ពលរដ្ឋរងគ្រោះដោយសារទឹកជំនន់ចំនួន៥៤៩គ្រួសារក្នុងឃុំស្អាងភ្នំ និងឃុំក្រាំង បានទទួលអំណោយ
ប្រជាពលរដ្ឋរងគ្រោះដោយសារទឹកជំនន់ក្នុងឃុំស្អាងភ្នំ និងឃុំក្រាំងយ៉ូវចំនួន៥៤៩គ្រួសារ បានទទួលអំណោយ របស់សម្តេចតេជោហ៊ុនសែន នាយករដ្ឋមន្ត្រី។ អំណោយនោះត្រូវបានចែកជូនតាមរយៈតំណាងដ៏ខ្ពង់ខ្ពស់ពីឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ និងជាអនុប្រធានក្រុមការងាររាជរដ្ឋាភិបាលចុះជួយខេត្តកណ្តាល និងជាប្រធានក្រុមការងាររាជរដ្ឋាភិបាលចុះជួយមូលដ្ខានស្រុកស្អាង ។ ការចែកអំណោយជូនដល់ប្រជាពលរដ្ឋទាំង២ឃុំបានធ្វើឡើង នៅព្រឹកថ្ងៃទី២២ ខែតុលាឆ្នាំ ២០២០នេះ ស្ថិតវត្តសាលាអណ្តែតហៅវត្តអណ្តូងស្ថិតក្នុងភូមិអណ្តូង ឃុំក្រាំងយ៉ូវ ។ សូមជម្រាបថាក្នុងចំនោមប្រជាពលរដ្ឋទាំង៥៤៩គ្រួសារ មានប្រជាពលរដ្ឋ២៦៧គ្រួសារមកពីឃុំស្អាងភ្នំ និង២៧៩គ្រួសារ នៅឃុំក្រាំងយ៉ូវ ។ ថ្លែងក្នុងពិធីចែកអំណោយនេះ ឯកឧត្តម ប្រាក់ សុខុន បានមានប្រសាសន៍ផ្តាំផ្ញើការសួរសុខទុក្ខពីសម្តេចតេជោ និងបានបញ្ជាក់ថាការជួយនេះគឺពុំមានរើសអើងនិន្នាការនយោបាយនោះទេ ។ ឯកឧត្តមប្រាក់សុខុនក៏បានជម្រុញឲ្យប្រជាពលរដ្ឋថែរក្សាសុខភាព ប្រយ័ត្នកុមារតូចៗកុំឲ្យលេងទឹក ជាពិសេសទីណាមានទុក្ខ ទីនោះមានសម្តេចតេជោទៅជួយ ទីណាមានទុក្ខ ទីនោះមានគណបក្សប្រជាជនកម្ពុជាទៅជួយ ទីណាមានទុក្ខ គឺទីនោះមានក្រុមការងារគណបក្សប្រជាជនកម្ពុជាទៅជួយ ។
