រដ្ឋមន្រ្តីក្រសួងរៀបចំដែនដី បង្ហាញសមិទ្ធផលសម្រេចបាន នៅដើមអាណត្តិទី៧ នៃរាជរដ្ឋាភិបាល
(ភ្នំពេញ)៖ ក្នុងពិធីបិទសន្និបាតបូកសរុបលទ្ធផលការងារ ឆ្នាំ២០២៤ និងទិសដៅឆ្នាំ២០២៥ របស់ក្រសួងរៀបចំដែនដី នគរូបនីយកម្ម និងសំណង់ ក្រោមអធតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នារសៀលថ្ងៃទី ២៦ ខែវិច្ឆិកា ឆ្នាំ២០២៤ ឯកឧត្តម ឧបនាយករដ្ឋមន្ត្រី សាយ សំអាល់ រដ្ឋមន្រ្តីក្រសួងរៀបចំដែនដី នគររូបនីយកម្ម និងសំណង់ បានលើកបង្ហាញពីសមិទ្ធផលការងារសម្រេចបាន នៅដើមអាណត្តិទី៧ នៃរាជរដ្ឋាភិបាល ។
ឯកឧត្តម សាយ សំអាល់ បានបញ្ជាក់ថា នៅដើមអាណត្តិទី៧នេះ ក្រសួង បានបន្តពូនជ្រំ និងបន្តនិរន្តរភាពការងារ និងដំណើរការស្ថាប័នជារួម ដោយបានពង្រឹងស្មារតីសតិអារម្មណ៍ ឈរលើគោលការណ៍សាមគ្គីភាព ឯកភាពផ្ទៃក្នុង ដែលជាកត្តាគន្លឹះដើម្បីធានានិរន្តរភាពការងារ ដំណើរការស្ថាប័ន កសាងជំនឿ និងទំនុកចិត្តលើការដឹកនាំ ដែលក្រសួងចាត់ទុកជា «ការរៀបចំផ្ទះសម្បែងឱ្យរៀបរយ» ដែលត្រូវយកជ័យជម្នះឱ្យខាងតែបាន ។
ឯកឧត្តម រដ្ឋមន្រ្តី បានបញ្ជាក់ពីសមរភូមិ កាត់បន្ថយ និងលុបបំបាត់បញ្ហាចម្រូងចម្រាសក្នុងសង្គម ដោយក្រសួង បានកំណត់យកការចុះបញ្ជីដីបង្ហើយ ក្នុងគោលដៅកែសម្រួលភាពមិនច្បាស់លាស់នៃព្រំកាន់ការ និងកាត់បន្ថយវិវាទដីធ្លី ដើម្បីសម្រេចបាននូវការផ្តល់សុវត្ថិភាពផ្លូវច្បាប់ និងសន្តិភាពផ្លូវចិត្ត ក្នុងការកាន់កាប់អចលនទ្រព្យរបស់ប្រជាពលរដ្ឋ ឈានទៅកសាងសង្គមកម្ពុជា ជាភូមិឋានក្សេមក្សាន្ត ខណៈកន្លងមក ក្រសួង បានវាស់វែង និងចុះបញ្ជីដីធ្លីចំនួនជាង ៧លាន ៧សែនក្បាលដី និងបានចេញបណ្ណ ប្រមាណ ៧លានបណ្ណ ហើយក្រសួង ក៏បានវាស់វែងដីធ្លីបន្ថែមចំនួនប្រមាណ ៣លានក្បាលដី និងចេញបណ្ណបានប្រមាណ ៥៩ម៉ឺនបណ្ណ និងរំពឹងថា ក្បាលដីនៅសេសសល់ប្រមាណ ១,៥ លានទៀត អាចត្រូវបានវាស់វែងបញ្ចប់នាពេលខាងមុខ ដែលកិច្ចការនេះ នឹងជួយឱ្យរដ្ឋអាចប្រមូលចំណូលពន្ធពាក់ព័ន្ធ អចលនទ្រព្យប្រមាណ ២៥០ លានដុល្លារ ក្នុងមួយឆ្នាំ ។
ទន្ទឹងនេះ ឯកឧត្តម ឧបនាយករដ្ឋមន្ត្រី សាយ សំអាល់ បានបន្ថែមថា ក្រសួងរៀបចំដែនដី បាននិងកំពុងដំណើរការវាស់វែង ចុះបញ្ជី និងចេញបណ្ណដីរដ្ឋ និងដីសមូហភាព ដែលកាន់កាប់ដោយក្រសួងកសិកម្ម រុក្ខាប្រមាញ់ និងនេសាទ, ក្រសួងបរិស្ថាន, ក្រសួងធនធានទឹកនិងឧតុនិយម, ក្រសួងព្រះបរមរាជវាំង, ក្រសួងវប្បធម៌និងវិចិត្រសិល្បៈ, ក្រសួងសាធារណការនិងដឹកជញ្ជូន, អង្គភាព រដ្ឋតាមបណ្តារាជធានី-ខេត្ត សរុបចំនួន ៥៨,០៦៣ ក្បាលដី ស្មើនឹង ៥៨,០៦៣បណ្ណ ក្នុងនោះក៏មាន ដីតំបន់បឹងទន្លេសាបក្នុងខេត្តទាំង៦, ដីសម្បទានសេដ្ឋកិច្ច និងងឹតរុភណ្ឌរបស់វត្ត ផងដែរ។
ឯកឧត្តម សាយ សំអាល់ ក៏បានលើកឡើងពីវិវាទ ដែលក្រសួងទទួលបាន មានចំនួន ១៥,៩៦០ករណី ក្នុងចំណោមវិវាទនេះ មាន ៤ប្រភេទ គឺ វិវាទលើនិឯកជន, វិវាទលើទីតាំងដីរដ្ឋនិងដីសហគមន៍, បណ្ដឹងជំទាស់លើសេចក្តីសម្រេចរបស់ស្ថាប័នតុលាការនិងសេចក្តី សម្រេចរាជរដ្ឋាភិបាលរួចហើយ និងបណ្ដឹងឬសំណើមានចរិតនយោបាយ និងបានសម្របសម្រួល ដោះស្រាយបញ្ចប់ចំនួន ១៤, ៩១៩ ករណី នៅសេសសល់ ១,០៤១ករណី ។
ឯកឧត្តមរដ្ឋមន្រ្តីក្រសួងរៀបចំដែនដី បញ្ជាក់ដែរថា តាមរយៈលទ្ធផលនៃការដោះស្រាយវិវាទដីធ្លីនេះ ក្រសួង អាចសន្និដ្ឋានបានថា ភាពរសើបខាងនយោបាយ ត្រូវបានកាត់បន្ថយជាអតិបរមា ហើយវិវាទដែលនៅសេសសល់ទាំង ១,០៤១ករណីនេះ មិនមានលក្ខណៈបែបញ្ចុះញង់ដែលជាឈ្នាន់នយោបាយទៀតនោះឡើយ ។
បើតាម ឯកឧត្តម សាយ សំអាល់ ក្រសួងក៏បានបង្កើត «មជ្ឈមណ្ឌលប្រជាជន (People Center)» សម្រាប់ប្រមូលធ្វើទិន្នន័យគ្រប់ប្រភេទ ដោយបាននិងកំពុងប្រែក្លាយសេវាសាធារណៈប្រមាណ៤៩៦មុខឱ្យដំណើរការតាម ប្រព័ន្ធអនឡាញ ដើម្បីផ្តល់ សេវាគាប់ចិត្ត ឱ្យដល់ដៃអតិថិជនគ្រប់រូប មានភាពងាយស្រួល និងរហ័សទាន់ចិត្ត សំដៅ ពង្រីកបន្ថែមនូវមូលដ្ឋានសេដ្ឋកិច្ច ដើម្បីទ្រទ្រង់ចំណូលចរន្តថវិកាជាតិ និងបង្កើនចំណូលរបស់ប្រជាជន ។
ឯកឧត្តម សាយ សំអាល់ ក៏បានរាយការណ៍ពីចំណូលបានមកពីសេវាសាធារណៈក្នុងវិស័យសំណង់ និងសុរិយោដីក្នុងឆ្នាំ២០២៣ ទទួលបានជាង ១៤៦ លានដុល្លារ ក្នុងនោះចំណូលពន្ធលើការផ្ទេរអចលនទ្រព្យមានចំនួនប្រមាណ ១០០លានដុល្លារ (ប្រមាណជា ៦៨, ៥%) ។ ចំណូលនេះនឹងកើនឡើងបន្ថែមទៀត តាមរយៈការធ្វើទំនើបកម្មនៃការផ្តល់ សេវាសាធារណៈតាមប្រព័ន្ធឌីជីថល ។
ចំពោះបញ្ហាវិវាទរវាងបុរី និងអតិថិជន ឯកឧត្តម ឧបនាយករដ្ឋមន្ត្រី សាយ សំអាល់ បានឱ្យដឹងថា ក្រសួងបាននិងកំពុងរកដំណោះស្រាយសមស្របចំពោះគម្រោង អភិវឌ្ឍន៍អចលនវត្ថុចំនួន ៩៩ គម្រោង នៅទូទាំងប្រទេស រួមមាន បុរី ចំនួន ២៧ ស្មើនឹង ៧៧គម្រោង, ផ្សារនិងខុនដូ ចំនួន ៤គម្រោង និងដីឡូតិ៍ ចំនួន ១៨កម្រោង ក្នុងនោះ ដោះស្រាយបាន ៥៣ គម្រោង នៅសល់ចំនួន ៤៦ គម្រោង កំពុងសម្របសម្រួលដោះស្រាយបន្ត ដោយឈរលើស្មារតីយោគយល់គ្នា ក្នុងគ្រាលំបាក និងបានធ្វើឱ្យសភាពការណ៍តានតឹងទាំងនេះ បានប្រសើរឡើងវិញជាលំដាប់។ ដោយឡែកក្នុងចំណោមគម្រោងអភិវឌ្ឍន៍ដែលជាបុរី លំនៅឋាន ផ្សារ និង ខនដូជាដើម ដែលមានបញ្ហាចំនួន ១០៦ករណី ក្រសួងបានសម្របសម្រួលដោះស្រាយបានប្រហែល ៥០ ភាគរយហើយ ៕
ដោយ ៖ គ្រី សម្បត្តិ
(ក្រសួងដែនដី)
