អាមេរិក៖ លោក ដូណាល់ ត្រាំ បានធ្វើការចោទប្រកាន់ដោយគ្មានភស្ដុតាងថា គណបក្សប្រជាធិបតេយ្យកំពុងព្យាយាមលួចសន្លឹកឆ្នោតពីរូបលោក នេះបើតាមសារព័ត៌មានរ៉យទ័រនៅថ្ងៃទី០៤ ខែវិច្ឆិកា ឆ្នាំ២០២០ ។

ប្រធានាធិបតីអាមេរិករូបនេះបានបង្ហោះសារនៅលើ Twitter នៅថ្ងៃពុធនេះថា យើងនឹងឈ្នះយ៉ាងភ្លូកទឹកភ្លូកដី ប៉ុន្តែពួកគេ(បក្សប្រជាធិបតេយ្យ)កំពុងព្យាយាមលួចបន្លំការបោះឆ្នោត… យើងនឹងមិនបណ្ដោយឱ្យពួកគេធ្វើបែបនេះឡើយ ។ ទន្ទឹមគ្នា លោក ចូ បៃដិន ក៏នៅតែបង្ហាញគំនិតសុទិដ្ឋិនិយមដែរថា រូបលោកនឹងឈ្នះនៅក្នុងការបោះឆ្នោតនេះ ដោយសារតែការរាប់សន្លឹកឆ្នោតនៅមិនទាន់បញ្ចប់ទេ ។

យ៉ាងណាមិញ បើតាមលទ្ធផលបោះឆ្នោតចេញមកជាបណ្ដើរៗនោះ លោក ដូណាល់ ត្រាំ ហាក់ដូចជាមានប្រៀបលើលោក ចូ បៃដិន ដោយកំពុងនាំមុខនៅក្នុងរដ្ឋ Swing state ជាច្រើន (រដ្ឋសំខាន់ៗដែលមានសំឡេងប្រតិភូច្រើន) ៕