សាកសពបុរសរងគ្រោះដែលត្រូវបានទឹកហូរកួចយកទៅបាត់ត្រូវបានគេរកឃើញហើយនៅវេលាម៉ោង១កន្លះរសៀល ថ្ងៃទី១៩ ខែតុលា ឆ្នាំ២០២០នេះ ស្ថិតត្រង់ចំណុចគុម្ភឬស្សី១កន្លែងនៅខាងក្រោយរោងចក្រទឹកកក ដែលស្ថិតក្នុងភូមិកាកាប ឃុំក្លុងពពក ស្រុកទឹកផុស ខេត្តកំពង់ឆ្នាំងប្រមាណជា៥០០ម៉ែត្រ ។ សមត្ថកិច្ចបានអោយដឹងថាបុរសរងគ្រោះមានឈ្មោះ ទេព បឿន អាយុ ៤១ ឆ្នាំ។ អធិការនគរបាលស្រុកទឹកផុស លោកវីរៈសេនីយ៍ឯក ខេមវិបុល បានអោយដឹងថានៅមុនពេលកើតហេតុបុរស​រងគ្រោះបាន​ហែលឆ្លងទឹកទៅកាប់ដើមឬស្សី។ លុះពេលកាប់បានរួចហើយ​បានហែលឆ្លងទឹកអូសដើមឫស្សីត្រឡប់មកវិញប៉ុន្តែចៃដន្យ​ទឹកស្ទឹង​បានហូរខ្លាំងនិងបានកួចយកទៅបាត់ តាំងពីម៉ោងជាង ១២ថ្ងៃត្រង់ ។ រហូតដល់ថ្ងៃចន្ទនេះ សាកសពជនរងគ្រោះត្រូវ​បានហូរ​តាមទឹកទឹកធ្លាក់មកខាងក្រោមចម្ងាយប្រមាណជា ១គីឡូពីកន្លែងកើតហេតុគ្រាដែលទឹកស្ទឹងបានស្រកទៅវិញ​ទាំងក្រុម​គ្រួ​សារសាច់ញាតិទាំងសមត្ថកិច្ចនិងអាជ្ញាធរមូលដ្ឋានបានព្យាយាមរករយៈពេល២ថ្ងៃទើបរកសាកសពឃើញ៕