អាមេរិក៖ សារព័ត៌មាន CNA ចុះផ្សាយនៅថ្ងៃទី០៦ ខែវិច្ឆិកានេះថា លោក ដូណាល់ ត្រាំ បានអះអាងដោយគ្មានបង្ហាញភស្តុតាងនៅយប់ថ្ងៃព្រហស្បតិ៍នេះថា ប្រសិនបើរាប់សន្លឹកឆ្នោតដែលស្របច្បាប់ នោះលោកនឹងទទួលបានជ័យជម្នះយ៉ាងងាយស្រួលលើលោក ចូ បៃដិន នៅក្នុងការបោះឆ្នោតប្រធានាធិបតីអាមេរិកឆ្នាំ២០២០នេះ ។

ប្រធានាធិបតីអាមេរិករូបនេះ បានគូសបញ្ជាក់នៅក្នុងសន្និសីទសារព័ត៌មានខ្លីមួយនៅឯសេតវិមានថា ការបន្តរាប់សន្លឹកឆ្នោតបច្ចុប្បន្នមានន័យសម្រាប់លោកថា ការបោះឆ្នោតនេះត្រូវបានគេបន្លំ និងលួចសន្លឹកឆ្នោតពីលោក ដោយចង់សំដៅទៅលើសន្លឹកឆ្នោតដែលប្រជាជនអាមេរិកបោះតាមប្រៃសណីយ៍ ។

សូមជម្រាបថា បច្ចុប្បន្នលោក ចូ បៃដិន នៅតែបន្តនាំមុខលោក ដូណាល់ ត្រាំ ដោយទទួលបានអ្នកបោះឆ្នោតតំណាង២៦៤រូបទល់នឹង២១៤រូប ស្របពេលដែលការរាប់សន្លឹកឆ្នោតនៅក្នុងរដ្ឋ Georgia, Pennsylvania, Nevada, North Carolina និងរដ្ឋ Alaska នៅតែបន្តដំណើរការនៅឡើយ ៕