(ភ្នំពេញ)៖ សហភាពសហព័ន្ធយុវជនកម្ពុជា សហការជាមួយក្រុមកីឡាករ​បាល់ទាត់ខេមបូឌាហ្វូតបលសូពើស្ដារ (Cambodia Football Super Stars — CFSS) បានជួបជុំគ្នាជាលើកដំបូង ដើម្បីរៀបចំព្រឹត្តិការណ៍អស្ចារ្យ គឺការប្រកួតបាល់​ទាត់ដ៏ធំមួយ នៅចុងខែធ្នូ ឆ្នាំ២០២៤ ខាងមុខនេះ ក្នុងពហុកីឡដ្ឋានមរតកតេជោ ដើម្បីអបអរទិវាសន្តិភាព លើកទី១ នៅកម្ពុជា និងការសម្តែងសិល្បៈ ព្រមទាំងអនុញ្ញាតឲ្យមហាជន ចូលរួមទស្សនាគាំទ្រផងដែរ ។

ព្រឹត្តិការណ៍ប្រកួតបាល់ទាត់ដ៏ធំនេះ ត្រូវបានបង្ហាញឱ្យដឹង ក្នុងឱកាសដែលឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានទទួលជួបជាមួយគណៈ​ប្រតិ​ភូ​ក្រុមកីឡាករបាល់ទាត់ខេម បូឌាហ្វូតបលសូពើស្ដារ (Cambodia Football Super Stars — CFSS) ដឹកនាំដោយឯកឧត្តម ឃួង ស្រេង ប្រធានចាត់ការទូទៅ​កិត្តិ​យស និងជាជំនួយការគ្រូបង្វឹកកិត្តិយស CFSS កាលពីរសៀលថ្ងៃទី៣១ ខែតុលា ។

នៅក្នុងជំនួបនេះ ឯកឧត្តម ហ៊ុន ម៉ានី បានស្វាគមន៍ដល់គណៈប្រតិភូក្រុមបាល់ទាត់ CFSS ដែលនេះ ជាជំនួបលើកដំបូងរវាងក្រុមទាំងពីរ ក្នុងការជួបពិភាក្សាលើការងារ​ចាំបាច់មួយចំនួន ដើម្បីត្រៀមលក្ខណៈរៀងខ្លួន ឆ្ពោះទៅកាន់ការប្រកួតនាពេល​ខាងមុខ។

ឯកឧត្តម ក៏បានលើកឡើងផងដែរថា ក្រុមកីឡាករទាំងសងខាង ត្រូវត្រៀមលក្ខណៈ​សម្បត្តិឱ្យបានពេញលេញ ដើម្បីធ្វើយ៉ាងណា ឱ្យការប្រកួត មានភាពភាពស្វិតស្វាញ ស្វាហាប់ ក្នុងស្មារតីកីឡា និងមិត្តភាព ដែលនឹងធ្វើឱ្យអ្នកគាំទ្រទទួលបាននូវបរិយា​កាស​​សប្បាយរីករាយនៃការជួបជុំផង និងទទួលបានភាពជក់ចិត្តក្នុងការ​ប្រកួត​ផងដែរ ។

ឯកឧត្តម ឃួង ស្រេង បានរៀបរាប់អំពីបុព្វហេតុ និងគំនិតផ្តួចផ្តើមរបស់សម្តេចតេជោ ហ៊ុន សែន គ្រូបង្វឹកកិត្តិយសក្រុមCFSS ក្នុងការរៀបចំការប្រកួតបាល់ទាត់​ដ៏ធំអស្ចារ្យ​មួយ ដើម្បីចូលរួមអបអរសាទរ ទិវាសន្តិភាពនៅកម្ពុជា លើកដំបូង នៅថ្ងៃទី២៩ ខែធ្នូ ឆ្នាំ២០២៤ ។

ឯកឧត្តមក៏បានរាយការណ៍ជូនអង្គប្រជុំផងដែរថា ការប្រកួតខាងមុខនេះ នឹងទទួលបានកិត្តិយសដ៏ខ្ពង់ខ្ពស់ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្តកម្ពុជា នឹងអញ្ជើញជាអធិបតី ក្នុងការទស្សនាការប្រកួតនេះ ។

ជុំវិញព្រឹត្តិការណ៍បាល់ទាត់រវាងក្រុមបាល់ទាត់សហភាពសហព័ន្ធយុវជនកម្ពុជា និងក្រុមបាល់ទាត់ខេមបូឌាហ្វូតបលសូពើស្ដារ ដែលនឹងប្រព្រឹត្តទៅនៅថ្ងៃទី២៩ ខែធ្នូ ឆ្នាំ២០២៤ ពេលខាងមុខ នៅពហុកីឡដ្ឋានជាតិ មរតកតេជោ លោក ខេម ប្រធានក្រុមកីឡាករបាល់ទាត់ខេមបូឌាហ្វូតបលសូពើស្ដារ (Cambodia Football Super Stars — CFSS) បានប្តេជ្ញាចិត្ត ដណ្តើមជ័យលាភី ក្នុងការប្រកួតបាល់ទាត់មិត្តភាព អបអរទិវាសន្តិភាពនៅកម្ពុជា ។

លោក ខេម បន្តថា នៅក្នុងការប្រកួតនាពេលខាងមុខនេះ មានកីឡាករចំនួន ៤ក្រុម ក្នុងនោះមានមកពីក្រុមកីឡាករបាល់ទាត់ខេមបូឌាហ្វូតបលសូពើស្ដារ ឈុត A និងឈុត B, ក្រុមកីឡាករសហភាពសហព័ន្ធយុវជនកម្ពុជា និងក្រុមកីឡាករគុនខ្មែរ ដោយជាការប្រកួតដណ្តើមយកជ័យលាភីតាមក្រុមនីមួយៗ ។

ចំណែកកគ្រូបង្វឹកនៃក្រុមបាល់ទាត់សហភាពសហព័ន្ធយុវជនកម្ពុជា បានបញ្ជាក់ថា ៖ លោកនឹងធ្វើការបង្វឹកកីឡាករត្រៀមចូលរួមប្រកួតនៅពេលខាងមុខ ដើម្បីទទួល​បានជ័យលាភី ព្រមទាំងអបអរសាទរទិវាសន្តិភាពនៅកម្ពុជា ៕

អត្ថបទ ៖ វណ្ណលុក
រូបភាព ៖ គ្រី សម្បត្តិ