បរទេស៖ បេក្ខជនប្រធានាធិបតីអាមេរិក តំណាងគណបក្សសាធារណរដ្ឋ លោក ដូណាល់ ត្រាំ ថ្មីៗនេះ បានធ្វើសន្និសីទសារព័ត៌មាន ចេញពីក្នុងរថយន្តដឹកសំរាម១គ្រឿង ផ្លែផ្កាដល់ លោក បៃឌិន ដែលទើបបានថ្លែងថា អ្នកគាំទ្រ លោកត្រាំ ជាសំរាម។

ថ្លែងប្រតិកម្មចំពោះការលើកឡើងមួយ ដែលថាតំបន់ Puerto Rico ប្រៀបដូចជា ដែនកោះពោរពេញ ទៅដោយសំរាម អណ្តែតព្រោងព្រាត លោក បៃដិន បាននិយាយយ៉ាងដូច្នេះថា «សំរាមដែលខ្ញុំមើលឃើញ កំពុងអណ្តែតនោះ គឺមានតែអ្នកគាំទ្រលោក ត្រាំ ប៉ុណ្ណោះ»។

ភ្លាមៗ ខាងសេតវិមាន បានចេញមុខបកស្រាយថា លោកប្រធានាធិបតីអាមេរិក មិនមែនចង់សំដៅលើ អ្នកគាំទ្របក្សសាធារណរដ្ឋឡើយ ប៉ុន្តែ ទៅលើវោហារសាស្រ្តរបស់លោក ត្រាំ តែប៉ុណ្ណោះ។

ប៉ុន្តែ ការអត្ថាធិប្បាយរបស់លោក បៃដិន បានផ្តល់ជាឱកាសមួយ សម្រាប់យុទ្ធនាការឃោសនា របស់លោក ដូណាល់ ត្រាំ។ កាលពីថ្ងៃពុធ លោក ត្រាំ បានពាក់អាវកាក់ ជាបុគ្គលិកអនាម័យ និងបានឡើងជិះរថយន្តដឹកសំរាមមួយគ្រឿង នៅឯព្រលានយន្តហោះក្នុងរដ្ឋ Wisconsin ហើយបានឆ្លើយសំណួរអ្នកកាសែត ពេលកំពុងអង្គុយនៅក្នុងនោះ។

អតីតប្រធានាធិបតីអាមេរិករូបនេះ បានលើកឡើងដូច្នេះថា «អ្នកមិនអាចធ្វើជាប្រធានាធិបតីបានទេ ប្រសិនបើអ្នកស្អប់ខ្ពើម ប្រជាជនអាមេរិក»៕

ប្រភពពី AFP ប្រែសម្រួល៖ សារ៉ាត