កម្ពុជាបានផ្ញើសារចូលរួមសោកស្តាយ​ចំពោះ​ការបាត់បង់ជីវិតទាហានវៀតណាម ក្នុងបេសកកម្ម​ជួយ​សង្គ្រោះប្រជាជនពីគ្រោះមហន្តរាយធម្មជាតិ។ សម្តេចពីជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិកម្ពុជា នៅថ្ងៃទី១៩ ខែតុលា ឆ្នាំ២០២០ បានផ្ញើទៅកាន់ នាយឧត្តមសេនីយ៍ ជុំ ស៊ុនលិច រដ្ឋមន្ត្រីក្រសួងការពារប្រទេស នៃសាធារណរដ្ឋ​សង្គម​និយមវៀតណាម ចំពោះការពលីជីវិតរបស់​កម្មាភិបាល​ជាន់ខ្ពស់ និងទាហានវៀតណាម ក្នុងបេសក​កម្ម​ចុះជួយសង្គ្រោះប្រជាជនពីគ្រោះមហន្ត​រាយធម្មជាតិដោយ​ព្យុះ និងជំនន់ទឹកភ្លៀង នៅតំបន់ភូមិ​ភាគ​កណ្តាល ថ្មីៗនេះ។សម្តេចពិជ័យសេនា ទៀ បាញ់ បានបង្ហាញ​អារម្មណ៍​សោកស្តាយយ៉ាងដូច្នេះថា៖ «តាង​នាមថ្នាក់ដឹកនាំក្រសួងការពារជាតិ និងនាយទាហាន នាយទាហា​នរង ពលទាហាន នៃកងយោធពល​ខេមរ​ភូមិន្ទទាំងមូល និងក្នុងនាមខ្ញុំផ្ទាល់ ខ្ញុំពិតជាសោកសៅយ៉ាង​ក្រៃ​លែង ដោយទទួលដំណឹងថា កម្មាភិបាល​ជាន់​ខ្ពស់ និងយុទ្ធជនមួយចំនួននៃកងទ័ពប្រជាជនវៀតណាម បានពលីជីវិតក្នុងបេសកកម្មចុះជួយសង្គ្រោះ​ប្រជាជនពីគ្រោះមហន្តរាយធម្មជាតិដោយព្យុះ និងជំនន់ទឹកភ្លៀង នៅតំបន់ភូមិភាគកណ្តាល កាលពីប៉ុន្មាន​ថ្ងៃកន្លងមកថ្មីៗនេះ»។

រដ្ឋមន្ត្រីការពារជាតិកម្ពុជា បានលើកឡើងថា ការពលីកម្មដ៏ខ្ពង់ខ្ពស់របស់កម្មាភិបាលជាន់ខ្ពស់ និងយុទ្ធជន​នៃកងទ័ពប្រជាជនវៀតណាម គឺជាការបាត់បង់ដ៏ធំធេង និងគួរឱ្យគោរពកោតសរសើររបស់រដ្ឋាភិបាល និង​ប្រជាជនវៀតណាម ហើយក៏ជាការបាត់បង់មិត្តដ៏ល្អរបស់រាជរដ្ឋាភិបាល ប្រជាជន និងកងយោធពលខេមរ​ភូមិន្ទ​ផងដែរ។សម្តេចពិជ័យសេនា ទៀ បាញ់ បានបន្ថែមថា៖ «យើងខ្ញុំចងចាំនូវវីរភាពដ៏អង់អាចក្លាហាន និងសូមឧទ្ទិសបួងសួងជូនដល់វិញ្ញាណក្ខន្ធកម្មាភិបាលជាន់ខ្ពស់ និងយុទ្ធជននៃកងទ័ពប្រជាជនវៀតណាម ដែលលះបង់ខ្ពស់ក្នុងបុព្វហេតុសង្គ្រោះមនុស្សជាតិសូមឱ្យស្ថិតក្នុងសុគតិភពកុំបីឃ្លៀងឃ្លាត»។តាងនាមថ្នាក់ដឹកនាំក្រសួងការពារជាតិ និងនាយទាហាន នាយទាហានរង ពលទាហាន នៃកងយោធពលខេមរភូមិន្ទ​ទាំងមូល និងសម្តេចផ្ទាល់ សូមសម្តែងនូវសមានចិត្តចូលរួមរំលែកទុក្ខដ៏ក្រៀមក្រំបំផុតជូនចំពោះបក្ស ប្រជាជន រដ្ឋ និងកងទ័ពប្រជាជនវៀតណាម ក៏ដូចជាជូនចំពោះក្រុមគ្រួសារនៃសពនូវការ​បាត់បង់កម្មាភិ​បាលជាន់ខ្ពស់ និងយុទ្ធជនមួយចំនួនជាទីគោរពស្រលាញ់នេះ៕