អាជ្ញាធរខេត្តបាត់ដំបងជំរុញឱ្យភាគីពាក់ព័ន្ធចូលរួមផ្សព្វផ្សាយដល់ក្រុមគោលដៅ១,៥លាននាក់ ឱ្យចូលរៀនជំនាញបច្ចេកទេស និងវិជ្ជាជីវៈ
បាត់ដំបង៖មន្រ្តីជាន់ខ្ពស់នៃអាជ្ញាធរខេត្តបាត់ដំបង បានជំរុញដល់ភាគីពាក់ព័ន្ធទាំងអស់យកចិត្តទុកដាក់ឱ្យកាន់តែសកម្មថែមទៀតបង្កើនការផ្សព្វផ្សាយឱ្យដល់មូលដ្ឋានដើម្បីការកៀរគរក្រុមគោលដៅ១,៥លាននាក់ឱ្យចូលរៀនជំនាញបច្ចេកទេសវិជ្ជាជីវៈ។
លោក ទីន សារ៉ាវុធ អភិបាលរងខេត្តបាត់ដំបងក៏បានជំរុញដល់មន្ទីរ អង្គភាព អាជ្ញាធរក្រុង ស្រុក ឃុំ សង្កាត់ ត្រូវសហការជាមួយគ្រឹះស្ថានបណ្ដុះបណ្ដាលសាធារណៈឱ្យបន្តយកចិត្តទុកដាក់បន្ថែមទៀត ក្នុងការបង្កើននូវការចុះផ្សព្វផ្សាយពីកម្មវិធី១.៥លាននាក់របស់រាជរដ្ឋាភិបាល ឱ្យកាន់តែជ្រួតជ្រាបទៅដល់តាមមូលដ្ឋាន ជាពិសេសយុវជនមកពីគ្រួសារក្រី និងគ្រួសារងាយរងហានិភ័យឱ្យចូលរៀនជំនាញបច្ចេកទេសវិជ្ជាជីវៈ។
ថ្លែងក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២៤និងលើកទិសដៅការងារបន្ត និងពង្រឹងសមត្ថភាពលើយន្តការគ្រប់គ្រង នៃវិស័យការងារ និងជំរុញការផ្សព្វផ្សាយចុះឈ្មោះចូលរៀនជំនាញរបស់គណៈកម្មាធិការបណ្ដុះបណ្ដាលខេត្ត នៅវិទ្យាស្ថានពហុបច្ចេកទេសភូមិភាគតេជោសែនបាត់ដំបងកាលពីថ្ងៃទី១៩ ខែធ្នូ ឆ្នាំ២០២៤ លោកអភិបាលរងខេត្តបានបន្តថា ការសិក្សាជំនាញបច្ចេកទេសវិជ្ជាជីវៈ គឺសំដៅផ្ដល់ឱ្យយុវជន មានជំនាញច្បាស់លាស់ក្នុងជីវិត ដើម្បីបង្កើនកម្លាំងពលកម្មជំនាញ និងដើម្បីសម្រេចឱ្យបាននូវចក្ខុវិស័យកម្ពុជាក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
លោក ទីន សារ៉ាវុធ ក៏បានបង្ហាញពីមោទនភាពផងដែរ ដែលខេត្តបាត់ដំបង មានអ្នកចូលរៀនជំនាញបច្ចេកទេសវិជ្ជាជីវៈច្រើនជាងគេបន្ទាប់ពីរាជធានីភ្នំពេញតែទោះយ៉ាងណាក៏ត្រូវតែជំរុញការផ្សព្វផ្សាយឱ្យកាន់តែខ្លាំងបន្ថែមទៀតដើម្បីធ្វើការបញ្ជ្រាបបន្ថែមទៀតឱ្យទៅដល់មូលដ្ឋានផ្ទាល់ដើម្បីសម្រេចបានគោលដៅដែលរាជរដ្ឋាភិបាលបានដាក់ចេញ។
ជុំវិញសកម្មភាពបណ្ដុះបណ្ដាលវិជ្ជាជីវៈនេះដែរ លោក មាស ដារ៉ា ប្រធានមន្ទីរការងារ និងបណ្ដុះបណ្ដាលវិជ្ជាជីវៈ បានឱ្យដឹងថា គណៈកម្មាធិការបណ្តុះបណ្តាលខេត្តបាត់ដំបងដែលមានគ្រឹះស្ថានសាធារណៈ ចំនួន៣ និងភាគីពាក់ព័ន្ធបានចុះធ្វើការផ្សព្វផ្សាយវគ្គ១,៥លាននាក់ របស់រាជរដ្ឋាភិបាលជំហានទី១ ដល់ប្រជាពលរដ្ឋនៅតាមមូលដ្ឋានក្រុង ស្រុក ក្នុងខេត្តបាត់ដំបង មកទល់ពេលនេះមានចំនួនសិស្សដែលចុះឈ្មោះចូលរៀននៅតាមគ្រឹះស្ថានអប់រំបណ្ដុះបណ្ដាល បច្ចេកទេស និងវិជ្ជាជីវៈសាធារណៈទាំង៣ ចំនួន១៣ ១៤០នាក់ ក្នុងនោះសិស្សគោលដៅសរុប ៧ ៥៤៤នាក់។ សិស្សកំពុងសិក្សាចំនួន ៥ ៧៥៣នាក់ និងសិស្សគោលដៅសរុប៣ ៦៣៩នាក់។ចំណែកសិស្សបានប្រលងបញ្ចប់ សរុបចំនួន ៤ ០៣៨នាក់សិស្សគោលដៅសរុប ១ ៩៦២ នាក់។សិស្សទទួលបានការងារចំនួន២ ៥២១នាក់ ,សិស្សគោលដៅសរុប ១ ២៤៥នាក់។
សូមបញ្ជាក់ថា កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស សម្រាប់ក្រុមគោលដៅជាយុវជនមកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេសមានចំនួន១,៥លាននាក់ ។គោលបំណងចម្បង របស់រាជរដ្ឋាភិបាលគឺផ្ដល់នូវជំនាញមួយយ៉ាងតិចប្រចាំជីវិតដល់យុវជន ដើម្បីទទួលបានឱកាសការងារឬបង្កើតមុខរបរដោយខ្លួនឯងនិងប្រកបដោយភាពម្ចាស់ការមានគុណភាព និងផលិតភាពខ្ពស់ សម្រាប់ផ្គត់ផ្គង់ ព្រមទាំងឆ្លើយតបបានតាមតម្រូវការនៃទីផ្សារ ប្រកបដោយចីរភាព ភាពធន់ និងបរិយាបន្ន។សិស្សដែលបានចុះឈ្មោះចូលរៀន និងទទួលបាន៖ការសិក្សាដោយមិនបង់ថ្លៃ, មានរបបប្រាក់ឧបត្ថម្ភប្រចាំខែ,ការប្រឹក្សាយោបល់ពីការជ្រើសរើសជំនាញ និងព័ត៌មានទីផ្សារការងារ, ការចុះធ្វើកម្មសិក្សានៅតាមសហគ្រាស គ្រឹះស្ថាន ក្រុមហ៊ុន រោងចក្រ, និងជំនាញមួយពិតប្រាកដ ដែលទីផ្សារការងារកំពុងត្រូវការ និងឱកាសទទួលបានការងារធ្វើសមរម្យ និងប្រាក់ចំណូលទៀងទាត់៕
អត្ថបទ-រូបភាព៖ អ៊ុក សំអាន បប.
