ថៃ៖ វេជ្ជបណ្ឌិតជាង១ពាន់នាក់បាតុកម្ម ប្រឆាំងនឹងការប្រើហិង្សាបង្ក្រាបបាតុកម្ម
ចំនួនវេជ្ជបណ្ឌិតដែលបានចុះហត្ថលេខាលើញត្តិតវ៉ាជំទាស់នឹងអំពើហិង្សា ប្រឆាំងនឹងក្រុមបាតុករមិនពេញចិត្តនឹងរដ្ឋាភិបាលបានកើនឡើងពី ៣៨៦ នាក់ដល់ ១.៨០០ នាក់ នេះបើតាមការចេញផ្សាយរបស់សារព័ត៌មាន The Nation។
នៅថ្ងៃចន្ទ ទី១៩ តុលានេះ ក្រុមវេជ្ជបណ្ឌិតបានចេញសេចក្តីថ្លែងការណ៍ថ្កោលទោស ចំពោះការដែលនគរបាលចាប់ខ្លួនបាតុករ ដែលប្រមូលផ្តុំគ្នាធ្វើបាតុកម្ម កាលពីថ្ងៃសុក្រ ១៦ តុលាដោយពេលនោះ ក្រៅពីចាប់ខ្លួន នគរបាលបានប្រើប្រាស់កាំភ្លើងបាញ់ទឹកបង្ក្រាបទៀតផង ដើម្បីបោសសំអាតក្រុមអ្នកតវ៉ាពីផ្លូវ Pathumwan Intersection ជាហេតុនាំឲ្យរថយន្តសង្គ្រោះបន្ទាន់ត្រូវបានរារាំង ខណៈពេលកំពុងដឹកជនរងគ្រោះ។
ពួកគេអះអាងថា គ្មានការរើសអើងនោះទេ ក្នុងកាលៈទេសៈណាក៏ដោយ គឺត្រូវការពារសិទ្ធិនិងភាពឯកជនរបស់អ្នកជំងឺ។ វេជ្ជបណ្ឌិតក៏បានទាមទារអោយអាជ្ញាធរគោរពបទបញ្ជាអន្តរជាតិនិងបញ្ឈប់ការប្រើប្រាស់អំពើហឹង្សាប្រឆាំងនឹងការតវ៉ាដោយសន្តិវិធី ហើយត្រូវធានាថាមន្ទីរពេទ្យមានសុវត្ថិភាព និងអព្យាក្រឹត។ ម្យ៉ាងវិញទៀត បើតាមបទបញ្ជាអន្តរជាតិ មានការហាមឃាត់ការប្រើប្រាស់សារធាតុគីមីប្រឆាំងក្រុមបាតុករអហិង្សា។
ការទាមទាររបស់វេជ្ជបណ្ឌិនេះធ្វើឡើង ក្រោយពេលដែលក្រុមអ្នកតវ៉ាបានត្អូញត្អែរអំពីអារម្មណ៍ក្រហាយនៅក្នុងភ្នែក និងស្បែករបស់ពួកគេ បន្ទាប់ពីត្រូវបានវាយប្រហារដោយកាណុងបាញ់ទឹក ថ្មីៗនេះ។ ក្រុមវេជ្ជបណ្ឌិតបានបន្ថែមថា រដ្ឋាភិបាលគួរតែយកចិត្តទុកដាក់លើស្តង់ដារអន្តរជាតិនិងបើកឱកាសសម្រាប់មនុស្សដែលចង់បញ្ចេញមតិរបស់ពួកគេ។
