ផ្សព្វផ្សាយខ្លឹមសារសង្ឃប្រកាសអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣២ ដល់ព្រះមន្ត្រីសង្ឃ ព្រះគ្រូចៅអធិការ អាចារ្យគណៈកម្មការវត្តទូទាំងខេត្តកំពត
កំពត៖ពិធីសំណេះសំណាល និងផ្សព្វផ្សាយខ្លឹមសារសង្ឃប្រកាសអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣២ ដល់ព្រះមន្ត្រីសង្ឃ ព្រះគ្រូចៅអធិការ អាចារ្យគណៈកម្មការវត្តទូទាំងខេត្តកំពត នាព្រឹកថ្ងៃទី ២០ ខែ ធ្នូ ឆ្នាំ២០២៤ ឯកឧត្តមបណ្ឌិត ប៉ែន ស៊ីម៉ន តំណាងរាស្រ្តមណ្ឌលខេត្តកំពត ប្រធានគណៈកម្មការទី១០នៃរដ្ឋសភា នីតិកាលទី៧ ប្រធានក្រុមការងារគណបក្សប្រជាជនកម្ពុជា បានរំលេចពីសារសំខាន់នៃវិស័យព្រះពុទ្ធសាសនា តួនាទីរបស់ព្រះសង្ឃ សមណសិស្សគ្រប់អង្គ ក្នុងចូលរួមចំណែករក្សាសុខសន្តិភាព សុវត្ថិភាព សណ្តាប់ធ្នាប់សាធារណៈសង្គម លើកកម្ពស់កិត្យានុភាព តម្លៃ និងសេចក្តីថ្លៃថ្នូរ របស់ព្រះសង្ឃពុទ្ធសាសនា ព្រមទាំងរក្សាការពារ និងលើកស្ទួយព្រះពុទ្ធសាសនាដែលជាសាសនារបស់រដ្ឋឱ្យបានគង់វង្ស ស្ថិតស្ថេរចីរកាល ។
តាមរបាយការណ៍របស់ លោក នាក់ យិតថូ ប្រធានមន្ទីរធម្មការ និងសាសនា នៅក្នុងឆ្នាំ ២០២៤នេះខេត្តកំពតមានវត្តចំនួន២៧៤វត្ត ក្នុងនោះ វត្តគណៈមហានិកាយ ចំនួន២៤៧វត្ត. និងវត្តគណៈធម្មយុត្តិកនិកាយ ចំនួន២៧វត្ត ព្រះសង្ឃសរុបចំនួន២.៦៣៧ អង្គ (គណៈមហានិកាយចំនួន២.៤៤៦អង្គ) លោកអាចារ្យប្រចាំវត្តចំនួន ៩០៣ នាក់ អាចារ្យយោគី ចំនួន២១៥ នាក់ អាចារ្យមង្គលការ ចំនួន៣៧៥នាក់ និងគណៈកម្មការវត្ត មានចំនួន១.៥៩៦នាក់ ។
ក្នុងឱកាសនោះដែរ ឯកឧត្តមបណ្ឌិត ប៉ែន ស៊ីម៉ន បានប្រគេនបច្ច័យដល់ព្រះសង្ឃ និងថវិកាដល់គណៈកម្មការអាចារ្យវត្ត រួមនិងចង្ហាន់សរុបជាង៥០លានរៀល៕
ដោយ៖ សិលា សារិន
