អ្នកបើកបរកាណូត និងបើកបររថយន្តគិលានសង្គ្រោះនៅស្រុកសណ្ដាន់ បានទទួលថវិកា ,ប្រេង និងស្បៀង
កំពង់ធំ៖ប្រេងឥន្ធនៈ ថវិកា និងស្បៀងអាហារជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី តាមរយៈនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ត្រូវបានប្រគល់ជូនអ្នកបើកបរកាណូត និងអ្នកបើកបររថយន្តគិលានសង្គ្រោះ សម្រាប់ដឹកជញ្ជូនប្រជាពលរដ្ឋដោយឥតគិតថ្លៃនៅមន្ទីរពេទ្យបង្អែកស្រុកសណ្ដាន់ ។
ឧត្តមសេនីយ៍ទោ សោម ស៊ុន តំបន់ប្រតិបត្តិការសឹករងកំពង់ធំ អនុប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់បាននាំអំណោយនេះទៅប្រគល់ជូនដោយផ្ទាល់កាលពីថ្ងៃ១៩ ខែវិច្ឆិកា ឆ្នាំ២០២៤ ។
អំណោយមានប្រេងសាំង៩០០ លីត្រ សម្រាប់បម្រើឱ្យការដឹកជញ្ជូនតាមកាណូត និងប្រេងម៉ាស៊ូត ចំនួន៣០០លីត្រ ព្រមទាំងថវិកាចំនួន៣០០ដុល្លារ សម្រាប់អ្នកបើកបររថយន្តគិលានសង្គ្រោះ និង គ្រឿងឧបភោគបរិភោគ ផ្ដល់ជូនដល់អ្នកបើកបរកាណូតប្រើប្រាស់រយៈពេលបីខែចាប់ពីខែវិច្ឆិកា ឆ្នាំ២០២៤ ដល់ខែមករា ឆ្នាំ២០២៥ ។
សូមជម្រាបថា ការដឹកជញ្ជូនបានធ្វើនៅបីឃុំ តាមដងស្ទឹងសែន គឺឃុំដងកាំបិត ឃុំមានជ័យ និងឃុំក្លែង ។ការដឹកជញ្ជូននេះដើម្បីសម្រួលដល់កសិស្សានុសិស្ស ក៏ដូចជាប្រជាពលរដ្ឋ ឆ្លងកាត់ដងស្ទឹងសែនទៅសាលាក៏ដូចជាប្រកបមុខរបរអាជីវកម្ម ។សម្ដេចធិបតី ហ៊ុន ម៉ាណែត និងលោកជំទាវបណ្ឌិត បានឧបត្ថម្ភកាណូតតូចធំចំនួន៦គ្រឿងតាមរយៈនាយឧត្តមសេនីយ៍ ម៉ៅ សុផាន់ សម្រាប់ដឹកជញ្ជូនឆ្លងកាត់នៅកំពង់ចម្លងឃុំដងកាំបិតចំនួនពីរគ្រឿង, នៅឃុំមានជ័យនិងឃុំក្លែងចំនួនបួនគ្រឿង។ ចំណែករថយន្តគិលានសង្គ្រោះមួយគ្រឿងបានប្រគល់ជូនមន្ទីរពេទ្យបង្អែកស្រុកសណ្ដាន់ និងផ្ដល់ប្រេងឥន្ធន: ៣០០លីត្រ ថវិកា១០០ដុល្លារដល់អ្នកបើកបរ ក្នុងមួយខែ៕
ដោយ៖ ប៊ុន រដ្ឋា
