បរទេស ៖ អ្នកគាំទ្រលោក ដូណាល់ ត្រាំ ដែលបានធ្វើដំណើរ ទៅកាន់រដ្ឋធានី Washington សហរដ្ឋអាមេរិក ដើម្បីចូលរួមពិធីស្បថចូលកាន់តំណែង នៅថ្ងៃចន្ទ បានបង្ហាញពីការខកចិត្ត បន្ទាប់ពីដឹងថា ព្រឹត្តិការណ៍នេះនឹងផ្លាស់ប្តូរទៅរៀបចំ នៅខាងក្នុងវិញ ដោយសារតែបារម្ភពីអាកាសធាតុត្រជាក់ ដែលគេព្យាករណ៍ថា ត្រជាក់ខ្លាំងពេក។

ការផ្លាស់ប្តូរផែនការមានន័យថា លោក Trump នឹងមិនឈរ នៅលើកាំជណ្តើរនៃវិមាន Capitol ដែលមើលមក National Mall ដែលជាធម្មតា មានហ្វូងមនុស្សយ៉ាងច្រើន ដើម្បីស្វាគមន៍ប្រធានាធិបតីថ្មី នោះទេ។ ផ្ទុយទៅវិញ ប្រធានាធិបតីនៃបក្សសាធារណរដ្ឋរូបនេះ នឹងថ្លែងសុន្ទរកថា ក្នុងពិធីស្បថចូលកាន់តំណែង របស់លោក នៅខាងក្នុងវិមាន Capitol Rotunda វិញ។

អ្នកគាំទ្របាននិយាយថា ពួកគេអន់ចិត្តនឹងការផ្លាស់ប្តូរនេះ ដោយអះអាងថា ពួកគេបានធ្វើដំណើរ ក្នុងចម្ងាយដ៏ឆ្ងាយ ដើម្បីចង់ឃើញថ្ងៃប្រវត្ថិសាស្ត្រនេះ តែមិនបានឃើញផ្ទាល់ ទៅវិញ ហើយថែមទាំងអះអាងថា ពួកគេដឹងថាត្រជាក់ខ្លាំង ក៏បានត្រៀមសម្លៀកបំពាក់ក្រាស់ៗ មកដែរ។

នេះជាលើកទីមួយហើយដែលវិធានការបន្ទាន់ ត្រូវបានធ្វើឡើង ចាប់តាំងពីធ្លាប់មាន នៅឆ្នាំ១៩៨៥ អំឡុងពិធីស្បថចូលកាន់តំណែងរបស់ អតីតប្រធានាធិបតីអាមេរិក Ronald Reagan ពោលគឺដោយសារតែអាកាសធាតុត្រជាក់ខ្លាំង។

លោក Trump បាននិយាយថា «ឥស្សរជន និងភ្ញៀវផ្សេងៗ» នឹងចូលរួមក្នុងព្រឹត្តិការណ៍នានា នៅក្នុងវិមាន Capitol រួមទាំង ការអធិស្ឋាន សុន្ទរកថាស្បថចូលកាន់តំណែង និងការច្រៀងបទភ្លេងជាតិ៕

ប្រភពពី AFP ប្រែសម្រួល៖ សារ៉ាត