គ្រួសារដែលរងគ្រោះដោយសារភ្លើងឆេះផ្សារកំពង់ពពិល ស្រុកពារាំង ខេត្តព្រៃវែង បានទទួលគ្រឿងឧបភោគ បរិភោគ​​ ជាអំណោយរបស់ នាយឧត្ដមសេនីយ៍ វង្ស ពិសេន

 ព្រៃវែង៖ នាយឧត្ដមសេនីយ៍ វង្ស ពិសេន ប្រធានក្រុមការងាររាជរដ្ឋាភិបាល ចុះមូលដ្ឋានស្រុកពារាំង ខេត្តព្រៃវែង បានអញ្ជើញជួបសំណេះសំណាល និងនាំយកគ្រឿងឧបភោគ បរិភោគ ថវិកា ទៅឧបត្ថម្ភដល់បងប្អូនអាជីវករលក់ដូរនៅផ្សារកំពង់ពពិល ដែលទទួលរងផលប៉ះពាល់ដោយអគ្គិភ័យឆាបឆេះផ្សារ ថ្ងៃទី៤ ខែវិច្ឆិកាឆ្នាំ២០២០ ។

ពិធីសំណេះសំណាល និងផ្តល់គ្រឿងឧបភោគ បរិភោគ ធ្វើឡើងនៅបរិវេណវត្តកំពង់ពពិល ស្រុកពារាំង ដោយមានការចូលរួមពីសំណាក់លោក ស្បោង សារ៉ាត់ ប្រធានក្រុមប្រឹក្សាខេត្តព្រៃវែង រួមនឹងអស់លោក លោកស្រី ជាមន្រ្តីក្រុមការងារចុះមូលដ្ឋានស្រុកពារាំងជាច្រើនរូប ។

លោក ហ៊ី ធួក អភិបាលស្រុកពារាំង ឲ្យដឹងថា អគ្គិភ័យបានឆាបឆេះផ្សារកំពង់ពពិលរបស់ស្រុកពារាំងនេះនៅវេលាម៉ោង ៩:០០ នាទីយប់ ថ្ងៃទី៤ ខែវិច្ឆិកា ឆ្នាំ២០២០ ដោយទូស្សេខ្សែភ្លើង និងបានរលត់ទាំងស្រុងនៅម៉ោង១២៖៣០នាទីយប់ ដោយប្រើប្រាស់ឡានទឹកសរុប ២១គ្រឿង។ ចំពោះការខូចខាតមានទំហំ ប្រមាណ៧០ភាគរយ ដោយឆេះតូបអស់ ៧៥តូប ក្នុងចំណោមតូបសរុប៩៦តូប ស្មើនឹងទឹកប្រាក់ប្រមាណ ១,០៨០,០០០ដុល្លារ។

នាយឧត្ដមសេនីយ៍ វង្ស ពិសេន បានសម្តែងការសោកស្តាយចំពោះបងប្អូនអាជីវករ ដែលបានបាត់បង់ទ្រព្យសម្បត្តិដោយសារអគ្គិភ័យ និងបានអរគុណដល់ កងកម្លាំង ប្រជាពលរដ្ឋទាំងអស់ ដែលបានចូលរួមយ៉ាងសស្រាក់សស្រាំពន្លត់អគ្គិភ័យបានទាន់ពេលវេលា មិនបណ្តាលឲ្យពលរដ្ឋណាម្នាក់ទទួលគ្រោះថ្នាក់ដល់អាយុជីវិត។

នាយឧត្ដមសេនីយ៍ បានស្នើដល់អាជ្ញាធរដែនដី និងអាជីវករផ្សារ ធ្វើការជួបពិភាក្សាគ្នា ដើម្បីឈានទៅដល់ការឯកភាពរៀបចំសណ្តាប់ធ្នាប់ផ្សារកំពង់ពពិលនេះឡើងវិញ ប្រកបដោយបរិស្ថាន អនាម័យល្អ ធានាសុវត្ថិភាព ស្របតាមការវិវត្តន៍រីកចម្រើនរបស់សង្គមជាតិបច្ចុប្បន្ន។

នាយឧត្ដមសេនីយ៍ វង្ស ពិសេន បានឧបត្ថម្ភដល់ប្រជាពលរដ្ឋរងគ្រោះចំនួន ៩៩គ្រួសារ ដោយក្នុងមួយគ្រួសារៗ ទទួលបានអង្ករ មី ត្រីខ ទឹកត្រី ទឹកស៊ីអ៊ីវ ទឹកក្រូច ទឹកបរិសុទ្ធ សារុង និង ថវិកាសរុបជាង ២៤ លានរៀល។