ពិធីសម្ពោធអគារសិក្សាថ្មី និងអន្តេវាសិកដ្ឋាន សាលារៀន ចុង វ៉ា ខេត្តបន្ទាយមានជ័យ
បន្ទាយមានជ័យ៖ឯកឧត្តម កែ គឹមយ៉ាន អ្នកតំណាងរាស្រ្ត មណ្ឌល ខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ និង លោកជំទាវឧកញ៉ាអគ្គមហាឧបាសិកាពុទ្ធសាសនូបត្ថម្ភក៍បណ្ឌិត ម៉ៅ ម៉ាល័យ បានអញ្ជើញជាអធិបតីភាពក្នុងពិធីសម្ពោធអគារសិក្សាថ្មី និងអន្តេវាសិកដ្ឋាន សាលារៀន ចុង វ៉ា ស្ថិតនៅក្នុងឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ។
ក្នុងពិធីសម្ពោធកាលពីថ្ងៃសៅរ៍ ឧកញ៉ា អ៊ឹង វណ្ណម៉ៅ ប្រធានសមាគមខ្មែរ ចិន បានរំលឹកថាសាលារៀន ចុង វ៉ា បានកសាងឡើងក្នុងកំឡុងឆ្នាំ១៩៣៥ មានទីតាំងនៅខាងជើងវត្ត ឬស្សីក្រោក ស្ថិតក្នុងឃុំឬស្សីក្រោក ស្រុកមង្គលបូរី ។សាលារៀននេះ បានបិទមិនដំណើរការនៅ១៩៧៥ ដល់ឆ្នាំ១៩៧៩។ ក្រោយមានការយកចិត្តទុកដាក់ពីបងប្អូនសមាគមខ្មែរ.ចិន ស្រុកមង្គលបូរី ពិសេសសមាគមខ្មែរ ចិន នៅកម្ពុជា និងស្ថានទូតចិនប្រចាំនៅកម្ពុជា ព្រមទាំងមានការជ្រោមជ្រែងពីអាជ្ញាធរផងនៅថ្ងៃទី១៥ ខែតុលា ឆ្នាំ១៩៩៥ សាលារៀនបានបើកដំណើរការឡើងវិញ ក្រោមការដឹកនាំគ្រប់គ្រងរបស់ លោក គួយ តាំង ដែលមានការអនុញ្ញាតនិងទទួលស្គាល់ជាផ្លូវការតាមរយៈប្រកាសលេខ០៣៦០/អយក ប្រកប ចុះថ្ងៃទី ២៩ ខែវិច្ឆិកា ឆ្នាំ១៩៩៥ របស់ក្រសួងអប់រំ យុវជន និងកីឡា បានអនុញ្ញាតឱ្យបើកសាលារៀនចំណេះដឹងទូទៅឯកជន ខ្មែរ.ចិន ចុង វ៉ា នេះឡើងវិញ បង្រៀនរហូត ដល់ថ្នាក់បញ្ចប់អនុវិទ្យាល័យ ។ឆ្នាំ២០២៤នេះ មានសិស្សសរុប៩៧៤នាក់ (ស្រី៤៦៧នាក់)។
ឧកញ៉ា អ៊ឹង វណ្ណម៉ៅ បានបន្តថា ក្នុងឆ្នាំ២០២៤នេះសាលារៀន ចុង វ៉ា បានកសាងអគារសិក្សាមួយខ្នងកម្ពស់២ជាន់ មាន ១០បន្ទប់ ,ទំហំ១.០៨១ម៉ែតក្រឡារួមទាំងបន្ទប់ទឹកចំនួន៧ ដែលចំណាយថវិកា១៦៣.៥២២ដុល្លារអាមេរិក។ ។ក្នុងនោះមានចាក់សាបក្នុងទីធ្លាផងដែរ។សរុបថវិកាចំណាយទៅលើសមិទ្ធផលនានាចំនួន ២២៦.៧៤៧ដុល្លារ ។ចំណែក ថវិកានៅសល់១៤.៣៣៤ដុល្លារ សម្រាប់កសាងអគារមួយខ្នងទៀតមានបណ្តោយ៤១ម៉ែត្រ ទទឹង ១០.៤ម៉ែត្រ,កម្ពស់២ជាន់ ចែកចេញជា ៨បន្ទប់ ដែល
គ្រោងចំណាយ២១ម៉ឺនដុល្លារ។
ឯកឧត្តម កែ គឹមយ៉ាន បានមានប្រសាសន៍ក្នុងឱកាសចូលរួមថា សាលារៀនគឺជាថ្នាលបណ្តុះបណ្តាលវិជ្ជា ។បង្កើតធនធានមនុស្ស សម្រាប់ជួយកសាងប្រទេសជាតិឱ្យមានរីកចម្រើន។រាជរដ្ឋាភិបាលបានខិតខំដាក់ពង្រាយសាលារៀនមកជិតផ្ទះប្រជាជនដើម្បីផ្តល់ភាពងាយស្រួលដល់កូនចៅប្រជាពលរដ្ឋបានសិក្សារៀនសូត្រចេះដឹង ។មានការងារធ្វើ បង្កើនចំណូលគ្រួសារ ។ឯកឧត្តមបានអំពាវនាវដល់មាតា បិតាសូមបញ្ជូនកូនទៅសិក្សាឱ្យបានគ្រប់ៗគ្នា និងជួយសហការអប់រំកូនចៅឱ្យបានល្អ ដោយមិនទៅជាប់ពាក់ព័ន្ធ នឹងបញ្ហាគ្រឿងញៀន គ្រឿងស្រវឹង ៕
ដោយ៖ឃិន គន្ធា
