ប៉េកាំង ៖ អវកាសយានិកចិនពីរនាក់នៅលើស្ថានីយអវកាស Tiangong បានបំបែកឯតទគ្គកម្មពិភពលោក សម្រាប់ការដើរក្នុងលំហអាកាសបានយូរបំផុត ដោយបានបំបែកកំណត់ត្រាកាលពីជាង ២ទសវត្សរ៍មុន ដោយកម្មវិធីអវកាសអាមេរិក។ នេះបើតាមការចុះផ្សាយរបស់សារព័ត៌មាន CGTN។

ទីភ្នាក់ងារអវកាសចិន ហៅកាត់ (CMSA) បាននិយាយថា ក្រុមអវកាសយានិកនៃយាន Shenzhou-19 បានបញ្ចប់ការដើរក្នុងលំហអាកាសរយៈពេល ៩ម៉ោងដោយជោគជ័យ ក្នុងនោះរួមមានទាំងអវកាសយានិកកើតក្នុងឆ្នាំ ១៩៩០។

ទីភ្នាក់ងារ CMSA បានឲ្យដឹងថា នៅម៉ោង ៩.៥៧យប់ (ម៉ោងក្នុងតំបន់) កាលពីថ្ងៃអង្គារសប្តាហ៍នេះ សមាជិកអវកាសយានិកនៃយាន Shenzhou-19 លោក Cai Xuzhe និងលោក Song Lingdong បានបញ្ចប់សកម្មភាពក្រៅអាកាស ហៅកាត់ (EVA) ដោយជោគជ័យ ដោយពួកគេបានដំឡើងឧបករណ៍ការពារអវកាស និងធ្វើការថែទាំនៅខាងក្រៅស្ថានីយអវកាស Tiangong។

សារព័ត៌មាន Space News បានរាយការណ៍ថា កំណត់ត្រាពីមុនត្រូវបានបង្កើតឡើងកាលពីថ្ងៃទី១១ ខែមីនា ឆ្នាំ ២០០១ នៅពេលដែលអវកាសយានិកអាមេរិក James Voss និង Susan Helms បានចំណាយពេល ៨ម៉ោង និង ៥៦នាទីនៅខាងក្រៅយានអវកាស Discovery ក្នុងអំឡុងពេលបេសកកម្មទៅកាន់ស្ថានីយ៍អវកាសអន្តរជាតិ។ នេះបើតាមប្រភពរបស់អង្គការ NASA៕

ប្រភព ៖ CGTN និង Space News ប្រែសម្រួល ៖ ឈឹម ទីណា