(ភ្នំពេញ)៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា​កម្ពុជា និងគណៈប្រតិភូបានអញ្ជើញដល់ រដ្ឋធានីអង់ការ៉ា ប្រទេសតួកគី ប្រកបដោយសុវត្តិភាព នៅវេលាម៉ោង ១៤៖៣០នាទីថ្ងៃទី១១ ខែធ្នូ ឆ្នាំ២០២៤ ម៉ោងនៅរដ្ឋធានីអង់ការ៉ា ដើម្បីបំពេញទស្សនកិច្ចផ្លូវការ រយៈពេលពីរថ្ងៃ។

ដំណើរអញ្ជើញដល់អាកាសយានដ្ឋានអន្តរជាតិអង់ការ៉ា សម្តេចតេជោ​ប្រធាន​ព្រឹទ្ធសភា និង គណៈប្រតិភូទទួលបានការស្វាគមន៍យ៉ាងកក់ក្តៅពី ឯកឧត្តម អាឌុលកាឌៀ អាក់ហ្គូល (Abdulkadir AKGOL) ប្រធាន​ក្រុមមិត្តភាពអន្តរសភាតួកគី-កម្ពុជា, ឯកឧត្តម សុខ ជា ឯកអគ្គរាជ​ទូតវិសាមញ និងពេញសមត្ថភាព នៃព្រះរាជាណាចក្រកម្ពុជា ប្រចាំប្រទេស​តួកគី ព្រមទាំងវត្តមានឥស្សរជនជាន់ខ្ពស់សភាតួកគី និងឥស្សរជន​ការទូតរបស់ព្រះរាជាណាចក្រកម្ពុជា ជាច្រើនរូបទៀត ។

វត្តមាននៃការអញ្ជើញដល់សណ្ឋាគារ ក្នុងរដ្ឋធានីអង់ការ៉ា សម្តេចអគ្គមហា​សេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ត្រូវបានការធ្វើគារវកិច្ចស្វាគមន៍យ៉ាងស្និទ្ធស្នាលរ៉ាក់ទាក់ពីសំណាក់បងប្អូនជនរួមជាតិខ្មែរ និងនិស្សិតកម្ពុជា ដែលកំពុងប្រកបរបរចញ្ចឹមជីវិត និងធ្វើ​កម្ម​សិក្សា នៅរដ្ឋធានីអង់ការ៉ា ប្រទេសតួកគីយ៉េ នៅរសៀលថ្ងៃទី១១ ខែធ្នូ ឆ្នាំ២០២៤ ។

នៅសាធារណរដ្ឋតួកគី សម្តេចតេជោប្រធានព្រឹទ្ធសភា នឹងមានជំនួប​ទ្វេភាគី​ជាមួយ ឯកឧត្តម សាស្ត្រាចារ្យបណ្ឌិត នូម៉ង់ គ័រទុលមុស ប្រធាន​រដ្ឋសភាតួកគីយេ និងជួប សម្តែង ការគួរសមនិងពិភាក្សា ការងារជា​មួយឯកឧត្តម រេជីប ថាយយ៉ុប អ៊ែរដ៏វ៉ាន់ ប្រធានា ធិបតីតួកគីយេ។ ក្រៅពីនេះ សម្តេចតេជោ ប្រធានព្រឹទ្ធសភា នឹងអញ្ជើញចូលរួមកម្ម វិធីសំខាន់ៗដទៃទៀត រួមទាំងអញ្ជើញទស្សនាទីតាំងជាប្រវត្តិសាស្ត្រ​របស់តួកគីយេផងដែរ។

សូមបញ្ជាក់ថា នៅក្នុងសប្តាហ៍នេះសម្តេចតេជោ ហ៊ុន សែន ដឹកនាំគណៈ​ប្រតិភូ អញ្ជើញ បំពេញទស្សនកិច្ច នៅប្រទេសជាមិត្តចំនួន៤ ដែលសុទ្ធតែ​ជាប្រទេស កាន់សាសនាឥស្លាម ។ ប្រទេសទាំង៤នោះ រួមមាន៖ ប្រទេស​អារ៉ាប៊ីសាអូឌីត, ប្រទេសកាតា, ប្រទេសតួកគី និងប្រទេសអេមីរ៉ាត់អារ៉ាបរួម ។

សម្តេចតេជោ និងគណៈប្រតិភូ បានចាប់ផ្តើម ដំណើរទស្សនកិច្ច​កាលពី​ថ្ងៃទី៨ ខែធ្នូ ។ ប្រទេសដំបូងគេ ដែលសម្តេចបានបំពេញទស្សនកិច្ច គឺប្រ​ទេស​អារ៉ាប៊ីសាអូឌីត បន្ទាប់ មកប្រទេសកាតា ប្រទេសតួកគី និងប្រទេស​ចុង​ក្រោយនៃដំណើរទស្សនកិច្ចនេះ គឺប្រទេស អេមីរ៉ាត់អារ៉ាប់រួម។

ទស្សនកិច្ចផ្លូវការរបស់ សម្តេចតេជោប្រធានព្រឹទ្ធសភា នៅបណ្តា ប្រទេសជាមិត្តខាងលើ ជាការបង្ហាញយ៉ាងច្បាស់ ពីសារៈសំខាន់ និងតួនាទីកាន់តែសកម្មនៃ «ការទូតសភា» ដែលជាអាទិភាពមួយនៃ អាទិភាពទាំងពីរ របស់ព្រឹទ្ធសភា នីតិកាលទី៥ ក្រោមការដឹកនាំប្រកប​ដោយ គតិបណ្ឌិតរបស់សម្តេចតេជោ ប្រធានព្រឹទ្ធសភា ក្នុងការរួម ចំណែក ដល់ការពង្រឹង និងពង្រីកចំណងមិត្តភាព សាមគ្គីភាព និងកិច្ចសហប្រតិបត្តិ​ការ​ដ៏ល្អ ប្រសើរ រវាងស្ថាប័ននីតិប្បញ្ញត្តិ របស់កម្ពុជា ជាមួយស្ថាប័ននីតិ​ប្បញ្ញត្តិ នៃបណ្តាប្រទេសជាមិត្ត ដើម្បីជាគុណប្រយោជន៍ ដល់ប្រជាជន ការអភិវឌ្ឍប្រទេសជាតិរីកចម្រើន និងដើម្បីសន្តិភាព ស្ថិរភាព និងសន្តិសុខ ក្នុងតំបន់ និងពិភពលោក។

ដំណើរទស្សនកិច្ច ក៏បង្ហាញពីការលើកកម្ពស់ទំនាក់ទំនង និងកិច្ចសហប្រតិ​បត្តិការ រវាងកម្ពុជា ជាមួយបណ្តាប្រទេសកាន់សាសនាឥស្លាម ដែលកម្ពុជា​មានលទ្ធភាពប្រើប្រាស់ សក្តា នុពលរបស់ខ្លួន ដើម្បីជំរុញបន្ថែមនូវការ​វិនិ​យោគ និងធ្វើពាណិជជ្ជកម្ម ដែលជាការធ្វើ ពិពិធកម្មទីផ្សារអន្តរជាតិ​របស់​ខ្លួន ៕

ដោយ ៖ វណ្ណលុក