បុណ្យដាលាន ដាល់អំបុកឈ្នះឈ្នះ នៅក្រុងរុនតាឯកតេជោសែន
នៅថ្ងៃទី២៩ ខែធ្នូ ឆ្នាំ២០២៤ ក្រុងរុនតាឯកតេជោសែន ស្រុកបន្ទាយស្រី ខេត្តសៀមរាប នឹងប្រារព្ធពិធីបុណ្យដាលាន ដាល់អំបុកឈ្នះឈ្នះ ខណៈកាលពីព្រឹកថ្ងៃទី២៨ ខែធ្នូ សម្ដេចកិត្ដិសង្គហបណ្ឌិត ម៉ែន សំអន ឧត្ដមប្រឹក្សាផ្ទាល់ព្រះមហាក្សត្រ និងជាប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា និងឯកឧត្តមបណ្ឌិត សួន សេរីរដ្ឋា ប្រធានក្រុមប្រឹក្សាភិបាល វេទិកាសន្តិភាពកម្ពុជា បានអញ្ជើញជាអធិបតីក្នុងពិធីក្រុងពាលីសម្រាប់កម្មវិធីដាលាន ដាល់អំបុកឈ្នះឈ្នះលើកទី៤។
ជាការកត់សម្គាលព្រឹត្តិការណ៍ដាលាន ដាល់អំបុកឈ្នះឈ្នះ ក្រុងរុនតាឯកតេជោសែនបានប្រារព្ធឡើងស្របពេលនៃការប្រារព្ធខួបលើកទី២៦ នៃទិវាសន្តិភាពនៅកម្ពុជាដែរ។ឯកឧត្ដមបណ្ឌិត សួន សេរីរដ្ឋា បានរំលឹកថា ពិធីដាលាន ដាល់អំបុកឈ្នះឈ្នះនេះ ធ្វើឡើងជាលើកទី៤ ដើម្បីអបអរវេទិកាសន្ដិភាព ដែលបានចាប់កំណើតតាំងពីឆ្នាំ២០២១ ដែលមកដល់ថ្ងៃទី២៩ ខែធ្នូនេះ មានរយៈពេលបួនឆ្នាំ។ឯកឧត្តមបន្តថា កម្មវិធីដាលាន ដាល់អំបុកឈ្នះឈ្នះនេះធ្វើឡើងជាលើកទី៤ ។លើកទី១ធ្វើនៅខេត្ដកំពង់ឆ្នាំង ,លើកទី២នៅខេត្ដបន្ទាយមានជ័យ ,លើកទី៣នៅខេត្ដបាត់ដំបង និងលើកទី៤ នៅក្រុងរុនតាឯកតេជោសែននេះតែម្តង។
ឯកឧត្តមបន្ថែមថា កម្មវិធីដារលាន ដាល់អំបុកឈ្នះឈ្នះ ជាពិធីមួយមិនត្រឹមតែអបអរថ្ងៃកំណើតវេទិកាសន្ដិភាពនេះទេ គឺធ្វើឡើងជាការផ្សព្វផ្សាយពីការកសាងសន្ដិភាព ពីគុណតម្លៃនៃសន្តិភាព និងផ្សព្វផ្សាយពីកាតព្វកិច្ចរបស់ប្រជាពលរដ្ឋខ្មែរ ដែលបានចូលរួមការពារសន្តិភាព។
គួរជម្រាបថា ពិធីបុណ្យដាលាន ជាពិធីបុណ្យទំនៀមទម្លាប់ប្រពៃណីខ្មែរមានតាំងពីបុរាណកាលមក បន្ទាប់ពីប្រជាពលរដ្ឋបានប្រមូលផលស្រូវ ។ដោយឡែកដាល់អំបុកឈ្នះឈ្នះ គឺភ្ជាប់នឹងនយោបាយឈ្នះឈ្នះ របស់សម្ដេចតេជោ ហ៊ុន សែន អតីតនាយករដ្ឋមន្ដ្រី ដែលសម្ដេចបានលះបង់គ្រប់យ៉ាងដើម្បីរកសន្តិភាពជូនប្រទេសជាតិ ។កម្មវិធីនេះ បានភ្ជាប់ប្រពៃណីនិងប្រវត្ដិសាស្ដ្រមរតកសន្ដិភាពសម្ដេចតេជោ។
ក្នុងកម្មវិធីដាលាន ដាល់អំបុកឈ្នះ ឈ្នះ នេះដែរ សម្ដេចកិត្ដិសង្គហបណ្ឌិត ម៉ែន សំអន នឹងអញ្ជើញបញ្ជាន់ស្រូវជានិមិត្ដរូប និងដាល់អំបុក ព្រមទាំងទស្សនាស្ដង់ពិព័រណ៍បន្លែ ត្រីសាច់ និងរាំវង់សន្ដិភាព។
ឯកឧត្ដមបណ្ឌិត សួន សេរីរដ្ឋា បានបញ្ជាក់ថា កម្មវិធីធ្វើនៅក្រុងរុនតាឯកតេជោសែននេះ ចង់បង្ហាញពីការអភិវឌ្ឍរបស់ក្រុងនេះផងដែរ ។ក្រុងរុនតាឯកតេជោសែននេះ មានការអភិវឌ្ឍយ៉ាងឆាប់រហ័ស ។ជាក់ស្ដែងសំណង់អគារ ផ្ទះប្រជាពលរដ្ឋ ជាពិសេសផ្សារក្រុងរុនតាឯកតេជោសែន មានភាពធំទូលាយជាងគេក្នុងចំណោមផ្សារក្នុងក្រុងនៃព្រះរាជាណាចក្រកម្ពុជា៕
ដោយ៖ប៊ុន រដ្ឋា
