ស្វាយរៀង៖លោក យន់ រស្មី ត្រូវបាន​ប្រកាសចូលកាន់តំណែងជា​ប្រធាន​មន្ទីរសាធារណការ និងដឹកជញ្ជូន ខេត្តស្វាយរៀង ជំនួស លោក នួន លីហួន ដែលទទួលបានការជ្រើសតាំងជាសមាជិកក្រុមប្រឹក្សា​ខេត្ត។ពិធីបាន​ប្រព្រឹត្ត​​ទៅកាលពី​រសៀល​ថ្ងៃទី៥ ខែធ្នូ  ក្រោមអធិបតី​ភាព​ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹក​ជញ្ជូន ,ឯកឧត្តម ម៉ែន វិបុល ប្រធានក្រុមប្រឹក្សាខេត្ត ឯកឧត្តម ប៉េង ពោធិ៍សា អភិបាលខេត្តស្វាយរៀង។

ក្នុងនាមក្រុមប្រឹក្សាខេត្ត ឯកឧត្តម ប៉េង ពោធិ៍សា អភិបាលខេត្ត​បានសង្ឃឹមយ៉ាងមុតមាំចំពោះលោក យន់ រស្មី ប្រធានមន្ទីរ​សាធារណការ និងដឹកជញ្ជូនថ្មីជាមន្ត្រីដែលធ្លាប់មានបទពិសោធន៍ និងជាអនុប្រធានមន្ទីររយៈពេល៧ឆ្នាំកន្លងមក នឹងបន្ត​ខិតខំប្រឹងប្រែងយកអស់សមត្ថភាព ចំណេះដឹង ជំនាញ និងបទពិសោធន៍បំពេញតួនាទីភារកិច្ចប្រកបដោយប្រសិទ្ធផល។

ក្នុងឱកាសនេះដែរឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូនបានចូលរួមអបអរសាទរ ឯកឧត្តម នួន លីហួន អតីតប្រធានមន្ទីរសាធារណការ និងដឹកជញ្ជូនខេត្តស្វាយរៀង ដែលទទួលបានការជ្រើសតាំងជា​សមាជិក​ក្រុមប្រឹក្សា​ខេត្តស្វាយរៀង​នីតិកាលទី៤ និងផ្តាំផ្ញើដល់ លោក យន់ រស្មី ប្រធានមន្ទីរ​សាធារណ​ការថ្មី ត្រូវពង្រឹងសាមគ្គីភាព​ផ្ទៃក្នុង ។បង្កើនកិច្ចសហប្រតិបត្តិការ​ជាមួយបណ្ដាមន្ទីរ-អង្គភាពនានាជំនាញខេត្ដ អាជ្ញាធរគ្រប់លំដាប់ថ្នាក់ ដៃគូអភិវឌ្ឍន៍ ជាតិ-អន្ដរជាតិ ជាពិសេសអនុវត្តតាមការណែនាំពីថ្នាក់​ដឹកនាំខេត្តដើម្បីបន្តអភិវឌ្ឍន៍ វិស័យហេដ្ឋារចនាសម្ព័ន្ធ,ផ្ដល់ សេវា​សាធារណៈចាំបាច់ និងសេវាតម្រូវការគ្រប់ប្រភេទ ជូនប្រជាពលរដ្ឋក្នុងដែនសមត្ថកិច្ចរបស់ខ្លួន៕
ដោយ៖នុត នាង