ឯកឧត្តម ហួត ហាក់ បានដឹកនាំសម្របសម្រួល ដោះស្រាយវិវាទ រវាងតំណាងគ្រួសាររងគ្រោះចំនួន ៨២គ្រួសារ និង ភ្នាក់ងារទេសចរណ៍ សកុណា ត្រាវែល
(ភ្នំពេញ)៖ នាព្រឹកថ្ងៃទី១៨ ខែវិច្ឆិកា ឆ្នាំ២០២៤ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានដឹកនាំកិច្ចប្រជុំសម្របសម្រួល ដោះស្រាយវិវាទរវាងភ្នាក់ងារទេសចរណ៍ សកុណា ត្រាវែល (ខេមបូឌា) ឯ.ក និងតំណាងអតិថិជនដែលជាជនរងគ្រោះ ចំនួន ៨២គ្រួសារ នៅទីស្តីការក្រសួង ដោយមានការអញ្ជើញចូលរួមពីថ្នាក់ដឹកនាំក្រសួងទេសចរណ៍ តំណាងអគ្គនាយកដ្ឋាន អគ្គាធិការដ្ឋាន ប្រធានសមាគមទេសចរណ៍កម្ពុជា មេធាវីតំណាងភ្នាក់ងារទេសចរណ៍ សកុណា ត្រាវែល (ខេមបូឌា) ឯ.ក និងតំណាង គ្រួសាររងគ្រោះ ។
ដើម្បីធានាបាននូវបរិយាកាសសុខដុមរមនា និងយុត្តិធម៌ក្នុងសង្គមជាតិ ក៏ដូចជាចូលរួមជាមួយរាជរដ្ឋាភិបាលក្នុងការជំរុញការដោះស្រាយវិវាទក្រៅប្រព័ន្ធតុលាការ ស្របតាមអនុសាសន៍ដ៏ខ្ពង់ខ្ពស់ និងក្រោមការដឹកនាំដ៏ត្រឹមត្រូវរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងដើម្បីឆ្លើយតបនឹងសំណូមពរដែលមាននៅក្នុងលិខិតស្នើសុំអន្តរាគមន៍របស់តំណាងប្រជាពលរដ្ឋរងគ្រោះ ពាក់ព័ន្ធនឹងករណីវិវាទខាងលើ ដោយឈរលើយុទ្ធសាស្ត្រ ឈ្នះ-ឈ្នះ ក្រោមការសម្របសម្រួល របស់ ឯកឧត្តមរដ្ឋមន្ត្រី ហួត ហាក់ ជាលទ្ធផលភាគីជនរងគ្រោះ និងតំណាងភាគីភ្នាក់ងារទេសចរណ៍ សកុណា ត្រាវែល បានឯកភាព និងព្រមព្រៀងដូចខាងក្រោម៖
១. បង្កើតក្រុមការងារចំពោះកិច្ចមួយដែលមានសមាសភាពត្រីភាគី (តំណាងក្រសួងទេសចរណ៍ តំណាង ភ្នាក់ងារទេសចរណ៍ សកុណា ត្រាវែល និងតំណាងប្រជាពលរដ្ឋរងគ្រោះ)។
២. ពិនិត្យលទ្ធភាពរៀបចំសេចក្តីព្រាងកិច្ចព្រមព្រៀងសះជា ដាក់ជូនគូភាគីពិនិត្យ និងផ្តល់យោបល់ មុននឹង ឈានដល់ការចុះកិច្ចព្រមព្រៀងសះជា។
សូមជម្រាបជូនថាកាលពីថ្ងៃទី១៣ ខែវិច្ឆិកា ឆ្នាំ២០២៤ កន្លងទៅក្រសួងទេសចរណ៍ បានចេញសេចក្តីជូនដំណឹងលេខ៤៣៨ សជណ.អគឧ ស្តីពីការលុបអាជ្ញាបណ្ណភ្នាក់ងារទេសចរណ៍ សកុណា ត្រាវែល (ខេមបូឌា) ឯ.ក ដោយសារភ្នាក់ងារទេសចរណ៍នេះបានខកខានបំពេញកាតព្វកិច្ចជូនអតិថិជនតាមកិច្ចសន្យា និងបានប្រព្រឹត្ត ខុសនឹងបទប្បញ្ញត្តិដែលមានចែងក្នុងច្បាប់ និងលិខិតបទដ្ឋានគតិយុត្តពាក់ព័ន្ធនឹងវិស័យទេសចរណ៍។ ក្រោមក្របខ័ណ្ឌ សមត្ថកិច្ចក្រសួងទេសចរណ៍ ក្រសួងនឹងចេញសេចក្តីសម្រេចស្តីពីការលុបអាជ្ញាបណ្ណភ្នាក់ងារទេសចរណ៍ យោងតាមច្បាប់ និងនីតិវិធីជាធរមាន។
ពាក់ព័ន្ធនឹងករណីខាងលើ ក្រសួងទេសចរណ៍ សូមអំពាវនាវដល់អតិថិជនដែលជាជនរងគ្រោះ សូមធ្វើការ ទំនាក់ទំនងមកក្រសួងទេសចរណ៍ តាមរយៈ ឯកឧត្តម មុយ សែ អគ្គាធិការនៃអគ្គាធិការដ្ឋានក្រសួងទេសចរណ៍ ដែលមាន លេខទូរសព្ទ ០៧០ ០៧៨ ៣៩៩ ៖ ២២៧ ចាប់ពីថ្ងៃចេញសេចក្តីប្រកាសព័ត៌មាននេះ រហូតដល់ថ្ងៃទី២៥ ខែវិច្ឆិកា ឆ្នាំ២០២៤ ៕
ដោយ ៖ ហេង សម្បត្តិ + ថេត វិចិត្រ
