ភ្នំពេញ  ៖  កម្លាំងនគរបាលប៉ុស្ដិ៍ព្រែកថ្មី  នៃអធិការដ្ឋាននគរបាលខណ្ឌឬស្សីកែវ  បានឃាត់ខ្លួនជនសង្ស័យម្នាក់  ពាក់ព័ន្ធ ករណីហិង្សាដោយចេតនា (ប្រើកាំបិតប៉័ងតោកាប់បណ្តាលឲ្យរបួស) កាលពីវេលាម៉ោង១១និង០០នាទី  ថ្ងៃទី២៨  ខែតុលា  ឆ្នាំ ២០២០ នៅដីឡូត៍ចំការផ្កាម្លិះ ភូមិព្រែកថ្មី១ សង្កាត់ព្រែកថ្មី ខណ្ឌច្បារអំពៅ  ។  លោកវរសេនីយ៍ឯក  ម៉ៅ  សឿត  អធិការនគរបាលខណ្ឌច្បារអំពៅ  បានឲ្យដឹងថា  ជនរងគ្រោះឈ្មោះយាំ សេងលី ភេទប្រុស អាយុ៤០ឆ្នាំ ជនជាតិខ្មែរ មុខរបរ ចាំចំការ ស្នាក់នៅភូមិកើតហេតុ។  ចំណែកជនសង្ស័យឈ្មោះខាត់ ឌួក ភេទប្រុស អាយុ២០ឆ្នាំ ជនជាតិខ្មែរ មុខរបរ ចាំចំការ ស្នាក់នៅភូមិកើតហេតុ។  លោកអធិការបានឲ្យដឹងទៀតថា  ៖ មុនពេលកើតហេតុ ជនរង គ្រោះប្រើកូនទិញស្រាផឹក តែកូនពុំព្រមទៅ ជនរងគ្រោះក៏វាយកូន រួចប្រពន្ធចូលទៅឃាត់ ស្រាប់តែជនរងគ្រោះយកដំបងឬស្សីវាយប្រពន្ធត្រូវចំត្រគៀកខាងឆ្វេងដួលទៅលើដី រួចជនសង្ស័យ(ត្រូវប្អូនថ្លៃជនរងគ្រោះ) សួរថា ម៉េចបងឯងវាយប្រពន្ធកូនគ្មានហេតុផលចឹង? ពេលនោះជនរងគ្រោះក៏យកកូនកាំបិតរត់ទៅចាក់ជនសង្ស័យ តែពុំត្រូវ រួចជនសង្ស័យក៏យកកាំបិតប៉័ងតោកាប់ជនរងគ្រោះត្រូវចំសៀតថ្កាខាងឆ្វេង និងកដៃខាងឆ្វេងបណ្តាលឲ្យរបួស រួចជនសង្ស័យក៏ដើរគេចចេញ យកកាំបិតប៉័ងតោចោលក្នុងព្រៃបាត់។ បន្ទាប់មកសមត្ថកិច្ចយើងចុះទៅដល់ឃាត់ខ្លួនជនសង្ស័យ បញ្ជូនមកអធិការដ្ឋាន នគរបាលខណ្ឌច្បារអំពៅចាត់ការតាមច្បាប់។ ចំណែកជនរងគ្រោះសមត្ថកិច្ចយើងបញ្ជូនទៅសង្គ្រោះបន្ទាន់នៅមន្ទីរពេទ្យបង្អែក ច្បារអំពៅ៕  ដោយ៖  ភារ៉ា  និងប៊ុនធី