មេបញ្ជាការខេត្តកំពង់ធំអញ្ជើញសួរសុខទុកកងកម្លាំងចម្រុះការពារធនធានធម្មជាតិនៅដែនជម្រកសត្វព្រែបឹងពែរ
កំពង់ធំ៖ដោយមិនធ្វេសប្រហែសនិងយកចិត្តទុកដាក់ចំពោះកងកម្លាំងចម្រុះ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍គណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំកាលពីថ្ងៃទី១២ ខែធ្នូ បានអញ្ជើញសាកសួរសុខទុក្ខកងកម្លាំងចម្រុះ ដែលកំពុងបំពេញភារកិច្ចការពារទប់ស្កាត់ និងបង្ក្រាបបទល្មើសធនធានធម្មជាតិនៅទីបញ្ជាការស្រាលតំបន់ជាំក្របី ស្ថិតនៅក្នុងដែនជម្រក សត្វព្រៃបឹងពែរ ឃុំសាគ្រាម ស្រុកប្រាសាទបល្ល័ង្ក។
នៅទីជម្រកសមរម្យមួយទោះជានៅឆ្ងាយពីទីប្រជុំជនលោក អ៊ី វិចអុល មន្ត្រីឧទ្យានុរៈបរិស្ថាន និងជាប្រធានទីបញ្ជាការស្រាលតំបន់ជាំក្របី បានជម្រាបអំពីស្ថានភាពរួមនៃការរស់នៅ និងការបំពេញភារកិច្ចរបស់កងកម្លាំងទាំងអស់នៅទីបញ្ជាការស្រាល ដែលអនុវត្តយ៉ាងម៉ឹងម៉ាត់តាមបទបញ្ជារបស់ឯកឧត្តម នួន ផារ័ត្ន អភិបាលខេត្ត និងប្រធានគណៈបញ្ជាការឯកភាពរដ្ឋបាលខេត្តកំពង់ធំ ។
ឧត្តមសេនីយ៍ទោ សោម ស៊ុន បានកោតសរសើរដល់កងកម្លាំងចម្រុះ ដែលសហការគ្នាល្អក្នុងការបំពេញភារកិច្ចក្នុងរយៈពេលជាង៧ខែកន្លងមកនេះ ទទួលបានជោគជ័យ ពោលមិនមានការលួចកាប់ទន្ទ្រានព្រៃឈើយកដីរដ្ឋធ្វើជាកម្មសិទ្ធិជាថ្មី និងរកឃើញផ្ទៃដីដែលលួចកាប់បន្ទ្រានកន្លងមកជាង២ ៥០០ ហិកតា ដែលបច្ចុប្បន្នបានគ្រប់គ្រង និងស្រាវជ្រាវវែករកមុខជនសង្ស័យ ដើម្បីកសាងសំណុំរឿងបញ្ជូនទៅកាន់តុលាការ ។ចំណែកដីបានដាំស្ដារព្រៃឈើឡើងវិញជាង៥ម៉ឺនដើម។
ក្នុងឱកាសនេះក្រៅពីការសាកសួរសុខទុក្ខ ការលើកទឹកចិត្តឱ្យបំពេញភារកិច្ចកាន់តែល្អប្រសើរលោកមេបញ្ជាការតំបន់ប្រតិបត្តិការសឹករង អំណោយមួយចំនួនដល់ទីបញ្ជាការស្រាលតំបន់ជាំក្របី មាន ប្រេងសាំង អង្ករ មី ត្រីខកំប៉ុង ទឹកត្រី ទឹកស៊ីអ៊ីវ ថ្នាំពេទ្យ និងថវិកាមួយចំនួន ជាអំណោយដ៏ថ្លៃថ្លាសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជាតាមរយៈឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធ ពលខេមរភូមិន្ទ មេបញ្ជាការកងទ័ពជើងគោក និងឯកឧត្តម នួន ផារ័ត្ន អភិបាលខេត្តកំពង់ធំ៕
អត្ថបទនិងរូបភាព៖ ប៊ុន រដ្ឋា
