ក្រុមហ៊ុនអចលនទ្រព្យដ៏ធំនៅកម្ពុជា R&F យាងព្រះនាងតូច នរោត្តម ចេនណា ប្រទានអំណោយដល់ជនរងគ្រោះដោយសារទឹកជំនន់
ភ្នំពេញ៖ ក្នុងឱកាសគម្រប់ខួប១៦ឆ្នាំ នៃព្រះរាជពិធីគ្រងរាជសម្បត្តិរបស់ព្រះមហាក្សត្រនរោត្តម មុនីនាថ សីហមុនី នៅថ្ងៃទី២៩ ខែតុលា ឆ្នាំ២០២០ ក្រុមហ៊ុនវិនិយោគអចលនទ្រព្យដ៏ធំមួយនៅកម្ពុជា បានយាងព្រះនាងតូច នរោត្តម ចេនណា ដើម្បីប្រទានអំណោយដល់ប្រជាជនដែលរងគ្រោះដោយសារទឹកជំនន់ កាលពីអំឡុងពាក់កណ្ដាលខែតុលាកន្លងមកនេះ ។
នៅក្នុងឱកាសនៃពិធីនោះដែរ លោក ហ្ស៊ី វិនស៊ួយ អគ្គនាយកនៃក្រុមហ៊ុន R&F Property បានមានប្រសាសន៍ថា ប្រទេសកម្ពុជា និងប្រទេសចិន មានទំនាក់ទំនងជាមួយគ្នាជាយូរមកហើយ និងរាប់អានគ្នាដូចជាបងប្អូនដូច្នោះដែរ ។ នៅពេលប្រទេសកម្ពុជាជួបប្រទះនូវគ្រោះទឹកជំនន់ ក្នុងនាមជាប្រជាជនចិន និងវិនិយោគិនចិនកំពុងបណ្ដាក់ទុនវិនិយោគនៅកម្ពុជា មួយរូប ក៏បានចែករំលែកនូវទុក្ខលំបាកទាំងនេះជាមួយប្រជាជនកម្ពុជា ដោយបានផ្ដល់អំណោយខ្លះ ដើម្បីកាត់បន្ថយទុក្ខលំបាករបស់ពលរដ្ឋដែលរងគ្រោះ ។ លោកបន្តថា ក្រៅពីការវិនិយោគនៅកម្ពុជាក្នុងវិស័យអចលនទ្រព្យនោះ ក្រុមហ៊ុន R&F ក៏បានធ្វើសកម្មភាពសប្បុរសធម៌ជាច្រើនលើកច្រើនសារមកហើយ ដើម្បីតបស្នងដល់ប្រទេសដែលខ្លួនកំពុងធ្វើអាជីវកម្ម ។ នេះជាកិច្ចខិតខំប្រឹងប្រែងមួយរបស់ខ្លួនក្នុងប្រទេសកម្ពុជា ហើយក្នុងនាមក្រុមហ៊ុន R&F ក៏មានសេចក្តីសោកស្ដាយចំពោះបាតុភូតគ្រោះធម្មជាតិ ធ្វើឱ្យប្រជាជនរាប់ម៉ឺននាក់បានរងផលប៉ះពាល់ពីទឹកជំនន់ និងខូចខាតទ្រព្យសម្បត្តិជាច្រើនផងដែរ ។
ព្រះនាងតូចនរោត្តម ចេនណា បានថ្លែងអំណរគុណដល់ក្រុមហ៊ុន R&F Property Cambodia ដែលបានមកវិនិយោគបង្កើតឱកាសការងារជូនប្រជាជនកម្ពុជាផង និងបានជួយដល់ប្រជាជនកម្ពុជាក្នុងគ្រាលំបាកនេះផងដែរ ។ ការបណ្ដាក់ទុនវិនិយោគរបស់ក្រុមហ៊ុន R&F Cambodia ពិតជាបានផ្ដល់អត្ថប្រយោជន៍យ៉ាងក្រៃលែងដល់ប្រទេសកម្ពុជា តាមរយៈការអភិវឌ្ឍអគារខ្ពស់ៗនៅរាជធានីភ្នំពេញ និងធ្វើឱ្យកម្ពុជាកាន់តែមានភាពរីកចម្រើនទៅមុខបន្តទៀត ។ នៅក្នុងថ្ងៃដដែលនេះ ព្រះនាងតូច នរោត្តម ចេនណា និងថ្នាក់ដឹកនាំក្រុមហ៊ុន R&F ក៏បានបន្តដំណើរចុះទៅចែកអំណោយជូនដល់គួ្រសារថ្មី ដែលរងគ្រោះដោយសារទឹកជំនន់ជាច្រើនគ្រួសារផ្សេងទៀតផងដែរ ដោយសហការជាមួយអង្គការ NGO ។
សូមបញ្ជាក់ថា សម្រាប់អំណោយសប្បុរសធម៌នៅថ្ងៃទី២៩ ខែតុលា ឆ្នាំ២០២០នេះ បើតាមការបញ្ជាក់របស់ក្រុមហ៊ុន R&F នោះ រួមមានអង្ករចំនួន៥តោន មី៥ពាន់ឈុត នំកញ្ចប់១ពាន់ឈុត ត្រីខកំប៉ុង៥ពាន់ឈុត និងទឹកសុទ្ធ២ពាន់ឈុត ៕
