញលំហូរ ទេសចរ និងទាក់ទាញវិនិយោគិនឥណ្ឌាលើវិស័យទេស​ចរណ៍​​នៅកម្ពុជា និងចូលរួមជំរុញយុទ្ធនាការ “ឆ្នាំទេសចរណ៍ កម្ពុជា-ឥណ្ឌាលើកទី១ ឆ្នាំ២០២៤ និងទស្សនាសៀមរាប ឆ្នាំ២០២៤” ។

បើតាមការបញ្ជាក់របស់ឯកឧត្តម ហួត ហាក់ រដ្ឋមន្រ្តីក្រសួង​ទេសចរណ៍ វេទិកាទេសចរណ៍កម្ពុជា-ឥណ្ឌា ឆ្នាំ២០២៤ ដែល កំពុងប្រារព្ធនេះនៅក្រោមក្របខ័ណ្ឌនៃយុទ្ធនាការ «ឆ្នាំទេសចរណ៍ កម្ពុជា-ឥណ្ឌា លើកទី១ ២០២៤»ដែលត្រូវបានប្រកាស បើកជា​ផ្លូវការកាលពីថ្ងៃទី១៧ ខែមិថុនា ឆ្នាំ២០២៤ នៅទីក្រុង​ញូដេលី សាធារណរដ្ឋឥណ្ឌាស្របជាមួយការបើកជើងហោះហើរ ត្រង់ជា​ប្រវត្តិសាស្ត្រ រវាងប្រទេសទាំងពីរដោយក្រុមហ៊ុនអាកាសចរណ៍ជាតិ កម្ពុជាអង្គរ អ៊ែរនិងការភ្ជាប់ជើងហោះហើររបស់ក្រុមហ៊ុន អាកាស​ចរណ៍​ឥណ្ឌា Indigo រវាងទីក្រុងញូដេលី-ភ្នំពេញ និងទីក្រុង​កុលកាតា-សៀមរាប នាខែកុម្ភៈ ឆ្នាំ២០២៥ ខាងមុខ។

តាមរយៈវេទិកាទេសចរណ៍ដំបូងនេះដែរឯកឧត្តមរដ្ឋមន្រ្តីក្រសួងទេសចរណ៍បានអំពាវនាវថា “សូមចូលរួមទាំងអស់គ្នាជាមួយ
ក្រសួង​ទេសចរណ៍ ក្នុងយុទ្ធនាការ៖ ម្នាក់ៗ ជាអ្នកផ្សព្វផ្សាយ​ទេសចរណ៍កម្ពុជា-ឥណ្ឌា ម្នាក់!, ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍!៕

ដោយ៖ប៊ុន រដ្ឋា