សម្តេចពិជ័យសេនា ទៀ បាញ់ អញ្ជើញសំណេះសំណាលជាមួយនិវត្តន៍ជនជាងពីរពាន់នាក់នៅខេត្តសៀមរាប
សៀមរាប៖សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ ,អនុប្រធានគណបក្សប្រជាជនកម្ពុជា និង ជាប្រធានក្រុមការងារគណបក្សថ្នាក់កណ្តាល ចុះជួយមូលដ្ឋានខេត្តសៀមរាប បានអញ្ជើញជួបសំណេះសំណាលជាមួយនិវត្តន៍ជនជាងពីរពាន់នាក់ នៅទីស្នាក់ការគណៈកម្មាធិការគណបក្សប្រជាខេត្តសៀមរាប។ជំនួបកាលពីថ្ងៃទី១០ ខែមករា ឆ្នាំ២០២៥ ក្នុងឱកាសរំលឹកខួបអនុស្សាវរីយ៍ទី៤៦ទិវាជ័យជម្នះ៧មករា(៧មករា១៩៧៩-៧មករា២០២៥)។
មានប្រសាសន៍នាឱកាសនោះ សម្តេចពិជ័យសេនា ទៀ បាញ់ បានរំឮកនូវគុណបំណាច់របស់គណបក្សប្រជាជនកម្ពុជា ក្នុងការជួយសង្រ្គោះប្រជាជនកម្ពុជា ចេញពីរបបប្រល័យពូជសាសន៍ប៉ុល ពត, ជាពិសេសនយោបាយឈ្នះឈ្នះ ដែលធ្វើឱ្យប្រទេសកម្ពុជាទទួលបានសុខសន្តិភាពពេញលេញ ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា និងបន្តវេនដោយសម្ដេចធិបតី ហ៊ុន ម៉ាណែត ។សម្ដេចបញ្ជាក់ថា មានតែគណបក្សប្រជាជនកម្ពុជាតែមួយគត់ដែលនៅរួមសុខរួមទុក្ខជាមួយប្រជាជនគ្រប់កាលៈទេសៈ គ្រប់ការលំបាក ,ផ្ដល់ការលើកស្ទួយសិទ្ធិ សេរីភាពប្រជាពលរដ្ឋ និងយុត្តិធម៌សង្គម, ការពារកម្មសិទ្ធិស្របច្បាប់ជូនប្រជាជន ។
ទាក់ទងនឹងសមិទ្ធផលនានាដែលកំពុងកើតឡើងសម្តេចពិជ័យសេនា ទៀ បាញ់ បានបញ្ជាក់ថា ទាំងនេះសុទ្ធតែបានមកពីផ្លែផ្កានៃសុខសន្តិភាពរបស់កម្ពុជា ។ដូច្នេះដើម្បីការពារសុខសន្តិភាពយើងទាំងអស់គ្នាជាកូនចៅជំនាន់ក្រោយចូលរួម
ថែរក្សា ការពារសន្តិភាពឱ្យបានគង់វង់៕
ដោយ៖ប៊ុនរដ្ឋា
