ភ្នំពេញ ៖ រដ្ឋបាលខណ្ឌច្បារអំពៅ ធ្វើយុទ្ធនាការផ្សព្វផ្សាយអំពីវិធានការណ៍ណែនាំ និងការពារជំងឺកូវីដ-១៩ ដល់ប្រជាពលរដ្ឋក្នុងមូលដ្ឋាន នៅព្រឹកថ្ងៃទី០៨ ខែធ្នូ ឆ្នាំ២០២០ បន្ទាប់ពីទទួលបាននូវបទបញ្ជាណែនាំរបស់ឯកឧត្តម ឃួង ស្រេង អភិបាលរាជធានីភ្នំពេញ ដែលបានដាក់បញ្ជាឱ្យរដ្ឋបាលខណ្ឌទាំង១៤ គោរពទៅតាមការណែនាំទាំង១០ចំណុច ដែលបានដាក់ចេញ កាលពីពេលកន្លងមក ជាពិសេស អនុសាសន៍ណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្ដេច បានផ្ញើសារផ្តល់ការណែនាំដល់ប្រជាពលរដ្ឋឱ្យមានការប្រុងប្រយ័ត្នខ្ពស់ និងរួមគ្នាប្រយុទ្ធប្រឆាំងការរីករាលដាលនៃជំងឺកូវីដ-១៩ នៅក្នុងសហគមន៍ ក្រោយព្រឹត្តិការណ៍សហគមន៍ ២៨វិច្ឆកាមកនោះ គេឃើញរដ្ឋបាលខណ្ឌទាំង១៤ ក្នុងរាជធានីភ្នំពេញ បាន បើកយុទ្ធនាការផ្សព្វផ្សាយយ៉ាងគគ្រឹកគ្រេង ។

តាមរយៈយុទ្ធនាការនេះ បានបង្ហាញឱ្យឃើញពីកម្លាំងចលករដ៏សស្រាក់សស្រាំរបស់ថ្នាក់ដឹកនាំ អាជ្ញាធរមូលដ្ឋានគ្រប់ជាន់ថ្នាក់ ដើម្បីដាស់រំលឹកដល់ប្រជាពលរដ្ឋ កុំភ្លេចស្មារតីឱ្យមានការប្រុងប្រយ័ត្នជាប់ជានិច្ច និងចូលរួមទាំងអស់គ្នា ក្នុងការប្រយុទ្ធប្រឆាំង ទប់ស្កាត់ និងការពារខ្លួន ការពារគ្រួសារ សហគមន៍ និងប្រទេសជាតិ ក្នុងគ្រាកំពុងជួបនូវជំងឺរាត្បាតដ៏កាចសាហាវមួយនេះនៅក្នុងសហគមន៍។

អនុវត្តន៍តាមបទបញ្ជា និងអនុសាសន៍ខាងលើនេះ រដ្ឋបាលខណ្ឌច្បារអំពៅ បានរៀបចំចាត់ចែងកម្លាំងនគរបាល មានរថយន្ត និងម៉ូតូកង់បីរបស់អាវុធហត្ថ បំពាក់ឧបករណ៍បំពងសម្លេង ហើយបានបើកយុទ្ធនាការបន្តផ្សព្វផ្សាយ អំពីវិធាននានារបស់ក្រសួងសុខាភិបាល និងបទបញ្ជាទាំង១០ចំណុច របស់រដ្ឋបាលរាជធានីភ្នំពេញ ជាពិសេសអនុសាសន៍ដឹកនាំដ៏ខ្ពង់ខ្ពស់បំផុតរបស់សម្តេចតេជោ នាយករដ្ឋមន្ត្រី នៃកម្ពុជា ក្នុងការទប់ស្កាត់ការឆ្លងជំងឺកូវីដ-១៩ នៅក្នុងសហគមន៍រាជធានីភ្នំពេញ ដើម្បីធ្វើយ៉ាងណាទប់ស្កាត់ការរីករាលដាលជំងឺកូវីដ១៩ ខណៈដែលជំងឺនេះ បាននឹងកំពុងរីករាលដាលចូលសហគមន៍ជាច្រើននៅភ្នំពេញ។

មុនពេលចេញក្បួនយុទ្ធនាការផ្សព្វផ្សាយនេះ លោក ចេង មុនីរ៉ា អភិបាលខណ្ឌច្បារអំពៅ បានក្រើនរំលឹកដល់មន្រ្តីរបស់ខ្លួន ឱ្យមានការប្រុងប្រយ័ត្នជាប់ជានិច្ច រក្សាគម្លាតសង្គមយ៉ាងតិច១.៥ម៉ែត្រ ហើយធ្វើនាំគ្នា ធ្វើប្រតិបត្តិការណ៍ឱ្យបានគ្រប់ច្រកល្ហកនៅក្នុងមូលដ្ឋានសង្កាត់ទាំង៨ នៃខណ្ឌច្បារអំពៅ ។ បន្ថែមពីនេះលោកក៏បានអំពាវនាវឱ្យប្រជាពលរដ្ឋស្វែងយល់នូវព័ត៌មានទាក់ទិនវិធានការណ៍ការពារទប់ស្កាត់ជំងឺផ្លូវដង្ហើមមួយនេះឱ្យបានល្អិតល្អន់តាមការណែនាំរបស់ក្រសួងសុខាភិបាល នឹងរួមគ្នាឆ្លងឱ្យផុតពីគ្រាដ៏អាសន្នមួយនេះ។

យ៉ាងណាលោកអភិបាលខណ្ឌបានបញ្ជាក់ថា យុទ្ធនាការផ្សព្វផ្សាយនេះ នឹងបន្តធ្វើជាប្រចាំនៅក្នុងមូលដ្ឋានរបស់ខ្លួន រហូតទទួលបានការណែនាំជាថ្មី ពីអភិបាលនៃគណៈអភិបាលរាជធានីភ្នំពេញ ក្រោយពេលស្ថានភាព នៃការរីករាលដាលនៃជំងឺកូវីដ១៩មានភាពធូរស្រាលឡើងវិញ៕ ដោយ ប៊ុនធី វាន់លុក