ក្រសួងអប់រំរៀបចំប្រកួតប្រជែងស្នាដៃយុវជនសតវត្សរ៍ទី២១ ឆ្នាំ២០២៤ក្រោមប្រធានបទ”STEM ក្នុងវិស័យថាមពលបៃតង”
សៀមរាប៖នៅមជ្ឈមណ្ឌលជាតិយុវជនកម្ពុជាខេត្តសៀមរាបកាលពីចុងសប្ដាហ៍កន្លងទៅក្រសួងអប់រំ យុវជន និងកីឡា បានរៀបចំកម្មវិធីប្រកួតប្រជែងស្នាដៃយុវជនសតវត្សរ៍ទី២១ឆ្នាំ២០២៤ក្រោមប្រធានបទ”STEM ក្នុងវិស័យថាមពលបៃតង” ដោយមានការអញ្ជើញចូលរួមពីលោក ម៉ិល ផនសីហា ប្រធាននាយកដ្ឋានអប់រំយុវជន និងកុមារនៃក្រសួងអប់រំ យុវជន និងកីឡាព្រមទាំងលោក លោកស្រីតំណាងមន្ទីរអប់រំយុវជនរាជធានី ខេត្តជាច្រើនរូប។
កម្មវិធីនេះមានបេក្ខជនប្រកួតប្រជែងចំនួន២៥ក្រុមដែលជាសិស្សមកពីវិទ្យាល័យនានាដែលបានជ្រើសរើសមកចូលរួមប្រកួតទាំង២៥រាជធានី ខេត្ត។លោក ម៉ិល ផនសីហា បាននិយាយថា កម្មវិធីប្រកួតប្រជែងស្នាដៃយុវជនសតវត្សរ៍ទី២១ឆ្នាំ២០២៤នាពេលនេះមានគោលបំណងដូចជា អភិវឌ្ឍសមត្ថភាពយុវជនកម្ពុជា លើជំនាញសរសេរគម្រោងស្នាដៃ និងហ៊ានចូលរួម ប្រកួតប្រជែងដណ្តើមជ័យលាភី,បណ្តុះស្មារតីយុវជនឱ្យចេះទទួលខុសត្រូវមានសេចក្តីក្លាហានចូលរួមចំណែកនិងទទួលយកបទពិសោធថ្មីៗ, បង្កើនការយកចិត្តទុកដាក់ក្នុងការសិក្សា (STEM) និងមាន គំនិតផ្តួចផ្តើមច្នៃប្រឌិត និងនវានុវត្តន៍,បង្កើតទម្លាប់ប្រើប្រាស់ថាមពលកកើតឡើងវិញប្រកបដោយស្មារតីទទួលខុសត្រូវ និង សន្សំសំចៃ ដើម្បីចីរភាពបរិស្ថានសារសំខាន់នៃថាមពលបៃតង។
លោកបន្តថាក្នុងនាមយុវជនសតវត្សរ៍ទី២១ ត្រូវមានសមត្ថភាព មានទំនុកចិត្ត ភាពក្លាហាន ស្មារតីសាមគ្គីភាព ក្នុងកិច្ចការ ស្រាវជ្រាវនូវអ្វីដែលថ្មី និងបង្កើតស្នាដៃថ្មីសម្រាប់ជាប្រយោជន៍ដល់សង្គមជាតិ៕
ដោយ៖ប៊ុនរដ្ឋា
