សៀមរាប៖នាព្រឹកថ្ងៃទី២៤ ខែវិច្ឆិកា ឆ្នាំ២០២៤នៅមុខប្រាសាទ​អង្គរវត្ត ឯកឧត្តមបណ្ឌិតទេសរដ្ឋមន្ត្រី លី ធុជ អនុប្រធានទី១​អាជ្ញា​ធរមីន និងជាប្រធានអនុសញ្ញាអូតាវ៉ាឆ្នាំ២០២៤ បានអញ្ជើញចូល​រួមជាមួយភ្ញៀវជាតិ និងអន្តរជាតិជាង៣ ០០០នាក់ “ដើរដង្ហែក្បួន​ដើម្បីពិភពលោកមួយដែលគ្មានមីន” ខណៈដែលកម្ពុជាធ្វើជាម្ចាស់​ផ្ទះនៃកិច្ចប្រជុំកំពូលសៀមរាប- អង្គរស្តីពីពិភពលោកគ្មាន​គ្រាប់ មីន នៅខេត្តសៀមរាប។

ក្នុងចំងាយផ្លូវ៤គីឡូម៉ែត្រ ចាប់ពីប្រាសាទអង្គរវត្ត ដល់ព្រះលាន​ជល់ដំរីក្បែរប្រាសាទបាយ័ន ឯកឧត្តមបណ្ឌិតទេសរដ្ឋមន្ត្រី លី ធុជ អនុប្រធានទី១​អាជ្ញា​ធរមីន និងជាប្រធានអនុសញ្ញាអូតាវ៉ាឆ្នាំ២០២៤ ឯកឧត្តម ហួត ជា រដ្ឋមន្រ្តីក្រសួងទេសចរណ៍ លោក សំកុល សុចិត្រា អភិបាលរងខេត្តសៀមរាប រួមជាមួយភ្ញៀវជាតិ និងអន្តរជាតិជាង៣ ០០០នាក់មកពី​អង្គភាព ស្ថាប័នជាតិ អន្តរជាតិ ព្រមទាំងគណៈ​ប្រតិភូជារដ្ឋភាគី១៦៤ប្រទេស តំណាងស្ថានទូតប្រចាំកម្ពុជា ដៃគូអភិវឌ្ឍន៍ រដ្ឋបាល​ខេត្ត​សៀមរាប កងកម្លាំងប្រដាប់​អាវុធ ប្រតិបត្តិករសកម្មភាពមីន មន្រ្តីរាជការ វិស័យឯកជន សិល្បៈករ ប្រជាពលរដ្ឋ លោកគ្រូ-អ្នកគ្រូ សិស្សានុសិស្ស និងភាគីពាក់​ព័ន្ធ​ក្នុងខេត្ត “ដើរដង្ហែក្បួន​ដើម្បីពិភពលោកមួយដែលគ្មានមីន”។

ក្បួនដង្ហែដែលនាំមុខដោយជនមានភាពពិការជាច្រើនប្រភេទដោយសារគ្រាប់មីន ព្រមទាំងបដាពាក្យស្លោកក្នុងន័យអំពាវនាវ​ដើម្បីពិភពលោក​មួយដែលគ្មានមីន បានធ្វើដំណើរព្រមៗគ្នា ដើរថ្មើរជើង និងខ្លះជិះរទេះ ។

លោក សំកុល សុចិត្រា អភិបាលរងខេត្តសៀមរាបបានមានប្រសាសន៍​ថា ក្នុងនាមអាជ្ញាធរដែនដីសូមគាំទ្រនូវព្រឹត្តិការណ៍ដ៏​មានសារៈ​សំខាន់​នេះ យើងនឹងរួបរួមគ្នាដើម្បីលុបបំបាត់មិនឱ្យមានគ្រាប់មីននៅសេស​សល់ក្នុងប្រទេសយើង ក៏ដូចជា​នៅទូទាំង​ពិភពលោក។ យើងនឹងដើរ​ទៅ​មុខជាមួយជនរងគ្រោះដោយសារមីន ,ជាមួយសហគមន៍ ជាមួយ​មន្រ្តីប្រតិបត្តិករ ស្ថាប័នសាសនា និងអង្គការនានា ដើម្បីជាសក្ខីភាព​បង្ហាញថា នៅពេលដែលយើងរួមគ្នា យើងនឹងសម្រេចបានអនាគត​មួយដែលមានសុវត្ថិភាព និងសុខសន្តិភាព ។

ឯកឧត្តមបណ្ឌិតទេសរដ្ឋមន្ត្រី លី ធុជ បានមានប្រសាសន៍ថា ថ្ងៃនេះ​យើងមកពីគ្រប់ទិសទីនៃពិភពលោក ។យើងរួមគ្នាក្នុងនាមជាមិត្ត ជាគ្រួសារតែមួយ មានក្តីស្រមៃរួមគ្នា គឺការសម្រេចបានពិភពលោក​មួយដោយគ្មានមីន ។ យើងកំពុងដើរឆ្ពោះទៅរកអនាគត ដែល​កូនៗ​របស់យើង អាចរត់លេងដោយសេរី ,កសិកររបស់យើងអាចធ្វើស្រែ​ចម្ការដោយមិនមានការភ័យខ្លាច ,សហគមន៍របស់យើងមិន​អាចលូតលាស់ប្រកបដោយសុវត្ថិភាព៕
អត្ថបទនិងរូបភាព៖ ប៊ុន រដ្ឋា