រដ្ឋមន្ត្រីក្រសួងព័ត៌មាន៖ ត្រូវទប់ស្កាត់រាល់ព័ត៌មានក្លែងក្លាយ ព័ត៌មានប្រឌិត និងបន្សាបឱ្យបានទាន់ពេលនិងមានប្រសិទ្ធភាព
បាត់ដំបង៖ក្នុងឱកាសអញ្ជើញជាអធិបតីក្នុងពិធីប្រកាសចូលកាន់មុខតំណែងប្រធានមន្ទីរព័ត៌មានខេត្តបាត់ដំបងថ្មីកាលពីថ្ងៃទី១៣ ខែមករា ឆ្នាំ២០២៥ នាបន្ទប់ប្រជុំសាលាខេត្ត ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានបានណែនាំដល់ប្រធានមន្ទីរទើបចូលកាន់តំណែងថា ត្រូវអនុវត្តភារកិច្ចរបស់ខ្លួន ប្រកបដោយក្រមសីលធម៌វិជ្ជាជីវៈ មានឧត្តមគតិក្នុងការទទួលខុសត្រូវ។ត្រូវទប់ស្កាត់នូវរាល់ព័ត៌មានក្លែងក្លាយ ព័ត៌មានប្រឌិត និងបន្សាបព័ត៌មានទាំងនេះឱ្យបានទាន់ពេលវេលា និងមានប្រសិទ្ធភាព។
ដោយមានវត្តមានឯកឧត្តម អ៊ុយ រី ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលខេត្តបាត់ដំបង ព្រមទាំងមន្រ្តីថ្នាក់ដឹកនាំមន្ទីរ អង្គភាពនានាជុំវិញខេត្តចូលរួមផង ឯកឧត្តម នេត្រ ភក្រ្តា បានគូសរំលេចថា ខិតខំយកចិត្តទុកដាក់សហការជាមួយមន្ទីរ អង្គភាពជុំវិញខេត្ត និងអាជ្ញាធរដែនដីគ្រប់លំដាប់ថ្នាក់ដើម្បីរួមចំណែកក្នុងការអនុវត្គគោលនយោបាយ របស់រាជរដ្ឋាភិបាលពាក់ព័ន្ធទៅលើវិស័យព័ត៌មានឱ្យកាន់តែមានប្រសិទ្ធភាពខ្ពស់។ត្រូវគោរពគោលការណ៍ណែនាំចង្អុលបង្ហាញរបស់ថ្នាក់ដឹកនាំក្រសួង និងរដ្ឋបាលខេត្ត។ត្រូវប្រកាន់យកអភិក្រមបុរេសកម្ម ក្នុងការអនុវត្តការងារប្រកបដោយភាពផ្តួចផ្តើមនិងច្នៃប្រឌិត ស្របតាមបរិវត្តកម្មឌីជីថល ដើម្បីលើកកម្ពស់ការផ្សព្វផ្សាយ ជាវិជ្ជមាននៅរដ្ឋបាលថ្នាក់ ក្រោម ជាតិឱ្យកាន់តែទូលំទូលាយ និងចូលរួមក្នុងការប្រយុទ្ធប្រឆាំងនឹងព័ត៌មានក្លែងក្លាយ។ត្រូវទប់ស្កាត់នូវរាល់ព័ត៌មានក្លែងក្លាយ ព័ត៌មានប្រឌិត និងបន្សាបព័ត៌មានទាំងនេះឱ្យបានទាន់ពេលវេលា និងមានប្រសិទ្ធភាព។
ឯកឧត្តមរដ្ឋមន្រ្តីបន្តថា សារព័ត៌មាន មានតួនាទីសំខាន់ណាស់ក្នុងសង្គម សម្រាប់ជាកញ្ចក់ឆ្លុះបញ្ចាំងពីទិដ្ឋភាពជាក់ស្តែងក្នុងសង្គម និងជាស្ពានចម្លងព័ត៌មានពីប្រជាពលរដ្ឋ ទៅថ្នាក់ដឹកនាំ និងពីថ្នាក់ដឹកនាំ មកប្រជាពលរដ្ឋវិញ អំពីហេតុការណ៍ ស្ថានភាពនៅតាមមូលដ្ឋាននានា ពីសេចក្តីត្រូវការ និងការស្នើសុំជាដើម។ ដើម្បីឱ្យការងារទាំងនេះប្រព្រឹត្តទៅដោយរលូនលឿនរហ័សនិងមានប្រសិទ្ធភាពខ្ពស់ប្រធានមន្ទីរព័ត៌មានថ្មីត្រូវមានស្មារតីរក្សានូវទំនាក់ទំនងល្អជាមួយស្ថាប័នរដ្ឋ ឯកជន ក្រុមហ៊ុននិងមន្ទីរនានាជុំវិញខេត្តឱ្យបានល្អ។
ចំណែកឯកឧត្តម សុខ លូ អភិបាលខេត្តបាត់ដំបង បានកោតសរសើរចំពោះថ្នាក់ដឹកនាំនិងមន្ត្រីរាជការក្រោមឱវាទនៃមន្ទីរព័ត៌មានខេត្តបាត់ដំបង ដែលកន្លងមក បានរួមសាមគ្គីគ្នាបំពេញការងារអស់ពីសមត្ថភាព តាមជំនាញក្នុងព្រឹត្តការណ៍ធំៗនានា សម្រេចបានលទ្ធផលគាប់ប្រសើរទោះបីនៅមានបញ្ហាប្រឈមមួយចំនួនក្តី។
ដោយឡែក លោក សុវណ្ណ វិទិត្យា ប្រធានមន្ទីរព័ត៌មានដែលទើបប្រកាសចូលកាន់មុខតំណែងថ្មី ក៏បានប្តេជ្ញាចិត្ត ស្មោះត្រង់ចំពោះជាតិ សាសនា ព្រះមហាក្សត្រនិងគោរពតាមរដ្ឋធម្មនុញ្ញ។ប្តេជ្ញារួមចំណែកយ៉ាងសកម្មក្នុងការអនុវត្តកម្មវិធីនយោបាយរបស់រាជរដ្ឋាភិបាលនីតិកាលទី៧ ដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានិងអនុវត្តតាមបទបញ្ជាគោលការណ៍ណែនាំចង្អុលបង្ហាញរបស់ថ្នាក់ដឹកនាំក្រសួងនិងរដ្ឋបាលខេត្ត ។ប្រកាន់យកអភិក្រមបុរេសកម្មក្នុងការអនុវត្តការងារប្រកបដោយភាពផ្តួចផ្តើមនិងច្នៃប្រឌិតស្របតាមបរិវត្តកម្មឌីជីថល ដើម្បីលើកកម្ពស់ការផ្សព្វផ្សាយជាវិជ្ជមាន នៅរដ្ឋបាលថ្នាក់ក្រោមជាតិឱ្យកាន់តែទូលំទូលាយនិងចូលរួមក្នុងការប្រយុទ្ធប្រឆាំងនឹងព័ត៌មានក្លែងក្លាយនិងក្នុងស្មារតីទទួលខុសត្រូវខ្ពស់ ទាំងក្នុងការពង្រឹងវិន័យនិងពង្រីកសាមគ្គីភាពសហប្រតិបត្តិការ ឯកភាពផ្ទៃក្នុងឱ្យមានភាពរឹងមាំជាធ្លុងមួយ ដើម្បីគុណតម្លៃផលប្រយោជន៍រួមនិងប្តេជ្ញាអនុវត្តយ៉ាងខ្ជាប់ខ្ជួននូវតួនាទីភារកិច្ចសំដៅលើកកម្ពស់ប្រសិទ្ធិភាពការងារនិងកិច្ចសហប្រតិបត្តិការល្អជាមួយបណ្តាមន្ទីរ ស្ថាប័នអង្គភាពនានា និងអាជ្ញាធរមូលដ្ឋានគ្រប់លំដាប់ថ្នាក់ក្នុងការពង្រីកវិស័យព័ត៌មាននិងសោតទស្សន៍។ខិតខំប្រែក្លាយតួនាទីមន្ទីរព័ត៌មានឱ្យទៅជាស្ថាប័នទំនាក់ទំនងសាធារណៈរបស់រដ្ឋបាលខេត្តបាត់ដំបង។
សូមជម្រាបថា លោក សុវណ្ណ វិទិត្យា ត្រូវបានតែងតាំងប្រធានមន្ទីរព័ត៌មានខេត្តបាត់ដំបងថ្មី ជំនួសលោក សួស សុភ័ក្រ្ត ដែលត្រូវទទួលភារកិច្ចថ្មីជាសមាជិកក្រុមប្រឹក្សាខេត្តបាត់ដំបង ៕
អត្ថបទ-រូបភាព៖អ៊ុក សំអាន បប.
