រុស្ស៊ីដាក់ពាក្យស្នើសុំទៅអង្គការសុខភាពពិភពលោក ដើម្បីចុះបញ្ជីប្រើប្រាស់ជាបន្ទាន់នូវវ៉ាក់សាំង Covid-19 របស់ខ្លួន
រុស្ស៊ី៖ មូលនិធិវិនិយោគរបស់រុស្ស៊ី ហៅកាត់ថា RDIF បានដាក់ពាក្យស្នើសុំទៅកាន់អង្គការសុខភាពពិភពលោក WHO ដើម្បីចុះបញ្ជីប្រើប្រាស់ជាបន្ទាន់នូវវ៉ាក់សាំងប្រឆាំងជម្ងឺ Covid-19 របស់ខ្លួន ដែលមានឈ្មោះថា ស្ពួតនីគ វី (Sputnik V) នេះបើតាមសារព័ត៌មានស៊ីនហួរនៅថ្ងៃទី២៨ ខែតុលា ឆ្នាំ២០២០ ។
នាយកប្រតិបត្តិ RDIF លោក ខឺរីល ឌីមីទ្រីវ បានបញ្ជាក់នៅក្នុងសេចក្តីថ្លែងការណ៍ថា នីតិវិធីខាងលើនេះនឹងអនុញ្ញាតឲ្យវ៉ាកសាំង ស្ពួតនីគ វី ចុះនៅក្នុងបញ្ជីផលិតផលវេជ្ជសាស្ត្រ ដែលបំពេញតាមស្តង់ដារផ្នែកគុណភាព សុវត្ថិភាព និងប្រសិទ្ធភាពឈានមុខ ។ វ៉ាក់សាំង ស្ពួតនីគ វី ត្រូវបានអភិវឌ្ឍឡើងដោយវិទ្យាស្ថានស្រាវជ្រាវ ហ្គាម៉ាឡេយ៉ា ក្នុងរដ្ឋធានីម៉ូស្គូ និងត្រូវទទួលសិទ្ធិចែកចាយដោយមូលនិធិវិនិយោគរបស់រុស្ស៊ី ។
សូមបញ្ជាក់ថា ការចុះបញ្ជីប្រើប្រាស់បន្ទាន់ មានន័យថា ជាការអនុញ្ញាតឲ្យវ៉ាក់សាំងខាងលើនេះ អាចយកទៅប្រើប្រាស់បាននៅទូទាំងពិភពលោកលឿនជាងមុន ដោយសារតែការវិនិច្ឆ័យរបស់អង្គការ WHO គឺជាស្លាកសញ្ញាដែលបង្ហាញពីគុណភាពជាលក្ខណៈសកល និងធានាថា វ៉ាក់សាំងមានសុវត្ថិភាព និង ប្រសិទ្ធភាពពិតប្រាកដ ៕
