ក្រុងកំពង់ចាមមានទីលានទុកដាក់សំរាមថ្មី តម្លៃជិត៩លានដុល្លារ
កំពង់ចាម៖ទីលានទុកដាក់សំរាមក្រុងកំពង់ចាម ត្រូវបានសម្ពោធជាផ្លូវការកាលពីព្រឹកថ្ងៃទី២៤ ខែធ្នូ ឆ្នាំ២០២៤ ក្រោមអធិបតីភាពឯកឧត្តម រស់ វណ្ណា រដ្ឋលេខាធិការ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ឯកឧត្តម អ៊ុន ចាន់ដា អភិបាលខេត្តកំពង់ចាម លោកស្រី យូសាណា វ៉ាម៉ា នាយិកាធនាគារអភិវឌ្ឍន៍អាស៊ី (ADB) ប្រចាំព្រះរាជាណាចក្រកម្ពុជា។
ទីលានទុកដាក់សំរាមក្រុងកំពង់ចាមថ្មីនេះស្ថិតក្នុងគម្រោងអភិវឌ្ឍន៍ក្រុងរបៀងមហាអនុតំបន់មេគង្គជំហានទី៤ ក្រោមកម្ចីឥណទានសម្បទានពីធនាគារអភិវឌ្ឍន៍អាស៊ី មានតម្លៃប្រមាណជិត៩លានដុល្លារអាមេរិក ។ការដ្ឋាននេះបានសាងសង់រយៈពេល ១៧ខែ ដោយគិតចាប់ពីថ្ងៃទី៥ ខែមករា ឆ្នាំ២០២៤ ។ទីលាននេះ សាងសង់លើផ្ទៃដីទំហំ ១៨,៦៨ហិកតា ស្ថិតនៅក្នុងភូមិកោះរកា ឃុំកោះរកា ស្រុកកំពង់សៀម ដែលមានចម្ងាយប្រហែល ២៥គីឡូម៉ែត្រ ពីក្រុងកំពង់ចាម ។
នាឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម មានប្រសាសន៍ថា ដោយសារបរិមាណសំរាម នៅក្នុងខេត្តកំពង់ចាម មានការកើនឡើង ជាប្រចាំថ្ងៃ ដែលធ្វើឱ្យទីលានទុកដាក់សំរាមបច្ចុប្បន្ន មិនអាចធានាបាននូវកាទុកដាក់សំរាមប្រកបដោយសុវត្ថិភាព និងចីរភាព ។ឯកឧត្តមបន្តថា ដោយមានការយកចិត្តទុកដាក់ពីសំណាក់រាជរដ្ឋាភិបាល និងក្រសួងពាក់ព័ន្ធ ក្នុងការដោះស្រាយផលប៉ះពាល់បរិស្ថាន ក្នុងន័យដំណើរប្រទេសជាតិឆ្ពោះទៅរក «បរិស្ថានរូបវន្ត និងធម្មជាតិប្រកបដោយ សុខដុមភាព, ភាពធន់, បរិយាបន្ន»ទើបរាជរដ្ឋាភិបាល តាមរយៈក្រសួងសាធារណការ និងដឹកជញ្ជូន បានជ្រើសរើសយកខេត្តកំពង់ចាម អនុវត្តគម្រោងអភិវឌ្ឍន៍ក្រុងរបៀង មហាអនុតំបន់មេគង្គ ជំហានទី៤ ដែលបានសម្រេចសាងសង់ទីលានទុកដាក់សំរាមក្រុងកំពង់ចាម ស្របតាមស្តង់ដាបច្ចេកទេសក្នុងការកាត់បន្ថយផលប៉ះពាល់បរិស្ថាន ។
ឯកឧត្តម រស់ វណ្ណា រដ្ឋលេខាធិការក្រសួងសាធារណការមានប្រសាសន៍ថា ការកសាងទីលានទុកដាក់សំរាម មានសារៈសំខាន់ណាស់ ព្រោះសំរាមជាវត្ថុធាតុដើម ដែលអាចបង្កើតការងារជូនដល់ប្រជាពលរដ្ឋ តាមរយៈ ការញែកសំរាម និងកែច្នៃទៅជាគុណប្រយោជន៍ សម្រាប់ការប្រើប្រាស់ផ្សេងៗ ។ទីលានទុកដាក់សំរាមនេះ នឹងចូលរួមចំណែក ក្នុងការលើកកម្ពស់គុណភាព ការរស់នៅក្នុងតំបន់ និងតំបន់ជុំវិញ ទីតាំងទុកដាក់សំរាមនេះ ជាពិសេស ការកាត់បន្ថយបញ្ហាប្រឈម ទៅលើកត្តាសុខភាព និងការបំពុល បំផ្លាញបរិស្ថានផងដែរ៕
អត្ថបទនិងរូបភាព៖លី ពៅ
