ឯ ឧ បណ្ឌិតសភាចារ្យ ហង់ ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា បានគូស បញ្ជាក់ថា បើសិនជាក្រសួង បានរកឃើញថា សាលាណាមួយ ដែលរំលោភទៅលើលក្ខខណ្ឌសុវត្ថិភាព របស់ក្រសួងនោះ ក្រសួងនឹងធ្វើការព្យួរ ជាបណ្ដោះអាសន្ននូវសាលានោះតែម្ដង ។

ការគូសបញ្ជាក់បែបនេះ ធ្វើឡើងក្នុងឱកាសដែល ឯ ឧ ហង់ ជួន ណារ៉ុន រៀបចំសន្និសីទ សារព័ត៌​មាន ស្ដីពី «វិធានការក្នុងការបើកដំណើរការ គ្រឹះស្ថានសិក្សាឡើងវិញ»  នៅសាល​ប្រជុំ​ «ក»​ នៃទីស្ដីការក្រសួងអប់រំ នាថ្ងៃទី២៨ ខែតុលា ឆ្នាំ២០២០ ។

ឯ ឧ រដ្ឋមន្ដ្រី បានបញ្ជាក់យ៉ាងដូច្នេះថា «បើសិនបើសាលាណាមួយ រំលោភទៅលើ លក្ខខណ្ឌ (សុវត្ថិភាព) របស់ក្រសួង ជំហានដំបូងក្រសួង នឹងធ្វើការណែនាំ បើសិនជាមិនធ្វើតាម ក្រសួង នឹងធ្វើការព្យួរជាបណ្ដោះអាសន្ន នូវសាលានោះតែម្ដង» ។ រដ្ឋមន្ដ្រី ហង់ ជួន ណារ៉ុន បានឲ្យ​ដឹងថា បច្ចុប្បន្នមានសាលាប្រមាណជាង៧ពាន់ បានបើកដំណើរការ ក្នុងដំណាក់កាលទី២ ខណៈ​ដែលសាលា មានដំណើរការ ចំនួនសរុបប្រមាណ១ម៉ឺនសាលា ។ ចំពោះគ្រឹះស្ថានសិក្សាឯកជន ឯ ឧ បណ្ឌិត​សភាចារ្យ បានបញ្ជាក់ថា គ្រប់​សាលាទាំងអស់ មុន​នឹងដាក់ឲ្យដំណើរការ ក្រសួងចុះទៅពិនិត្យមើល ដើម្បីបញ្ជាក់ថា គ្រឹះស្ថាន​ទាំងអស់នោះ សុទ្ធតែមានសមត្ថភាព ក្នុងការបើកដំណើរការ ។ ដោយឡែក រគ្រឹះស្ថានសិក្សារដ្ឋ ឯ ហង់ ជួន ណារ៉ុន បានឲ្យដឹងថា ក្រសួងបានបើកដំណើរការ រយៈពេល១​ខែ​ហើយ និងមានការត្រួតពិនិត្យ ពីអាជ្ញាធរអប់រំគ្រប់លំដាក់ថ្នាក់ ហើយក្រសួង ក៏បានចេញសេចក្ដីណែនាំ ជូនដល់សាលាទាំង​អស់នោះផងដែរ ។ ពាក់ព័ន្ធនឹងបញ្ហាកូវីដ-១៩ រដ្ឋមន្ដ្រីក្រសួងអប់រំ បានលើក​ឡើង​ថា បើសិនបើមានការផ្ទុះ នៅសាលាណាមួយ ក្រសួងនឹងសហការ ជាមួយក្រសួងសុខាភិបាល ដើម្បី​ចុះ​ទៅត្រួតពិនិត្យវាយតម្លៃ ហើយនឹងអនុវត្ដទៅតាមគោលការណ៍ និងវិធានការជាក់ស្ដែង ។

ដោយឡែកការប្រលងប្រឡងបាក់ឌុបវិញ រដ្ឋមន្ដ្រី ហង់ ជួន ណារ៉ុន បានឲ្យដឹងថា បើសិន​ជា​មាន​សិស្សធ្លាក់ច្រើន ក្រសួងនឹងពិនិត្យវាយតម្លៃ ទៅលើលទ្ធផល នៃការប្រឡង ហើយនឹងដាក់ចេញ វិធាន​ការជាក់ស្ដែង ទៅតាមលទ្ធផលទាំងនោះ ដូច្នេះក្រសួងមិនទាន់ មានការវាយតម្លៃអ្វីទាំងអស់ ជុំវិញបញ្ហានេះ ។

សូមជម្រាបថា ក្រសួងអប់រំ យុវជន និងកីឡា នៅថ្ងៃទី២៧ ខែតុលា ឆ្នាំ២០២០ បានចេញ​សេចក្ដីណែនាំមួយ ស្ដីពីការបើកដំណើរការ គ្រឹះស្ថានសិក្សា សាធារណៈឡើងវិញ (សាលារដ្ឋ) ក្នុង​ដំណាក់កាលទី៣ ដែលចាប់ផ្ដើមពីថ្ងៃទី០២ ខែវិច្ឆិកា រហូតដល់ដំណាច់ខែធ្នូ ឆ្នាំ២០២០ ។ ក្នុងសេចក្ដីណែនាំរបស់ក្រសួងអប់រំ បានបញ្ជាក់ថា ការអនុវត្តឆមាសទី២ នៃឆ្នាំសិក្សា២០១៩-២០២០ គិតចាប់ពីថ្ងៃទី០៧ ខែកញ្ញា ដល់ដំណាច់ ខែធ្នូ ឆ្នាំ២០២០ ។

ក្រសួងអប់រំ ក៏បានណែនាំទៀតថា គ្រប់គ្រឹះស្ថានមត្តេយ្យសិក្សា និងកន្លែងផ្ដល់សេវាអប់រំ​កុមារ​តូច ត្រូវបើកដំណើរការបង្រៀន និងរៀនពេញលេញគ្រប់កម្រិតថ្នាក់ ចំនួន៥ថ្ងៃ ក្នុងមួយសប្ដាហ៍ ដោយ​កំណត់ចំនួនកុមារ មិនលើសពី២៥នាក់ ក្នុងមួយថ្នាក់ ។ ដោយឡែកការអនុវត្តកម្មវិធីសិក្សា សម្រាប់​គ្រឹះ​​​​​ស្ថានមធ្យមសិក្សា ថ្នាក់ទី៩ និងទី១២ ត្រូវបន្ដអនុវត្តដូចដំណាក់កាលទី២ ខណៈថ្នាក់ទី៧ ទី៨ ទី១០ និងទី១១ ត្រូវអនុវត្តការបង្រៀន និងរៀន ៣ថ្ងៃក្នុងមួយសប្ដាហ៍ ។ ដោយក្នុងនោះ តម្រូវក្នុងមួយ​បន្ទប់ មានសិស្សមិនលើសពី៣០នាក់ និងអនុវត្តការសិក្សាបែបចម្រុះ ដោយផ្ដោតលើមុខ​វិជ្ជាសិក្សា​គោល យ៉ាងតិច៦មុខវិជ្ជា ស្របតាមស្ថានភាពជាក់ស្ដែង នៃចំនួនបន្ទប់រៀន និងចំនួនគ្រូ ៕