វៀតណាម៖ ស្លាប់កើនដល់១៤៣នាក់ហើយ បន្ទាប់ពីស្លាប់១៣នាក់ទៀត ព្រោះព្យុះផ្ទួនៗ
ប្រទេសវៀតណាម នាថ្ងៃព្រហស្បតិ៍ ទី២៩ តុលានេះ បានបញ្ជូនទាហានរាប់រយនាក់ និងគ្រឿមម៉ាស៊ីនធំៗ ស្វែងរកអ្នកបាត់ខ្លួនពីការបាក់ដី បង្កឡើងដោយសារភ្លៀងធ្លាក់ខ្លាំងបណ្តាលមកពីព្យុះសង្ឃរា Molave ដោយរដ្ឋាភិបាលចាត់ទុកជាព្យុះដ៏សាហាវមួយ ប្រចាំតំបន់ ក្នុងពេលរាប់សិបឆ្នាំមកនេះ។ ព្រោះព្យុះផ្ទួនៗ វៀតណាមមានអ្នកស្លាប់កើនដល់១៤៣នាក់ហើយ បន្ទាប់ពីស្លាប់១៣នាក់ទៀត។
ការបាក់ដីនៅតំបន់ដាច់ស្រយាលនានា ស្ថិតក្នុងខេត្ត Quang Nam តំបន់កណ្តាលប្រទេស បានសម្លាប់មនុស្ស១៣នាក់ បាត់ខ្លួន៤០នាក់ ខណៈដែលក្រុមសង្គ្រោះក៏ជួបផលវិបាក ដោយសារតែអាកាសធាតុអាប់អួរពីព្យុះ Molave ដែលបានវាយប្រហារវៀតណាម កាលពីម្សិលមិញ។
ចាប់តាំងពីដើមខែតុលាមក វៀតណាមត្រូវបានព្យុះវាយប្រហារ៤លើកមកហើយ ដែលប៉ះពាល់ដល់មនុស្សជាង១លាននាក់ ហើយព្យុះ៣លើកមុនៗ បានធ្វើឲ្យស្លាប់មនុស្ស១៣០នាក់ បាត់ខ្លួនជាច្រើននាក់ទៀត៕ ប្រភពពី CNA
