កម្ពុជា ចូលរួមក្នុងសន្និសីទថ្នាក់តំបន់ លើកទី២ នៃសាកលវិទ្យាធិការគ្រឹះស្ថានឧត្តមសិក្សា ជាសមាជិកទីភ្នាក់ឧត្តមសិក្សាប្រើប្រាស់ភាសាបារាំង ប្រចាំតំបន់អាស៊ី-ប៉ាស៊ីហ្វិក
(ភ្នំពេញ)៖ ឯកឧត្តម លីម ប៊ុនហុក រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ ជាអ្នកសម្របសម្រួលជាតិកម្ពុជា អមអង្គការអន្តរជាតិហ្រ្វង់កូហ្វូនី និងជាតំណាងរបស់ ឯកឧត្តមឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីការបរទេស និងសហប្រតិបត្តិការអន្តរជាតិ នៅថ្ងៃទី៥ ខែវិច្ឆិកា ឆ្នាំ២០២៤ បានអញ្ជើញចូលរួម ក្នុងសន្និសីទថ្នាក់តំបន់លើកទី២ នៃសាកលវិទ្យាធិការគ្រឹះស្ថានឧត្តមសិក្សាជាសមាជិកទីភ្នាក់ឧត្តមសិក្សាប្រើប្រាស់ភាសាបារាំង ប្រចាំតំបន់អាស៊ី-ប៉ាស៊ីហ្វិក (C2R-AP) ដែលបានប្រព្រឹត្តទៅនៅសាកលវិទ្យាល័យវេជ្ជសាស្ត្រ Pham Ngoc Thach ទីក្រុងហូជីមិញ ប្រទេសវៀតណាម។
នៅក្នុងឱកាសនៃសន្និសីទនេះ ឯកឧត្តម លីម ប៊ុនហុក ក៏បានជួបពិភាក្សាការងារជាមួយ ឯកឧត្តម HOANG Minh Son អនុរដ្ឋមន្ត្រីក្រសួងអប់រំ និងបណ្តុះបណ្តាលវៀតណាម និងលោកសាស្ត្រាចារ្យ Slim KHALBOUS សាកលវិទ្យាធិការ AUF ដោយផ្តោតកិច្ចពិភាក្សាបានលើកិច្ចសហប្រតិបត្តិការបច្ចុប្បន្ន និងនាពេលអនាគត ជាពិសេសគឺការស្វែងរកកាលានុវត្តភាពក្នុងការចូលរួមសហការ ដើម្បីរៀបចំកិច្ចប្រជុំកំពូលហ្រ្វង់កូហ្វូនីលើកទី២០ ឆ្នាំ២០២៦ នៅប្រទេសកម្ពុជា ៕
ដោយ ៖ សួង ពិសិដ្ឋ
