បាងកក៖ គណៈរដ្ឋមន្ត្រីថៃបានអនុម័តវិធានការបន្ធូរបន្ថយបំណុលប្រជាពលរដ្ឋ រួមទាំង ការព្យួរការប្រាក់ និងកាត់បន្ថយការបង់ប្រាក់ដើម ដើម្បីជួយដោះស្រាយបំណុលគ្រួសារ ក្នុងនោះ ក៏មានលើកម្ចីទិញផ្ទះ និងឡាន ផងដែរ។

នាយករដ្ឋមន្ត្រីថៃ លោកស្រី Paetongtarn Shinawatra បានប្រាប់សន្និសីទសារព័ត៌មានមួយថា វិធានការនេះនឹងជួយដល់អ្នកខ្ចីលក់រាយ និងអាជីវកម្មខ្នាតតូច។ រដ្ឋាភិបាលបាននិយាយថា វិធានការនេះនឹងបន្ធូរបន្ថយសម្រាប់បំណុលដែលហួសកាលកំណត់មួយឆ្នាំ គ្របដណ្តប់លើប្រាក់កម្ចីទិញផ្ទះ រហូតដល់តម្លៃប្រមាណ១៤៨,០០០ដុល្លារ, ប្រាក់កម្ចីរថយន្ត មិនឲ្យលើសពី តម្លៃប្រមាណ២៣,៦៨០ដុល្លារ និងប្រាក់កម្ចីរបស់ក្រុមហ៊ុនតូចៗ រហូតដល់ តម្លៃប្រមាណ១៤៨,០០០ដុល្លារ នេះបើតាមសេចក្តីថ្លែងការណ៍ កាលពីថ្ងៃពុធ។ យ៉ាងណាក៏ដោយ ធនាគារកណ្តាលថៃ ត្រូវលម្អិតបន្ថែមទៀត ជុំវិញកម្រិត នៃការបន្ធូរបន្ថយបំណុលនេះ។

រដ្ឋាភិបាលបាននិងកំពុងព្យាយាមបន្ធូរបន្ថយបន្ទុកបំណុលរបស់គ្រួសារ ដែលខ្លួនមើលឃើញថា ជាឧបសគ្គធំរារាំងដល់កំណើនសេដ្ឋកិច្ច។ បំណុលគ្រួសារពលរដ្ឋថៃសរុប មានចំនួន ៤៨២ពាន់លានដុល្លារ ដែលស្ថិតក្នុងចំណោមកម្រិតខ្ពស់បំផុតនៅអាស៊ី។

រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បានប្រាប់ថា គណៈរដ្ឋមន្ត្រីក៏បានយល់ព្រមអនុញ្ញាតឱ្យ ធនាគារបន្ថយការបង់វិភាគទានប្រចាំឆ្នាំពី០.៤៦ មកចំនួន ០.២៣ភាគរយ នៃប្រាក់បញ្ញើរបស់ពួកគេ ទៅកាន់មូលនិធិអភិវឌ្ឍន៍ស្ថាប័នហិរញ្ញវត្ថុ ហៅកាត់ FIDFសម្រាប់រយៈពេលបីឆ្នាំ។ មន្ត្រីបាននិយាយថា ការកាត់បន្ថយវិភាគទាននេះ នឹងជួយធនាគារដើម្បីមានលទ្ធភាពសម្រួលដល់កូនបំណុល៕

ប្រភពពី CNA ប្រែសម្រួល៖ សារ៉ាត