លោក ឌូតឺតេថា លោកអាចត្រូវជាប់ឃុំ ទទួលរាប់រងការស្លាប់ជនសង្ស័យគ្រឿងញៀនរាប់ពាន់នាក់ នៅហ្វីលីពីន
ប្រធានាធិបតីហ្វីលីពីន លោក រ៉ូទ្រីហ្គោ ឌូតឺតេ បាននិយាយកាលពីម្សិលមិញថា លោកគ្មានបញ្ហាអ្វីទេ បើទោះបីជាត្រូវចាប់ខ្លួន ពីបទទទួលខុសត្រូវលើការស្លាប់មនុស្សក្នុងយុទ្ធនាការបង្ក្រាបគ្រៀងញៀន ក្នុងប្រទេសកន្លងទៅ ដោយលោកបន្ថែមថា លោកត្រៀមខ្លួនជានិច្ចដើម្បីប្រឈមនឹងការចោទប្រកាន់ដែលអាចធ្វើឲ្យលោកជាប់ពន្ធនាគារ ទោះបីជាមិនមែនជាឧក្រិដ្ឋកម្មប្រឆាំងមនុស្សជាតិក៏ដោយ។
លោកប្រធានាធិបតីហ្វីលីពីនបានថ្លែងបែបនេះ កាលពីយប់ថ្ងៃទី១៩ តុលា ២០២០ ដើម្បីបញ្ជាក់ឲ្យច្បាស់ ស្រាយមន្ទិលនានាដែលថា លោកអាចប្រឈមនឹងបទឧក្រិដ្ឋមនុស្សជាតិ ព្រោះតែយុទ្ធនាការក្តៅបង្ក្រាបគ្រឿងញៀន ចាប់តាំងពីលោកកាន់តំណែង តាំងពីពាក់កណ្តាលឆ្នាំ២០១៦មក។
លោកថា «ប្រសិនបើមានការស្លាប់នៅទីនោះ ខ្ញុំគឺជាមនុស្សម្នាក់…អ្នកអាចឲ្យខ្ញុំទទួលខុសត្រូវរាប់អ្វីទាំងអស់ រាល់ការស្លាប់ ដែលបានកើតឡើង អំឡុងការកាត់ក្តីនៃសង្គ្រាមគ្រឿងញៀន។ បើដូច្នេះមែន ខ្ញុំហ៊ាននិយាយថា សូមនាំខ្ញុំទៅតុលាការដាក់ពន្ធនាគារចុះ មិនអីទេ ខ្ញុំគ្មានបញ្ហា ប្រសិនបើខ្ញុំបំរើប្រជាតិខ្ញុំ ទោះត្រូវជាប់គុក ខ្ញុំរីករាយ»
មានមនុស្សជិត៦ពាន់នាក់ ជាជនសង្ស័យគ្រឿងញៀនបានគេរាយការណ៍ថា ត្រូវនគរបាលបាញ់សម្លាប់ ប៉ុន្តែក្រុមឃ្លាំមើលសិទ្ធិមនុស្សសង្ស័យថា អ្នកស្លាប់អាចច្រើនជាងនេះ៕ ប្រភពពី Channelnewsasia
