អង្ករ២០តោន និងថវិកា៤០លានរៀល ដែលជាអំណោយរបស់ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានឧបត្ថម្ភជូនស្នងការដ្ឋាននគរបាលរាជធានីភ្នំពេញ ដើម្បីឆ្លើយ​តប​លើការងារជួយសង្រ្គោះប្រជាពលរដ្ឋរងគ្រោះដោយទឹកជំនន់ទឹកភ្លៀងនៅក្នុងរាជធានីភ្នំពេញ។

ពិធីប្រគល់ និងទទួល នេះធ្វើឡើងនៅស្នងការដ្ឋាននគរបាលរាជធានីភ្នំពេញ ព្រឹកថ្ងៃទី២៧ ខែតុលា ឆ្នាំ២០២០ ក្រោមវត្តមានឯកឧត្តម នាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិ និងជាប្រធាន​នាយក​ដ្ឋានបុគ្គលិក តំណាង នាយឧត្តមសេនីយ៍សន្តិបណ្ឌិត នេត សាវឿន និងឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ។

ការផ្តល់ជូននេះ គ្រាដែលគេមើលឃើញថា ក្នុងរយៈពេល១សប្តាហ៍ចុងក្រោយនេះសប្បុរសជន​ក៏ដូចជាក្រុមហ៊ុនមួយចំនួនបានឧបត្ថម្ភអំណោយជាអង្ករ និងថវិកាមួយចំនួនធំ ជូនដល់​ស្នងការដ្ឋាននគរបាលរាជធានីភ្នំពេញ ដើម្បីជាការឆ្លើយតបផងដែរក្នុងការជួយសង្រ្គោះ​ប្រជាពលរដ្ឋដែលរងគ្រោះដោយទឹកជំនន់។

ក្នុងអំឡុងទឹកជំនន់ជន់លិចខ្លាំងនៅក្នុងភូមិសាស្រ្តរាជធានីភ្នំពេញ កម្លាំងនគរបាលរាជធានីភ្នំពេញ ជាកម្លាំងស្នូលបានចូលរួមសហការជាមួយកម្លាំងសមត្ថកិច្ចពាក់ព័ន្ធក្នុងការចេញជួយសង្រ្គោះជម្លៀសប្រជាពលរដ្ឋចេញពីផ្ទះដែលរងការជន់លិចដោយទឹកជំនន់មកទីទួលសុវត្ថិភាព ។

ឯកឧត្តមនាយឧត្តមសេនីយ៍ ប៉ែន វិបុល បានវាយតម្លៃខ្ពស់ដល់កម្លាំងនគរបាលរាជធានីភ្នំពេញនៅក្នុង​អំឡុងពេលដែលប្រជាពលរដ្ឋនៅក្នុងរាជធានីភ្នំពេញ រងគ្រោះដោយទឹកជំនន់ទឹក​ភ្លៀងបានខិត​ខំប្រឹង​ប្រែងអស់លទ្ធភាពក្នុងចេញជួយសង្រ្គោះ ហើយនាំមកនូវការកោតសរសើរ​ពីប្រជាពលរដ្ឋក៏ដូចជា​ថ្នាក់ដឹក​នាំនិងក៏បានជម្រុញកម្លាំងនគរបាលទំាងអស់បន្តជួយប្រជាពលរដ្ឋថែមទៀតក្រោយទឹកជំនន់បានស្រកអស់ដោយ ទៅជួយសម្អាតអនាម័យ ដើម្បីបង្ការជំងឺឆ្លង។

ឯកឧត្តម ឧត្តមសេនីយ៍ឯក ស ថេត ក៏បានថ្លែងអំណរគុណយ៉ាងជ្រាលជ្រៅ ចំពោះ នាយឧត្តម​សេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ដែលបានគាំទ្រ និងលើកទឹកចិត្តជូន​ដល់កម្លាំងនគរបាល នឹងបានឧបត្ថម្ភនូវអំណោយទាំងនេះជូនដល់ស្នងការដ្ឋាននគរបាលរាជធានីភ្នំពេញ ដើម្បីឆ្លើយតបដល់កងកម្លាំងនគរបាលរាជធានីភ្នំពេញដែលនៅតែបន្តជួយសង្រ្គោះប្រជាពលរដ្ឋរងគ្រោះទឹកជំនន់ទឹកភ្លៀង។

ឯកឧត្តម ក៏បានលើកឡើងថា នៅពេលទឹកស្រកទៅវិញអស់កម្លាំងនគរបាលរាជធានីភ្នំពេញ នឹងនៅតែ​បន្តជួយសម្អាតអនាម័យ បរិស្ថាន តំបន់ដែលទឹកលិច ដើម្បីបង្ការជំងឺឆ្លង នៅពេលប្រជាពល​រដ្ឋវិលត្រឡប់ចូលលំនៅឋានវិញ៕