តិចសាស់ ៖ រ៉ុក្តែតយក្ស Starship របស់ក្រុមហ៊ុន SpaceX បានហោះបោះពួយសំដៅទៅកាន់ទីអវកាស ក្រោមក្រសែភ្នែកទាំងគូររបស់ប្រធានាធិបតីជាប់ឆ្នោតអាមេរិក លោក ដូណាល់ ត្រាំ និងមហាសេដ្ឋីបច្ចេកវិទ្យា លោក អេឡុន ម៉ាស។ នេះបើតាមការចុះផ្សាយរបស់កាសែតរ៉យទ័រ។

មុនពេលធ្វើតេស្តលើកទី៦ លោក ម៉ាស បានអញ្ជើញលោក ត្រាំ និងសមាជិកសភាធ្វើទស្សនកិច្ចបន្ទប់បញ្ជា (Starbase) របស់ក្រុមហ៊ុន SpaceX។

បន្ទាប់មកការបាញ់បង្ហោះសាកល្បងរ៉ុក្តែត Starship ត្រូវបានធ្វើឡើងកាលពីរសៀលម៉ោង៤ថ្ងៃអង្គារ (ម៉ោងក្នុងតំបន់) នៅឯទីស្នាក់ការក្រុមហ៊ុន SpaceX ក្នុងទីក្រុង Boca Chica នៃរដ្ឋតិចសាស់។

ប្រភពបានឱ្យដឹងថា ការធ្វើតេស្តលើកចុងក្រោយនេះ មិនបានទទួលជោគជ័យដូចការរំពឹងទុកទេ ដោយសារតែរ៉ុក្តែត Starship មិនអាចចូលចតនៅទីតាំងជើងទម្របាញ់បង្ហោះវិញបាន ហើយវាបែរជាធ្លាក់នៅឯឈូងសមុទ្រម៉ិកស៊ិក។

Starship ដែលជាប្រព័ន្ធរ៉ុក្កែតជំនាន់ក្រោយរបស់ក្រុមហ៊ុន SpaceX ជាផ្នែកមួយនៃផែនការប្រកបដោយមហិច្ឆិតារបស់លោក ម៉ាស ក្នុងការបញ្ជូនមនុស្ស និងទំនិញទៅកាន់ភពអង្គារនៅឆ្នាំ ២០២៦។

អង្គការ NASA ក៏គ្រោងនឹងប្រើប្រាស់រ៉ុក្តែត Starship ដើម្បីចុះចតអវកាសយានិកនៅលើភពព្រះចន្ទក្នុងទសវត្សរ៍នេះផងដែរ ស្ថិតក្រោមកម្មវិធី «Artemis» ហើយក៏នេះជាកិច្ចខិតខំប្រឹងប្រែងមួយ ពាក់ព័ន្ធនឹងបេសកកម្មនៅភពព្រះអង្គារ៕

ប្រភព ៖ រ៉យទ័រ ប្រែសម្រួល ៖ ឈឹម ទីណា