សៀមរាប៖ក្រសួងទេសចរណ៍បានរៀបចំកិច្ចប្រជុំក្រុមការងា​ររួម​ស្តីពីកិច្ចសហប្រតិបត្តិការទេសចរណ៍កម្ពុជា-ឡាវ លើកទី៣ និង​វេទិកាជំនួបរវាងផ្នែកឯកជនកម្ពុជា-ឡាវ ក្រោមអធិបតីភាព​ឯកឧត្តម​បណ្ឌិត ថុក សុខុម រដ្ឋលេខាធិការក្រសួងទេសចរណ៍ តំណាង​ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ លោក អ៊ឺង គឹមលៀង អភិបាលរងខេត្តសៀមរាប និងលោក ភូធូន ដាឡាឡម​(Phouthone Dalalom) អគ្គនាយករងទីផ្សារទេសចរណ៍ ប្រធានប្រតិភូក្រសួង​ព័ត៌មាន វប្បធម៌និងទេសចរណ៍ ឡាវដោយមានអ្នកចូលរួម ពីអន្តរ​ក្រសួង ស្ថាប័ន និងផ្នែកឯកជននៃប្រទេសទាំងពីរប្រមាណ​១០០រូប។

វេទិកាជំនួបរវាងផ្នែកឯកជនកម្ពុជា-ឡាវ (Cambodia-Lao PDR Tourism Business-to-Business (B2B) Forum) ដែលរៀប​ចំឡើងកាលពីថ្ងៃទី៣០ ខែតុលា ក្នុងគោលបំណងជំរុញទំនាក់ទំនង និងការតភ្ជាប់រវាងផ្នែកឯកជននិងផ្នែក ជននៃប្រទេសទាំងពីរ​ក្រោម​ស្មារតី នៃផែនការសកម្មភាពរួម ស្តីពីកិច្ចសហប្រតិបត្តិកា​រទេសចរណ៍​កម្ពុជា-ឡាវ ២០២៣-២០២៤។

កិច្ចប្រជុំបានអនុម័តលើកំណត់ហេតុកិច្ចប្រជុំក្រុមការងាររួមស្តីពីកិច្ចសហប្រតិបត្តិការទេសចរណ៍កម្ពុជា-ឡាវ លើកទី៣ និងផែនការ​សកម្មភាពរួម ស្តីពីកិច្ចសហប្រតិបត្តិការកម្ពុជា-ឡាវ ២០២៥-​២០២៦ ដោយផ្តោតលើសកម្មភាពសំខាន់ៗ ចំនួន ១៥ ក្រោមចំណុច​កិច្ចសហប្រតិបត្តិការចំនួនបួន រួមមាន៖ ១. កិច្ចសហប្រតិបត្តិការ​លើការសម្រួលការធ្វើដំណើរ និងការឆ្លងកាត់ព្រំដែន ២. ការអភិវឌ្ឍ​ធនធានមនុស្សក្នុងវិស័យទេសចរណ៍រួម ៣. ការផ្សព្វផ្សាយ និងទីផ្សារ​ទេសចរណ៍រួម និង ៤. ការតភ្ជាប់ និងអភិវឌ្ឍន៍ផលិតផល​ទេស​ចរណ៍៕
ដោយ៖​ប៊ុន​រដ្ឋា