ភាពប៉ិនប្រសប់ និងទេពកោសល្យសម្តែងពីធម្មជាតិ ធ្វើឱ្យលោក Tom Cruise បានក្លាយជាវីរបុរសក្នុងបេះដូងកងទ័ពជើងទឹកអាមេរិក បន្ទាប់ពីតារាសម្តែងហូលីវូដលំដាប់ពិភពលោករូបនេះ បានទទួលមេដាយកិត្តិយសស៊ីវិលកំពូលពីយោធាអាមេរិក។ នេះបើតាមការចេញផ្សាយដោយសារព័ត៌មាន Channel News Asia។

ការទទួលបានមេដាយកិត្តិយសស៊ីវិលកំពូលពីកងទ័ពជើងទឹកអាមេរិកនេះ កើតឡើងបន្ទាប់ពីលោក Tom Cruise បានបង្ហាញទេពកោសល្យយ៉ាងឆ្នើមលើកស្ទួយមុខមាត់កងទ័ពជើងទឹក និងកងម៉ារីនអាមេរិក តាមរយៈការសម្តែងនៅក្នុងខ្សែភាពយន្តហូលីវូដដ៏ល្បីល្បាញ ដែលមានចំណងជើងថា «Top Gun: Maverick» និងខ្សែភាពយន្តផ្សេងៗទៀត។

លោក Cruise ដែលកំពុងបំពេញការងារនៅចក្រភពអង់គ្លេស បានទទួលមេដាយកិត្តិយសកំពូលនេះ ពីរដ្ឋមន្រ្តីកងទ័ពជើងទឹកអាមេរិក លោក Carlos Del Toro នៅក្នុងពិធីមួយនៅឯ Longcross Studios ស្ថិតនៅក្បែរទីក្រុងឡុងដ៍។

កំពូលតារាសម្តែងក្នុងវ័យ ៦២ឆ្នាំរូបនេះ បាននិយាយថា លោកពិតជាមានមោទនភាពណាស់ ដែលទទួលបានការទទួលស្គាល់មិនធម្មតា មានទាំងមេដាយ និងវិញ្ញាបនបត្រ។ ហើយលោក Cruise ក៏កោតសរសើរដល់កងទ័ពជើងទឹកទាំងអស់គ្នា ទាំងបុរស និងស្រ្តី ចំពោះការបំពេញភារកិច្ចប្រកបដោយការទទួលខុសត្រូវ។

ខ្សែភាពយន្តហូលីវូដ Top Gun ដែលជារឿងភាគផ្ទុះខ្លាំងក្នុងឆ្នាំ ១៩៨៦ បង្ហាញពី Cold War flying aces បានធ្វើឱ្យលោក Cruise ក្លាយជាកំពូលតារា ក៏ដូចជាបំផុស និងជំរុញស្មារតីពលរដ្ឋអាមេរិកយ៉ាងច្រើនចុះឈ្មោះចូលបម្រើយោធា រហូតដល់កងទ័ពជើងទឹករៀបចំតុជ្រើសរើសបុគ្គលិកនៅក្នុងរោងកុនទៀតផង។

ក្រោយមកក៏ផ្ទុះការចាប់អារម្មណ៍ម្តងទៀត ជាមួយនឹងខ្សែភាពយន្តហូលីវូដ Top Gun: Maverick ឆ្នាំ២០២២ ដែលក្នុងនោះតួអង្គរបស់ Cruise ក៏បានបង្ហាញពីអនុភាពយន្តហោះជំនាន់ថ្មីរបស់សហរដ្ឋអាមេរិកផងដែរ។

ឆ្លងកាត់អាជីពសិល្បៈរយៈពេល៥ទសវត្សរ៍មកនេះ កំពូលតារាភាពយន្ត លោក Tom Cruise រកចំណូលបានជាង ១២ពាន់លានដុល្លារទូទាំងពិភពលោក ហើយការចាក់បញ្ចាំងរឿង «Top Gun: Maverick» ឆ្នាំ២០២២ រកចំណូលបានជិត ១.៥ពាន់លានដុល្លារ។
នេះបើយោងតាមក្រុមហ៊ុន Comscore។

ខ្សែភាពយន្តថ្មីបំផុតរបស់លោក Cruise គឺ «Mission: Impossible–Dead Reckoning Part One» រកចំណូលបាន ៥៦៨លានដុល្លារក្នុងតារាង Box Office ទូទាំងពិភពលោក៕

ប្រភព ៖ CNA ប្រែសម្រួល ៖ ឈឹម ទីណា