ភ្នំពេញ៖ចាប់តាំងពីរសៀលថ្ងៃទី៣១ ខែធ្នូ ឆ្នាំ២០២៤ នៅតំបន់ប្រារព្ធ​ព្រឹត្តិការណ៍ «សាទរកម្ពុជា» ឬ «Celebrating Cambodia» នាខាងមុខព្រះបរមរាជវាំង ពោរពេញទៅដោយប្រជាពលរដ្ឋ ទេសចរ​ជាតិ អន្តរជាតិ មកទស្សនាការតុបតែងរូបភាពល្អប្លែក​ពុំធ្លាប់​មានពីមុនមក ។

ជាមួយការតុបតែង និងរូបភាពដាក់តាំងទាំងឡាយ បានទាក់ទាញ​អ្នកធ្វើដំណើរកម្សាន្ត្ត និងរង់ចាំទស្សនាទស្សនីយភាពនានា
ដែលនឹង​ចាប់​ផ្តើមនៅពេលថ្ងៃអស្តង្គត រហូតពាក់កណ្ដាល​អធ្រាត្រនៃការប្រារព្ធពិធីឆ្លងឆ្នាំ។

យោងតាមសេចក្តីប្រកាសព័ត៌មាន ស្តីពីការរៀបចំព្រឹត្តិការណ៍ “សាទរកម្ពុជា» ឆ្នាំ២០២៤ កាលពីថ្ងៃទី៣០ ខែធ្នូ​បានឱ្យដឹង​ថា គណៈកម្មការរៀបចំព្រឹត្តិការណ៍ “សាទរកម្ពុជា» មានកិត្តិយសសូម​ជម្រាបជូនសាធារណជននិងបណ្តា ផ្សព្វផ្សាយ​ទាំងអស់​មេត្តាជ្រាបថាព្រឹត្តិការណ៍ «សាទរកម្ពុជា” ឬ “Celebrating Cambodia” នឹងប្រារព្ធឡើងនៅ វេលាអស្តង្គត​ចាប់​ពីម៉ោង៣រសៀល នៅថ្ងៃទី៣១ ខែធ្នូ ឆ្នាំ២០២៤ ហើយបន្តរហូតដល់វេលាឆ្លង​ឆ្នាំសាកល២០២៥។

ព្រឹត្តិការណ៍ «សាទរកម្ពុជា» ជាព្រឹត្តិការណ៍នៃការអបអរសាទរ​ដល់​សង្គមមួយដែលប្រកបដោយភាពរស់ រវើកជាមួយនឹង​ការបង្ហាញ​វិសេសភាពនៃ «អត្តសញ្ញាណ» ដោយសមានចិត្តសោមនស្ស​ចំពោះអ្វីៗដែលឆ្លងកាត់ និងជ័យជម្នះនិងការ​លើកតម្កើង «មោទន​ភាព» ក្នុងភាពជាប្រជាជាតិមួយ។

ព្រឹត្តិការណ៍ “សាទរកម្ពុជា» ជា ការអបអរសាទរនូវគុណតម្លៃ​រួមគ្នាដើម្បីបង្ហាញ មោទនភាព ចំពោះបណ្តាសមិទ្ធផល​នៃ​ការអភិវឌ្ឍសង្គម សេដ្ឋកិច្ចកម្ពុជាជាមួយការរក្សាបាននូវ «អត្តសញ្ញាណ» នៃប្រជាជាតិ និងប្រជាជន និង «ការអបអរសាទរ ដល់ការរួមរស់ជាមហាគ្រួសារខ្មែរតែមួយ។ មិនត្រឹមតែប៉ុណ្ណោះ ព្រឹត្តិការណ៍នេះ គឺផ្តល់ជាវេទិកា និងឱកាសដល់គ្រប់ កោសិកា​សង្គម គ្រប់ស្រទាប់វណ្ណៈ គ្រប់សហគមន៍ និងមជ្ឈដ្ឋាន បង្ហាញនូវមោទន​ភាពចំពោះអត្តសញ្ញាណរបស់ខ្លួន ក្រោម «ទង់នៃព្រះរាជាណា​ចក្រកម្ពុជា» ដោយការរួបរួម។

គណៈកម្មការរៀបចំ បានបញ្ជាក់ដល់អ្នកសារព័ត៌មាន ប្រព័ន្ធផ្សព្វផ្សាយទាំងអស់​មេត្តាជ្រាបជាព័ត៌មាន និងចូលរួម​ផ្សព្វផ្សាយទៅកាន់សាធារណៈ ជនឱ្យបានទូលំទូលាយ ដើម្បីចូលរួមព្រឹត្តិការណ៍ «សាទរកម្ពុជា» ឬ «Celebrating Cambodia»៕

ដោយ៖ ខាន់ ទិត្យវីរ៉ាយ៉ា