កូរ៉េខាងជើងស្តីបន្ទោសកូរ៉េខាងត្បូង ចំពោះការគ្រប់គ្រងពលរដ្ឋមិនបានល្អ ទើបកើតមានករណីឃាតកម្មកាលពីខែមុន
កូរ៉េខាងត្បូង៖ កូរ៉េខាងជើងស្តីបន្ទោសកូរ៉េខាងត្បូងថា គ្រប់គ្រងពលរដ្ឋមិនបានល្អ ទើបបង្កឲ្យមានការបាញ់សម្លាប់មន្ត្រីជលផល ពីសំណាក់ឆ្មាំការពារដែនសមុទ្រកូរ៉េខាងជើងកាលពីខែមុន នេះបើតាមសារព័ត៌មានរដ្ឋកូរ៉េខាងជើង KCNA នៅថ្ងៃទី៣០ ខែតុលា ឆ្នាំ២០២០ ។
សារព័ត៌មានរដ្ឋកូរ៉េខាងជើងនេះបានរាយការណ៍ថា នៅក្នុងឧប្បត្តិហេតុនោះ ឆ្មាំការពារដែនសមុទ្ររបស់យើងបានបាញ់ទៅលើមន្ត្រីម្នាក់ បន្ទាប់ពីរូបគេបានព្យាយាមចូលមកកាន់ដែនទឹកកូរ៉េខាងជើង ។ វាគឺជាលទ្ធផលដែលបានមកពីការគ្រប់គ្រងពលរដ្ឋមិនត្រឹមត្រូវ នៅតំបន់ក្តៅដែលមានស្ថានការណ៍ផុយស្រួយ ក្នុងអំឡុងជំងឺ COVID-19 កំពុងរាតត្បាតដ៏តានតឹង ។
យ៉ាងណាមិញ បើតាមសារព័ត៌មានមួយចំនួននៅកូរ៉េខាងត្បូង មន្ត្រីជលផលរបស់ខ្លួន ដែលត្រូវបានកូរ៉េខាងជើងបាញ់សម្លាប់នោះ គឺមិនមែនជាឧប្បត្តិហេតុឡើយ តែជាការបញ្ជាពីថ្នាក់លើ ហើយក្រោយការបាញ់សម្លាប់នោះ កូរ៉េខាងជើងបានចាក់សាំងស្រោចលើសាកសព រួចដុតកម្ទេចចោល ៕
