រដ្ឋបាលខេត្តកែប ចុះពិនិត្យ អប់រំ ណែនាំពីវិធានការការពារការឆ្លងរីករាលដាលនៃជំងឺ Covid-19 ចូលសហគមន៍ ដល់ដល់ម្ចាស់សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន និងរីស៊ត
នៅព្រឹកថ្ងៃទី០៧ ខែធ្នូ ឆ្នាំ២០២០ ឯកឧត្តម សោម ពិសិដ្ឋ អភិបាល នៃគណៈអភិបាលខេត្តកែប និងជាប្រធានគណៈបញ្ជាការឯកភាពរដ្ឋបាលខេត្តកែប បានដឹកនាំគណៈកម្មការប្រយុទ្ធប្រឆាំងនឹងជំងឺកូវីដ-១៩ សមាជិកលេខាធិការដ្ឋាន កងកម្លាំងប្រដាប់អាវុធ និងអាជ្ញាធរមូលដ្ឋានចុះពិនិត្យ អប់រំ ណែនាំដល់ម្ចាស់សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន រីស៊តឱ្យមានការចូលរួមអនុវត្តន៍វិធានការការពារការឆ្លងរីករាលដាលនៃជំងឺ Covid-19 ដល់សហគមន៍ស្របតាមការណែនាំរបស់ប្រមុខរាជរដ្ឋាភិបាល និងក្រសួងសុខាភិបាល ។
នៅក្នុងឱកាសនេះ ឯកឧត្តម សោម ពិសិដ្ឋ អភិបាលនៃគណៈអភិបាលខេត្តកែប បានមានប្រសាសន៍ថា បច្ចុប្បន្នជំងឺកូវីដ-១៩ បាននឹងកំពុងតែមានការរីករាលដាលឆ្លងក្នុងសហគមន៍ជាបណ្តើរៗហើយដូចជានៅរាជធានីភ្នំពេញ និងតាមបណ្តាខេត្តមួយចំនួន ដូច្នេះ ខ្ញុំសូមឲ្យអ្នកគ្រប់គ្រង និងបុគ្គលិកទាំងអស់គ្នាត្រូវមានការប្រុងប្រយ័ត្នខ្ពស់ ដោយត្រូវប្រកាន់ភ្ជាប់នូវការពាក់ម៉ាស់ លាងដៃជាមួយអាល់កុលឲ្យបានញឹកញាប់ មានការគម្លាតសង្គមឲ្យបានត្រឹមត្រូវ ។
ម្ចាស់សណ្ឋាគារផ្ទះសំណាក់ រីស៊ត ភោជនីយដ្ឋាន អាហារដ្ឋាន ត្រូវណែនាំដល់បុគ្គលិកទាំងអស់ឲ្យពាក់ម៉ាស់ សម្អាតដៃជាមួយអាល់កុល និងដាក់អាល់កុលជូនភ្ញៀវដែលចូលមកសម្រាក និងពិសារអាហារ ស្របតាមអនុសាសន៍ណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងការណែនាំរបស់ក្រសួងសុខាភិបាលក្នុងប្រយុទ្ធប្រឆាំង ការការពារ និងការទប់ស្កាត់ការីករាលដាលនៃជំងឺកូវីដ-១៩នៅក្នុងសហគមន៍។
តាមរយៈការចុះពិនិត្យ អប់រំណែនាំនេះ សង្កេតឃើញថាតាមបណ្តាសណ្ឋាគារ ផ្ទះសំណាក់ អាហារដ្ឋាន ភោជនីយដ្ឋាននៅក្នុងខេត្តកែប មានការអនុវត្តត្រឹមត្រូវស្របតាមការណែនាំរបស់ក្រសួងសុខាភិបាល ដោយបុគ្គលិកមានការពាក់ម៉ាស់ ដាក់អាល់កុលសម្រាប់ភ្ញៀវដែលចូលមកសម្រាក និងពិសារអាហារ៕ ដោយ៖ អ៊ិត រ៉ាវុធ