ស្ទឹងត្រែង៖មន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង កាលពី​​ថ្ងៃទី៥ ខែមករា ឆ្នាំ​២០២៥ បានរៀបចំ​កិច្ចប្រជុំបូក​សរុប​លទ្ធផលការងារឆ្នាំ២០២៤ និងលើកទិសដៅការងារឆ្នាំ​២០២៥​ក្រោមអធិបតីភាពឯកឧត្តម សេន សុវណ្ណ រដ្ឋលេខា​ធិការក្រសួង​កសិកម្ម រុក្ខាប្រមាញ់ និងនេសាទ ឯកឧត្តម ចាន់ សារុទ្ធ អនុរដ្ឋលេ​ខាធិការ លោក ព្រំ វណ្ណៈ អភិបាលរងខេត្ត​ស្ទឹងត្រែង និង ថ្នាក់ដឹកនាំ មន្រ្តីនៃមន្ទីរកសិកម្មខេត្តស្ទឹងត្រែង។

លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹង​ត្រែង​បានបង្ហាញលទ្ធផលថា រយៈពេល មួយ​ឆ្នាំ​កន្លង​មកនេះ លើការបង្កបង្កើនផលដំណាំស្រូវសម្រេចបាន ២៨ ៥៩២ហិកតា ដំណាំសាកវប្បកម្មអនុវត្តបាន ៥ ៩៤០ហិតា ដំណាំឧស្សាហកម្មចំនួន ៤៤ ៥១៣ហិកតា ។ចំណែកទិន្នផលស្រូវផលិតបានក្នុងបរិមាណ​គ្រប់គ្រាន់តម្រូវការប្រជាជន ១៨៣ ៤៧៧នាក់ និងមានតុល្យភាព​ស្បៀងប្រមាណ ២៦ ២៣៧តោន គិតជា អង្ករ ស្បៀងនៅសល់ ១៧ ៤០៩តោន។

ដោយឡែកចំពោះវិស័យព្រៃឈើ បានអនុវត្តតាមច្បាប់ស្តីពីព្រៃឈើ លិខិតបទដ្ឋានគតិយុត្តិ និងចាត់វិធានការទប់ស្កាត់ និង​បង្រ្កាបបទ​ល្មើស ព្រមទាំងចងក្រងសំណុំរឿងបទល្មើសព្រៃឈើ ៧០ករណី បញ្ជូនសំណុំរឿងទៅតុលាការ ៦៧ករណី។, វិស័យជលផល បានអនុវត្តនូវវិធានការអភិរក្ស និងទប់ស្កាត់នូវបទល្មើសជលផល​គ្រប់ប្រភេទក្នុងភូមិសាស្រ្តខេត្ត ដោយបាន​សហការល្អជាមួយកង​កំលាំងប្រដាប់អាវុធ អាជ្ញាធរមូលដ្ឋាន ឆ្មាំទន្លេ និងគណៈកម្មការ​សហគមន៍ ,មន្ទីរកសិកម្មខេត្ត មានសហគមន៍កសិកម្ម ៣៩សហគមន៍ សហគមន៍នេសាទ ៦២សហគមន៍ និងសហគមន៍ព្រៃឈើ ២១​សហគមន៍ ។

ចំពោះការងារផលិតកម្មសត្វ មានប្រជាពលរដ្ឋចិញ្ចឹមសត្វជា​លក្ខណៈ​គ្រួសារ និងចិញ្ចឹមជាលក្ខណៈពាណិជ្ជកម្ម ៦៩ ៤៨៥​គ្រួសារ។
ដោយឡែកការងារសម្បទានដីសេដ្ឋកិច្ចមាន ១២ក្រុមហ៊ុន មានផ្ទៃ​ដីឈូសឆាយសរុប ២៧ ៣៨៩ហិកតា ហើយបានធ្វើការ​ដាំដុះគិតពី​ពេលចាប់ផ្តើមអនុវត្តរហូតដល់ចុងឆ្នាំ២០២៤ ក្រុមហ៊ុនបាន​ដាំដុះ​លើផ្ទៃដី សរុប ១៩ ២៩៣ហិកតា និងការ​ចិញ្ចឹមជ្រូក ១២ ៥០០ក្បាល ។

លោក ទុំ នីរ៉ូ បានបញ្ជាក់ថា ក្នុងរយៈពេលមួយឆ្នាំមកនេះ មន្ទីរបានពង្រឹង និងអនុវត្តនូវធនធានមនុស្ស ដើម្បីធ្វើឱ្យ​មន្ទីរ​ឈានទៅសម្រេបានតាមផែនការ និងទិសដៅរបស់អង្គភាព ក្រោមការដឹកនាំចង្អុលបង្ហាញពីថ្នាក់ដឹកនាំក្រសួងកសិកម្ម ថ្នាក់ដឹកនាំខេត្តស្ទឹងត្រែង និងកិច្ចសហការល្អពីគ្រប់មជ្ឈដ្ឋាន អាជ្ញាធរដែនដី ស្ថាប័ន អង្គភាពពាក់ព័ន្ធ និងប្រជាកសិករ​ក្នុងស្ទឹងត្រែង៕

ដោយ៖ឡុង សំបូរ